साहिल वाकोडे आत्महत्या प्रकरणात IIT बॉम्बे संचालक शिरीष केदारे यांची 10 तास चौकशी

By, wankhadepravin - October 6, 2026 11:30:08

0

गुन्हे शाखेकडून जबाब नोंदवला; प्राध्यापक सूर्यनारायण डुल्ला यांचीही यापूर्वी चौकशी Sahil Wakode

विशेष प्रतिनिधी

मुंबई : आयआयटी बॉम्बेचा २० वर्षीय विद्यार्थी साहिल वाकोडे याच्या आत्महत्या प्रकरणाचा तपास मुंबई गुन्हे शाखेकडून सुरू असून, या प्रकरणात आयआयटी बॉम्बेचे संचालक शिरीष केदारे यांची जवळपास १० तास चौकशी करण्यात आली. गुन्हे शाखेने त्यांचा जबाबही नोंदवला आहे. यापूर्वी प्राध्यापक सूर्यनारायण डुल्ला यांचीही चौकशी करून त्यांचा जबाब नोंदवण्यात आला होता.

पोलिसांच्या चौकशीदरम्यान संचालक शिरीष केदारे आणि प्राध्यापक सूर्यनारायण डुल्ला यांनी त्यांच्यावर करण्यात आलेले आरोप फेटाळून लावल्याचे समोर आले आहे. साहिलविरुद्ध कोणत्याही प्रकारची जातीय टिप्पणी करण्यात आली नसल्याचे दोघांनीही पोलिसांना सांगितले. तसेच परीक्षा आणि शिस्तभंगाशी संबंधित सर्व प्रक्रिया आयआयटी बॉम्बेच्या प्रचलित नियम आणि मार्गदर्शक तत्त्वांनुसारच पार पाडण्यात आल्याचा दावा त्यांनी केला आहे.

9 ते 10 तास चौकशी, जबाब नोंदवला

गुन्हे शाखेतील एका अधिकाऱ्याने दिलेल्या माहितीनुसार, चौकशी आणि जबाब नोंदवण्यासाठी आयआयटी बॉम्बेचे संचालक शिरीष केदारे यांना पोलिसांकडून बोलावण्यात आले होते. विविध मुद्द्यांवर त्यांची सुमारे ९ ते १० तास चौकशी करण्यात आली. चौकशी पूर्ण झाल्यानंतर त्यांना पोलिसांनी जाण्याची परवानगी दिली.

या प्रकरणात यापूर्वी प्राध्यापक सूर्यनारायण डुल्ला यांचीही चौकशी करण्यात आली आहे. साहिलच्या आत्महत्येपूर्वी परीक्षा केंद्रावर घडलेल्या घटनांबाबत पोलिसांनी त्यांच्याकडून माहिती घेतली होती.

परीक्षेदरम्यान मोबाईल सापडला होता

साहिल वाकोडे याने १८ सप्टेंबर रोजी आत्महत्या केली होती. त्यावेळी आयआयटी बॉम्बेमध्ये मिड-सेमिस्टर परीक्षा सुरू होत्या. परीक्षेदरम्यान साहिलकडे मोबाईल फोन आढळून आल्याची माहिती प्राध्यापक सूर्यनारायण डुल्ला यांनी दिली होती.

या घटनेची नोंद कॉपी करण्याचा प्रकार म्हणून करण्यात आली होती. त्यानंतर या प्रकरणावरून वाद निर्माण झाला. साहिलच्या कुटुंबीयांकडून आणि संबंधितांकडून करण्यात आलेल्या आरोपांच्या पार्श्वभूमीवर पोलिसांनी तपास सुरू केला.

आतापर्यंत 40 हून अधिक जणांचे जबाब

गुन्हे शाखेने या प्रकरणात आतापर्यंत ४० हून अधिक व्यक्तींचे जबाब नोंदवले आहेत. साहिलच्या आत्महत्येमागील नेमकी कारणे आणि त्यासंदर्भातील घटनाक्रम समजून घेण्यासाठी पोलिसांकडून विविध व्यक्तींची चौकशी केली जात आहे.

‘मराठीला ज्ञानभाषा बनवणार’; AIपासून स्पेस टेक्नॉलॉजीपर्यंत फडणवीसांचा मोठा प्लॅन

दरम्यान, तपास पथकाला फॉरेन्सिक सायन्स लॅबोरेटरीच्या तांत्रिक अहवालाची प्रतीक्षा आहे. साहिलचा मोबाईल फोन, लॅपटॉप तसेच इतर इलेक्ट्रॉनिक उपकरणे फॉरेन्सिक तपासणीसाठी पाठवण्यात आली आहेत. या उपकरणांमधून मृत्यूशी संबंधित महत्त्वाचे डिजिटल पुरावे किंवा इतर धागेदोरे मिळतात का, याचा तपास केला जात आहे.

पुरावे मिळाल्यास पुढील कारवाई

फॉरेन्सिक अहवाल तसेच तपासादरम्यान जमा करण्यात आलेल्या इतर पुराव्यांच्या आधारे पुढील कारवाई निश्चित केली जाणार आहे. तपासात संबंधित प्राध्यापकाविरोधात पुरेसे पुरावे आढळल्यास त्यांच्याविरोधात कायदेशीर कारवाई केली जाऊ शकते किंवा प्रकरणात अतिरिक्त आरोप समाविष्ट केले जाऊ शकतात.

याउलट, तपासात आरोपांना पुष्टी देणारे पुरावे आढळले नाहीत, तर पोलिसांकडून क्लोजर रिपोर्ट दाखल करण्याची शक्यता आहे.

सुरुवातीला पवई पोलिसांत एफआयआर

साहिल वाकोडेच्या आत्महत्येनंतर करण्यात आलेल्या तक्रारीच्या आधारे सुरुवातीला पवई पोलीस ठाण्यात प्राध्यापक सूर्यनारायण डुल्ला यांच्याविरोधात आत्महत्येस प्रवृत्त केल्याच्या आरोपाखाली गुन्हा दाखल करण्यात आला होता. तसेच अनुसूचित जाती व जमाती (अत्याचार प्रतिबंधक) कायद्यांतर्गतही गुन्हा नोंदवण्यात आला होता.

त्यानंतर या प्रकरणाचा तपास मुंबई गुन्हे शाखेकडे सोपवण्यात आला. आता गुन्हे शाखेकडून विविध व्यक्तींचे जबाब, इलेक्ट्रॉनिक उपकरणे आणि फॉरेन्सिक अहवालाच्या आधारे तपास पुढे नेला जात आहे. या तपासातून साहिलच्या आत्महत्येपूर्वी नेमका घटनाक्रम काय होता आणि त्यामागे कोणते कारण होते, याबाबत अधिक स्पष्टता येण्याची शक्यता आहे.