शाहरुख-अजय-टायगर अडचणीत? ‘त्या’ जाहिरातीवरून FDAचा मोठा दणका

By, wankhadepravin - August 16, 2026 03:00:45

0

विशेष प्रतिनिधी

मुंबई : ‘विमल इलायची’च्या जाहिरातीवरून बॉलिवूडमधील अभिनेते शाहरुख खान, अजय देवगण आणि टायगर श्रॉफ यांच्या अडचणी वाढण्याची शक्यता आहे. महाराष्ट्र अन्न व औषध प्रशासनाने (FDA) तिन्ही अभिनेत्यांना कारणे दाखवा नोटीस बजावली आहे. संबंधित जाहिरात अप्रत्यक्षपणे ‘विमल पान मसाला’चा प्रचार करणारी म्हणजेच सरोगेट जाहिरात असल्याचा प्राथमिक संशय FDAने व्यक्त केला आहे.

महाराष्ट्राचे अन्न सुरक्षा आयुक्त तुकाराम मुंढे यांनी ११ ऑगस्ट रोजी या नोटिसा बजावल्या. तिन्ही अभिनेत्यांना १५ दिवसांच्या आत लेखी स्पष्टीकरण सादर करण्याचे निर्देश देण्यात आले आहेत. तसेच, त्यांच्याविरोधात कायदेशीर कारवाई का करू नये, याचे कारणही स्पष्ट करण्यास सांगण्यात आले आहे.

‘विमल इलायची’च्या जाहिरातीवर FDAचा आक्षेप

FDAने संबंधित जाहिरातीतील मांडणी, संवाद, उत्पादनाचे नाव आणि ‘विमल’ या ब्रँडची बाजारातील ओळख यांचा अभ्यास केला. ‘विमल इलायची’ हे नाव ग्राहकांच्या मनात ‘विमल पान मसाला’शी संबंध निर्माण करू शकते, असा FDAचा प्राथमिक आक्षेप आहे.

संविधानाच्या गप्पा, पण चर्चेपासून पळ! फडणवीसांचा विरोधकांना थेट सवाल

प्रतिबंधित उत्पादनाची ब्रँड ओळख किंवा त्याची आठवण ग्राहकांच्या मनात कायम ठेवण्यासाठी अशा प्रकारच्या जाहिरातीचा वापर केला जात आहे का, याचीही तपासणी प्रशासनाकडून करण्यात येत आहे.

मात्र, या प्रकरणात तिन्ही अभिनेत्यांविरोधात अद्याप अंतिम निष्कर्ष काढण्यात आलेला नाही. नोटीस बजावून त्यांना आपली बाजू मांडण्याची पूर्ण संधी देण्यात आली आहे. त्यांचे स्पष्टीकरण प्राप्त झाल्यानंतर पुढील कारवाईबाबत निर्णय घेतला जाणार आहे.

जाहिरात हटवण्याचेही निर्देश

FDAने शाहरुख खान, अजय देवगण आणि टायगर श्रॉफ यांना संबंधित जाहिरात मोहिमेतील सहभाग थांबवण्याचे निर्देश दिले आहेत. तसेच त्यांच्या अधिकृत सोशल मीडिया अकाउंटवरील संबंधित जाहिराती, पोस्ट आणि प्रचार साहित्य हटवण्यास सांगण्यात आले आहे.

याशिवाय, तिन्ही अभिनेत्यांकडून जाहिरात कराराची प्रत, मोहिमेशी संबंधित कागदपत्रे, मानधनाचा तपशील आणि जाहिरात स्वीकारण्यापूर्वी करण्यात आलेल्या पडताळणीची माहितीही मागवण्यात आली आहे.

पान मसाल्यावरील बंदीचा संदर्भ

FDAने या कारवाईसाठी १३ जुलै २०२६ रोजी जारी केलेल्या महाराष्ट्रातील बंदी आदेशाचा संदर्भ दिला आहे. या आदेशानुसार राज्यात एक वर्षाच्या कालावधीसाठी पान मसाल्याचे उत्पादन, साठवणूक, वाहतूक, वितरण आणि विक्रीवर निर्बंध घालण्यात आले आहेत.

ही कारवाई अन्न सुरक्षा आणि मानके अधिनियम, २००६ मधील तरतुदींनुसार करण्यात आली आहे. तसेच दिशाभूल करणाऱ्या किंवा फसव्या अन्न जाहिरातींविरोधात कारवाई करण्यासाठी अधिनियमातील कलम २४चाही आधार घेण्यात आला आहे.

दिशाभूल करणाऱ्या जाहिरातींवर दंडाची तरतूद

अन्न सुरक्षा आणि मानके अधिनियमातील कलम ५३ अंतर्गत दिशाभूल करणाऱ्या जाहिरातीच्या प्रकाशन किंवा प्रचारात सहभागी आढळल्यास दंडाची तरतूद आहे. अशा प्रकरणात १० लाख रुपयांपर्यंत दंड होऊ शकतो.

दरम्यान, महाराष्ट्र FDAने प्रतिबंधित उत्पादनांची सरोगेट जाहिरात केली जाते का, यावर लक्ष केंद्रित केले आहे. एखाद्या दुसऱ्या उत्पादनाच्या नावाखाली त्याच ब्रँडच्या प्रतिबंधित उत्पादनाचा अप्रत्यक्ष प्रचार होत आहे का, याची स्वतंत्रपणे तपासणी केली जात आहे.

शाहरुख खान, अजय देवगण आणि टायगर श्रॉफ यांच्याबाबतही सध्या केवळ नोटीस बजावण्यात आली आहे. त्यांच्या स्पष्टीकरणानंतरच FDA पुढील कायदेशीर कारवाई करायची की नाही, याचा निर्णय घेणार आहे.