अजित पवारांच्या विमान अपघातावरून मुंबई-पुण्यात ‘मफलर’चे पोस्टर, 16 नोव्हेंबरला रोहित पवार मोठा गौप्यस्फोट करणार; हसन मुश्रीफांचा टोला!

विशेष प्रतिनिधी

मुंबई / पुणे: दिवंगत उपमुख्यमंत्री अजित पवार यांच्या विमान अपघातासंदर्भात राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी पुन्हा एकदा मोठा गौप्यस्फोट करण्याचे संकेत दिले आहेत. या पार्श्वभूमीवर मुंबईतील यशवंतराव चव्हाण सेंटर आणि पुण्यातील डेक्कन परिसरात मफलरचे चित्र असलेले लक्षवेधी पोस्टर झळकल्यामुळे राज्याच्या राजकीय वर्तुळात मोठी खळबळ उडाली आहे. या पोस्टरद्वारे विमान अपघातामागील सूत्रधारांना पाठीशी घालणारा नेता नेमका कोण, असा थेट सवाल उपस्थित करण्यात आला असून 16 नोव्हेंबर रोजी दुपारी 4 वाजता मुंबईतील यशवंतराव चव्हाण सेंटर येथे रोहित पवार पत्रकार परिषद घेणार आहेत. दरम्यान, या पोस्टर मोहिमेवरून वैद्यकीय शिक्षणमंत्री हसन मुश्रीफ यांनी रोहित पवार यांना खोचक टोला लगावला आहे.



मफलरच्या पोस्टरवरून राजकीय तर्कवितर्क आणि मुश्रीफांचा टोला

अजित पवार यांच्या विमान अपघातानंतर या घटनेमागील नेमके कारण काय आणि या प्रकरणातील सर्व बाबी जनतेसमोर आल्या आहेत का, असे प्रश्न रोहित पवार सातत्याने उपस्थित करत आहेत. आता मुंबई आणि पुण्यात लावण्यात आलेल्या पोस्टरवर मफलरचे चित्र दाखवून 16 नोव्हेंबरला कोणता राजकीय बॉम्ब फुटणार, असा उल्लेख करण्यात आला आहे. हे मफलरचे चिन्ह नेमके कोणत्या बड्या नेत्याकडे निर्देश करते, याबाबत राजकीय वर्तुळात जोरदार तर्कवितर्क सुरू झाले आहेत. यावर प्रतिक्रिया देताना मंत्री हसन मुश्रीफ यांनी उपरोधिक भाष्य केले. ते म्हणाले की, रोहित पवार हे महान नेते आहेत, त्यांनी कुठलातरी शोध लावला होता आणि ते मागच्या 10 तारखेलाच काहीतरी स्पष्ट करणार होते; आता यशवंतराव चव्हाण प्रतिष्ठानसमोर त्यांनी मफलर लटकवला आहे. 16 तारखेनंतर ते काय सांगतात ते पाहू आणि त्यानंतरच यावर बोलू, असे मुश्रीफ यांनी स्पष्ट केले.

राष्ट्रवादी विलीनीकरणाचा प्रश्न आता निकाली निघाला: हसन मुश्रीफ

या वेळी मंत्री हसन मुश्रीफ यांनी दोन्ही राष्ट्रवादी काँग्रेसच्या विलीनीकरणाच्या चर्चांवरही पक्षाची भूमिका स्पष्ट केली. दोन्ही बाजूंच्या नेत्यांनी एकत्र येण्याबाबत कोणतीही चर्चा सुरू नसल्याचे त्यांनी सांगितले. मुश्रीफ म्हणाले की, अजितदादांच्या निधनानंतर विलीनीकरणाचा प्रश्न आता पूर्णपणे निकाली निघाला आहे. खासदार सुप्रिया सुळे यांनीही हा विषय संपल्याचे यापूर्वीच स्पष्ट केले आहे. दोन्ही पक्षांची मते आणि राजकीय भूमिका वेगवेगळ्या असल्यामुळे सध्या विलीनीकरणाचा विषय पुढे जाण्याची कोणतीही शक्यता दिसत नाही, असे त्यांनी नमूद केले.

अजितदादांच्या विकासकामांना त्यांचे नाव देण्याची मागणी करणार

अजित पवार यांनी आपल्या दीर्घ राजकीय आणि प्रशासकीय कारकिर्दीत राज्यात अनेक महत्त्वाची विकासकामे उभी केली आहेत, याचा उल्लेख करत मुश्रीफ यांनी त्यांच्या नामकरणाचा मुद्दाही उपस्थित केला. अजितदादांनी केलेल्या विविध कामांना आणि प्रकल्पांना त्यांचे नाव देण्यास कोणाचीही हरकत नसावी; त्यासाठी राष्ट्रवादी काँग्रेस पक्षाकडून अधिकृतपणे मागणी करण्यात येईल, असे मुश्रीफ यांनी सांगितले. आता 16 नोव्हेंबर रोजी रोहित पवार कोणते नवे पुरावे समोर आणतात आणि त्यावरून राजकारणात काय पडसाद उमटतात, याकडे सर्वांचे लक्ष लागले आहे.

rohit-pawar-ajit-pawar-plane-crash-muffler-poster-hasan-mushrif-reaction

महत्वाच्या बातम्या

Array

LEAVE A COMMENT

To be published, comments must be reviewed by the administrator.*



    दगडी चाल फेम अभिनेत्री पूजा सावंत ने गुपचूप उरकला साखरपुडा. श्रीमंत दगडूशेठ गणपती 2023 ब्रिटनचे पंतप्रधान ऋषी सुनक पत्नी अक्षता मूर्तीसह अक्षरधाम मंदिरात