अजितदादांबद्दल सहानुभूती, मात्र त्यांच्याच पक्षात कुरघोडी; मनोज जरांगेंच्या विधानाने राजकीय चर्चांना उधाण

By, wankhadepravin - November 15, 2026 08:30:17

0

विशेष प्रतिनिधी

जालना: राज्यात सध्या दोन्ही राष्ट्रवादी काँग्रेसच्या संभाव्य विलीनीकरणावरून राजकीय वातावरण चांगलेच तापले आहे. एकीकडे सुनेत्रा पवार यांच्या नेतृत्वाखालील राष्ट्रवादी काँग्रेसच्या नेत्यांकडून या विषयावर विविध दावे केले जात असताना, खासदार सुप्रिया सुळे यांनी दादांच्या निधनानंतर विलीनीकरणाला कायमचा पूर्णविराम मिळाल्याचे स्पष्ट केले आहे. तरीही राजकीय वर्तुळात या मुद्द्यावरून सस्पेन्स कायम असल्याचे बोलले जात आहे. या सर्व घडामोडींवर आता मराठा आरक्षण आंदोलनाचे नेते मनोज जरांगे पाटील यांनी प्रतिक्रिया दिली आहे. दिवंगत अजित पवार यांच्याबद्दल आपल्याला प्रचंड सहानुभूती आहे; परंतु त्यांच्याच पक्षातील दोन-तीन नेते सातत्याने काड्या करण्याचे काम करतात, असा थेट आरोप मनोज जरांगे पाटील यांनी केला आहे.

सत्तेसाठी ईडी आणि चौकशीचा वापर करणारे हे पहिलेच सरकार

राज्यातील सध्याच्या राजकीय परिस्थितीवर आणि महायुती सरकारच्या कार्यपद्धतीवर मनोज जरांगे पाटील यांनी तीव्र शब्दांत टीका केली आहे. ते म्हणाले की, माणुसकी आणि नीतीमत्ता पूर्णपणे सोडलेले असे सरकार आजपर्यंत कधीही पाहिले नव्हते. केवळ सत्तेसाठी ईडी आणि इतर तपास यंत्रणांच्या चौकशीचा वापर करणारे हे राज्यातील पहिलेच सरकार आहे. मराठा समाजाने आपल्याला वेड्यात काढू नये, म्हणूनच आपण सरकारला थोडा वेळ देत आहोत, असेही जरांगे पाटील यांनी स्पष्ट केले. तसेच कथित 500 कोटी रुपयांच्या व्यवहारावरून त्यांनी मुख्यमंत्री एकनाथ शिंदे यांच्या शिवसेनेलाही थेट सवाल केला आहे.

‘खेलो इंडिया’च्या माध्यमातून खेळ गावागावांत पोहोचला – मुख्यमंत्री देवेंद्र फडणवीस

शिवसेना आणि राष्ट्रवादीच्या एकत्रीकरणाशी आम्हाला देणेघेणे नाही

राष्ट्रवादी काँग्रेसच्या विलीनीकरणाच्या मुद्द्यावर बोलताना जरांगे पाटील म्हणाले की, अजितदादांबद्दल आम्हाला प्रचंड सहानुभूती आहे; मात्र त्यांच्याच पक्षातील दोन-तीन जण विनाकारण काड्या करत राहतात. आम्हाला शिवसेना किंवा राष्ट्रवादी काँग्रेसच्या एकत्रीकरणाशी आणि त्यांच्या अंतर्गत राजकारणाशी काहीही देणेघेणे नाही. आम्ही केवळ मराठा आरक्षण आणि कुणबी प्रमाणपत्राच्या लढ्याशी प्रामाणिक आहोत. हैदराबाद गॅझेटनुसार मराठा समाजाला प्रमाणपत्र देण्यामध्ये सरकारकडून जाणीवपूर्वक अडथळे आणले जात आहेत. इतकेच नव्हे तर सातारा आणि औंध गॅझेट लागू न करण्याची मोहीमच सरकारने हाती घेतली असल्याचा गंभीर आरोपही जरांगे पाटील यांनी केला आहे.

धाराशिवच्या येडशी दुर्घटनेत अग्निशमन दलाच्या हलगर्जीपणाचा आरोप

दरम्यान, धाराशिव जिल्ह्यातील येडशी गावात घडलेल्या भीषण दुर्घटनेत करंडे कुटुंबातील 6 जणांचा दुर्दैवी मृत्यू झाला आहे. या घटनेबद्दल मनोज जरांगे पाटील यांनी तीव्र दुःख व्यक्त केले. ते म्हणाले की, या दुर्घटनेत करंडे कुटुंबातील कृष्ण हा एकमेव मुलगा बचावला असून, त्याला आता आई-वडील आणि भाऊ-बहिणींचे छत्र पुन्हा कधीही मिळणार नाही. या दुर्घटनेमध्ये अग्निशमन विभागाचा मोठा हलगर्जीपणा जबाबदार असल्याचा आरोप जरांगे पाटील यांनी केला असून, या प्रकरणी दोषी असणाऱ्या संबंधितांवर तात्काळ कठोर कारवाई करण्यात यावी, अशी मागणीही त्यांनी केली आहे.