Shambhuraj Desai शेतकऱ्यांसाठी सरकारची मोठी घोषणा; दुष्काळी तालुक्यांबाबत शंभूराज देसाईंचे मोठे वक्तव्य

शेतकऱ्यांसाठी सरकारची मोठी घोषणा; दुष्काळी तालुक्यांबाबत शंभूराज देसाईंचे मोठे वक्तव्य

विशेष प्रतिनिधी

सातारा : माण, कोरेगाव व फलटण तालुक्यात यावर्षी कमी प्रमाणात पाऊस झाला आहे. यामुळे शेतकऱ्यांची उभी पिके पाण्याअभावी करपून गेली आहेत. शेतकऱ्यांनी खचून जाऊ नये. त्यांच्या पाठीशी शासन खंबीरपणे उभे असून, तातडीने पीक नुकसानीची मदत केली जाईल, असे आश्वासन पालकमंत्री शंभूराज देसाई यांनी दिले. Shambhuraj Desai

पालकमंत्री श्री. देसाई यांनी कोरेगाव, फलटण व माण तालुक्यातील दुष्काळग्रस्त गावांमध्ये प्रत्यक्ष शेताच्या बांधावर जाऊन पिकांची पाहणी केली. या वेळी विविध विभागांचे अधिकारी उपस्थित होते.

‘मराठवाडा वॉटर ग्रीड प्रकल्प महाविकास आघाडीने गुंडाळला’; मुख्यमंत्री देवेंद्र फडणवीसांचा आरोप

याप्रसंगी पालकमंत्री श्री. देसाई म्हणाले, एकही बाधित शेतकरी पंचनाम्यापासून वंचित राहणार नाही, याची सूचना प्रशासनाला देण्यात आली आहे. शासनाच्या सूचनेनुसारच आज मी शेतकऱ्यांच्या बांधावर प्रत्यक्ष पीक नुकसानीची पाहणी करत आहे. प्रशासनाला पंचनामे करण्याबरोबरच अहवाल तातडीने शासनाकडे सादर करण्याच्या सूचनाही देण्यात आल्या आहेत.

आज शेतकरी अडचणीत आहे. त्यांना पुन्हा उभे करण्याचे काम शासन करीत आहे. त्यामुळे शेतकऱ्यांनी निराश न होता पुन्हा नव्या उमेदीने उभे राहावे. शासन आपल्या पाठीशी खंबीरपणे उभे आहे, अशी ग्वाहीही पालकमंत्री श्री. देसाई यांनी दिली.