विशेष प्रतिनिधी
वॉशिंग्टन:अमेरिकेचे राष्ट्राध्यक्ष डोनाल्ड ट्रम्प यांनी भारताच्या 7 टक्के जीडीपी (GDP) विकासदराचे कौतुक करत आपल्याच देशाची केंद्रीय बँक असलेल्या ‘फेडरल रिझर्व्ह’वर जोरदार निशाणा साधला आहे. भारतातील व्याजदर कमी असल्यामुळेच भारतीय अर्थव्यवस्था वेगाने वाढत असून, अमेरिकेनेही व्याजदरात कपात केल्यास देशाचा विकासदर 14-15 टक्क्यांपासून थेट 20 टक्क्यांपर्यंत पोहोचू शकतो, असा मोठा दावा ट्रम्प यांनी केला आहे.Donald Trump
फेडरल रिझर्व्हच्या धोरणावर ट्रम्प यांचा संताप
व्हाइट हाऊसमध्ये पत्रकारांशी संवाद साधताना डोनाल्ड ट्रम्प यांनी अमेरिकन केंद्रीय बँकेच्या व्याजदर धोरणावर तीव्र नाराजी व्यक्त केली. जेव्हा जेव्हा अमेरिकेचे आर्थिक आकडे चांगले येतात, तेव्हा फेडरल रिझर्व्ह व्याजदर वाढवते; प्रत्यक्षात अर्थव्यवस्था मजबूत असताना आणि पत सुधारलेली असताना व्याजदर कमी करायला हवेत, जेणेकरून व्यवसाय, गुंतवणूक आणि कर्ज परतफेडीला चालना मिळेल, असे ट्रम्प म्हणाले. फेडरल रिझर्व्ह अत्यंत ‘राजकीय’ पद्धतीने काम करत असून चुकीच्या धोरणांमुळे देशाच्या आर्थिक प्रगतीला खीळ बसत असल्याचा आरोप त्यांनी केला. अमेरिका इतर देशांना आर्थिकदृष्ट्या यशस्वी होण्यास मदत करतो, त्यामुळे जगातील सर्वात कमी व्याजदर अमेरिकेतच असायला हवेत, अशी भूमिकाही त्यांनी मांडली.Donald Trump
महागाई आणि भारत-अमेरिका व्याजदरांची वास्तविक स्थिती
दरम्यान, अमेरिकेतील महागाई दर फेडरल रिझर्व्हच्या 2 टक्क्यांच्या लक्ष्यापेक्षा जास्त असल्याने केंद्रीय बँकेने व्याजदर चढे ठेवले आहेत. सप्टेंबरमध्ये अमेरिकेचा महागाई दर 3.6 टक्के, तर अन्न व ऊर्जेच्या किमती वगळून मोजला जाणारा मूळ महागाई दर 3.1 टक्के नोंदवला गेला. विशेष म्हणजे, ट्रम्प यांनी भारतातील व्याजदर कमी असल्याचे म्हटले असले, तरी अधिकृत आकडेवारीनुसार रिझर्व्ह बँक ऑफ इंडियाचा (RBI) बेंचमार्क रेपो दर 5.50 टक्के आहे, तर अमेरिकन फेडरल रिझर्व्हचा दर 3.75 ते 4 टक्क्यांच्या दरम्यान आहे. दुसरीकडे, भारत आणि अमेरिका यांच्यात द्विपक्षीय व्यापार करारावर चर्चा सुरू असून, बांगलादेश, व्हिएतनाम आणि कंबोडियासारख्या देशांच्या तुलनेत भारतीय वस्तूंवर अमेरिकेने कमी शुल्क लावावे, यासाठी भारत प्रयत्नशील आहे.
महत्वाच्या बातम्या
To be published, comments must be reviewed by the administrator.*
Our website uses cookies to improve your experience. Learn more
Download App