प्रदेशाध्यक्ष घरी पोहोचले, पण सोले भेटलेच नाहीत; उमेदवारी अर्ज भरून अनिल सोलेंनी स्पष्ट केली भूमिका

By, wankhadepravin - October 6, 2026 02:30:00

0

विशेष प्रतिनिधी

नागपूर : महाराष्ट्र विधान परिषदेच्या पदवीधर आणि शिक्षक मतदारसंघाच्या पाच जागांसाठी निवडणुकीची रणधुमाळी सुरू झाली आहे. उमेदवारी अर्ज दाखल करण्याची अंतिम मुदत ६ ऑक्टोबर आहे. अशातच नागपूर पदवीधर मतदारसंघात भाजपसमोर अंतर्गत बंडखोरीचे आव्हान उभे राहिले आहे. भाजपने माजी आमदार सुधाकर कोहळे यांना अधिकृत उमेदवारी दिल्यानंतर पक्षाचे माजी आमदार अनिल सोले यांनी अपक्ष म्हणून उमेदवारी अर्ज दाखल केला आहे.

अनिल सोले यांची नाराजी दूर करण्यासाठी भाजप प्रदेशाध्यक्ष रवींद्र चव्हाण यांनी सोमवारी त्यांच्या निवासस्थानी जाऊन भेट घेण्याचा प्रयत्न केला. मात्र, चव्हाण त्यांच्या घरी पोहोचले त्यावेळी सोले घरी उपस्थित नव्हते. त्यामुळे दोन्ही नेत्यांची प्रत्यक्ष भेट होऊ शकली नाही.

यावेळी रवींद्र चव्हाण यांनी अनिल सोले हे भाजपचे ज्येष्ठ आणि निष्ठावंत कार्यकर्ते असल्याचे सांगितले. उमेदवारी न मिळाल्यामुळे ते काहीसे नाराज असल्याचेही त्यांनी मान्य केले. त्यांच्या मनातील भावना जाणून घेण्यासाठी आपण त्यांच्या घरी आलो असल्याचे चव्हाण यांनी स्पष्ट केले. पुढील दोन-तीन दिवसांत पक्षातील वरिष्ठ नेते सोले यांची भेट घेऊन त्यांची नाराजी दूर करण्याचा प्रयत्न करतील, असा विश्वास त्यांनी व्यक्त केला. सोले पक्षासोबतची निष्ठा कायम ठेवतील, असेही चव्हाण म्हणाले.

‘मराठीला ज्ञानभाषा बनवणार’; AIपासून स्पेस टेक्नॉलॉजीपर्यंत फडणवीसांचा मोठा प्लॅन

‘कार्यकर्त्यांच्या आग्रहामुळे अर्ज दाखल’

दरम्यान, अनिल सोले यांनी सोमवारी दुपारी नागपूर विभाग पदवीधर मतदारसंघातून अपक्ष उमेदवारी अर्ज दाखल केला. अर्ज दाखल केल्यानंतर माध्यमांशी बोलताना त्यांनी आपली भूमिका स्पष्ट केली.
गेल्या २५ वर्षांपासून या मतदारसंघातील कार्यकर्ते, पाठीराखे आणि शिक्षक आपल्यासोबत असल्याचे सांगत त्यांनी उमेदवारी अर्ज दाखल करण्याचा आग्रह कार्यकर्त्यांनी केला होता, असे सोले यांनी सांगितले. कार्यकर्त्यांच्या प्रेमाखातर आणि आग्रहाखातर आपण उमेदवारी अर्ज दाखल केला, असे त्यांनी स्पष्ट केले.

“माझा मतदारांवर पूर्ण विश्वास आहे. निवडणुकीला सामोरे जाण्याचा निर्धार आम्ही केला आहे. आम्ही शिस्तबद्ध पद्धतीनेच भूमिका मांडली आहे. ही निवडणूक मी आणि माझे सर्व सहकारी शिस्तबद्ध पद्धतीने आणि निष्ठेने लढू,” अशी भूमिका अनिल सोले यांनी मांडली.

‘मुख्यमंत्र्यांचा फोन आलेला नाही’

आपल्याला मुख्यमंत्री देवेंद्र फडणवीस यांचा फोन आलेला नसल्याचेही अनिल सोले यांनी स्पष्ट केले. मात्र, गेल्या अनेक दिवसांपासून मुख्यमंत्री फडणवीस, केंद्रीय मंत्री नितीन गडकरी, प्रदेशाध्यक्ष चंद्रशेखर बावनकुळे आणि पक्षातील इतर वरिष्ठ नेत्यांना आपण या निवडणुकीसंदर्भातील आपली भूमिका सांगितली होती, असा दावा त्यांनी केला.

त्यामुळे आता माघार घेण्याचा प्रश्नच नसल्याचे सोले यांनी स्पष्ट शब्दांत सांगितले. “आमचा निर्णय झालेला आहे. मी उमेदवारी अर्ज दाखल केला आहे. मी निवडणूक लढवणार आहे,” असे ते म्हणाले.
भाजपसमोर बंडखोरी शमवण्याचे आव्हान

नागपूर पदवीधर मतदारसंघासाठी भाजपने सुधाकर कोहळे यांना अधिकृत उमेदवारी दिली आहे, तर काँग्रेसकडून विद्यमान आमदार अभिजित वंजारी निवडणुकीच्या रिंगणात आहेत. त्यातच अनिल सोले यांनी अपक्ष म्हणून अर्ज दाखल केल्याने या मतदारसंघातील राजकीय समीकरणांची चर्चा सुरू झाली आहे.

मुख्यमंत्री देवेंद्र फडणवीस यांनीही बंडखोरांनी माघार घ्यावी, अशी भूमिका व्यक्त केली असून पक्षाच्या अधिकृत उमेदवारांवर विश्वास व्यक्त केला आहे. आता पक्ष नेतृत्व अनिल सोले यांची नाराजी दूर करण्यात यशस्वी ठरते का आणि सोले आपला उमेदवारी अर्ज कायम ठेवतात का, याकडे राजकीय वर्तुळाचे लक्ष लागले आहे.