आझाद मैदान आंदोलनाला परवानगी नाही, तरी जरांगे मुंबईकडे निघाले; पुढे काय घडणार?

By, wankhadepravin - September 16, 2026 11:30:32

0

विशेष प्रतिनिधी

जालना/मुंबई: मराठा आरक्षणासाठी मुंबईतील आझाद मैदानावर उपोषण करण्यास मुंबई पोलिसांनी दोनदा परवानगी नाकारल्यानंतरही आंदोलनकर्ते मनोज जरांगे पाटील मंगळवारी, १५ सप्टेंबर रोजी अंतरवाली सराटीतून मुंबईच्या दिशेने रवाना झाले. त्यांनी काही मोजक्या सहकाऱ्यांसह मुंबईत जाण्याचा निर्णय घेतला असून, आझाद मैदानावर आंदोलन करण्यासाठी तिसऱ्यांदा पोलिसांकडे अर्ज करण्यात आला आहे. या ताज्या अर्जावर पोलिसांचा अंतिम निर्णय अद्याप स्पष्ट झालेला नाही. Manoj Jarange

मुंबई पोलिसांनी यापूर्वी जरांगे यांच्या आंदोलनाच्या अर्जांना परवानगी नाकारताना गणेशोत्सवातील गर्दी, सार्वजनिक सुरक्षा, वाहतूक व्यवस्थेवरील संभाव्य परिणाम आणि कायदा-सुव्यवस्था यांचा उल्लेख केला होता. पोलिसांनी गणेशोत्सवानंतर आणि आझाद मैदानाव्यतिरिक्त अन्य ठिकाणाचा विचार करण्याची सूचना केल्याचे वृत्त आहे.

मात्र, परवानगी मिळाली नसतानाही जरांगे यांनी मुंबईकडे जाण्याची भूमिका कायम ठेवली आहे. दोन अर्ज नाकारल्यानंतर त्यांच्या वतीने तिसरा अर्ज सादर करण्यात आला असून, त्यात पोलिसांनी घातलेल्या अटींचे पालन करण्याची तयारी दर्शविण्यात आली आहे.

सुरुवातीला आझाद मैदानावरील आंदोलनासाठी मोठ्या संख्येने समर्थक उपस्थित राहण्याची योजना होती. मात्र, पोलिसांकडून परवानगी न मिळाल्यानंतर जरांगे यांनी आपल्या भूमिकेत बदल करत चार ते पाच सहकाऱ्यांसह मुंबईत जाण्याचे जाहीर केले.

प्रसाद वाटप करणाऱ्या गणेश मंडळांना एफडीए नोंदणी बंधनकारक

त्यामुळे सध्या मुख्य प्रश्न जरांगे यांना मुंबई शहरात प्रवेश मिळणार की नाही, एवढाच नसून आझाद मैदानावर त्यांना प्रत्यक्ष उपोषण करण्याची परवानगी मिळते का, याकडे लक्ष लागले आहे.

जरांगे यांनी जाहीर केलेल्या प्रवास आराखड्यानुसार त्यांचा पहिला मुक्काम बीड जिल्ह्यातील पाटोदा परिसरात नियोजित करण्यात आला आहे. त्यानंतर श्रीगोंदा, हडपसर आणि खोपोलीमार्गे मुंबईच्या दिशेने जाण्याचे नियोजन यापूर्वी जाहीर करण्यात आले होते. मंगळवारी ते अंतरवाली सराटीतून रवाना झाले तेव्हा ते उपोषणाच्या १८व्या दिवशी होते.

मुंबईतील आंदोलनाला पहिल्यांदा परवानगी नाकारल्यानंतर जरांगे यांनी पाणी आणि सलाईन घेणे थांबविण्याची घोषणा केली होती. त्यांच्या कुटुंबीयांनीही त्यांच्या प्रकृतीबाबत चिंता व्यक्त करत सरकारने आरक्षणाच्या मागण्यांवर निर्णय घ्यावा, अशी विनंती केली.

दोन अर्ज फेटाळल्यानंतर जरांगे आणि त्यांच्या सहकाऱ्यांच्या वतीने आझाद मैदान पोलिसांकडे तिसऱ्यांदा अर्ज करण्यात आला आहे. या अर्जात आंदोलन मर्यादित स्वरूपात करण्यासह पोलिसांच्या विविध अटी मान्य करण्याची तयारी दर्शविण्यात आली आहे. या तिसऱ्या अर्जावर पोलिसांकडून अंतिम उत्तर येणे बाकी होते. त्यामुळे जरांगे मुंबईत पोहोचेपर्यंत परवानगीबाबत पोलिस काय भूमिका घेतात, याकडे आंदोलकांचे लक्ष लागले आहे.

दरम्यान, आंदोलनाला परवानगी न मिळाल्याच्या पार्श्वभूमीवर काही समर्थकांनी आपण स्वतंत्रपणे गणेशोत्सवासाठी मुंबईत जाऊ शकतो, अशी भूमिका घेतली आहे. मात्र, कोणत्याही मोठ्या जमावासाठी तसेच निदर्शन किंवा आंदोलनासाठी लागू असलेल्या पोलिस नियमांचे पालन करणे आवश्यक राहणार आहे.

जरांगे यांनी मुंबईकडे कूच कायम ठेवल्याने पुढील काही दिवसांत त्यांच्या प्रवासाचा मार्ग, समर्थकांची संख्या आणि मुंबई पोलिसांचा तिसऱ्या अर्जावरील निर्णय या तीन बाबींवर या आंदोलनाची पुढील दिशा अवलंबून राहणार आहे.