Pandharpur : आषाढी वारीआधी भाविकांसाठी मोठी सूचना! 23-24 जूनला विठ्ठल मंदिर राहणार बंद; विठुरायाच्या मूर्तीचे होणार वैज्ञानिक संवर्धन

By, wankhadepravin - June 14, 2026 07:30:13

0

विशेष प्रतिनिधी

पंढरपूर : Pandharpur आषाढी वारीसाठी पंढरपूरकडे निघणाऱ्या लाखो वारकऱ्यांसाठी महत्त्वाची बातमी समोर आली आहे. श्री विठ्ठल-रुक्मिणी मंदिर 23 आणि 24 जून रोजी सर्व प्रकारच्या दर्शनासाठी पूर्णपणे बंद ठेवण्यात येणार आहे. विठ्ठलाच्या मूर्तीची झीज रोखण्यासाठी आणि तिचे दीर्घकालीन संवर्धन करण्यासाठी भारतीय पुरातत्त्व सर्वेक्षण विभाग (ASI) आणि राज्य पुरातत्त्व विभागाच्या मार्गदर्शनाखाली विशेष लेपन प्रक्रिया राबवण्यात येणार आहे. त्यामुळे मंदिर प्रशासनाने या दोन दिवसांत दर्शनासाठी पंढरपूरला येऊ नये, असे आवाहन भाविकांना केले आहे.Pandharpur

22 ते 24 जूनदरम्यान मूर्तीवर होणार विशेष प्रक्रिया

विठ्ठलाच्या मूर्तीवर 22 ते 24 जून या कालावधीत संवर्धनाचे काम करण्यात येणार आहे. मूर्तीच्या विविध भागांमध्ये नैसर्गिक झीज झाल्याचे निदर्शनास आल्यानंतर जिल्हाधिकारी, मंदिर समिती, वारकरी प्रतिनिधी आणि पुरातत्त्व विभाग यांच्यात बैठक घेण्यात आली होती. या बैठकीत विविध पर्यायांवर चर्चा झाल्यानंतर वैज्ञानिक पद्धतीने रासायनिक लेपन करून मूर्तीचे संवर्धन करण्याचा निर्णय घेण्यात आला.Pandharpur

Devendra Fadnavis : कर्जमाफीत अट नाही, तर बँकिंग व्यवस्था वाचवण्याची तरतूद’; फडणवीसांचा खुलासा, 40 लाखांहून अधिक शेतकऱ्यांना लाभ

झिजलेल्या भागांची दुरुस्ती; संरक्षक आवरणही दिले जाणार

माहितीनुसार, विठुरायाच्या मूर्तीच्या पायाजवळील काही भागांमध्ये झीज झाल्याचे आढळले आहे. तसेच मूर्तीवरील काही सूक्ष्म छिद्रे आणि झिजलेले भाग दुरुस्त करण्याची आवश्यकता असल्याचे तज्ज्ञांनी नमूद केले आहे.

यासाठी मूर्तीच्या मूळ दगडाशी सुसंगत दगडी पावडर आणि विशेष सेंद्रिय रसायनांचा वापर करण्यात येणार आहे. झिजलेल्या भागांची दुरुस्ती केल्यानंतर मूर्तीचे आयुष्यमान वाढवण्यासाठी संरक्षक आवरण (Protective Coating) देखील दिले जाणार आहे.

दोन दिवस दर्शन पूर्णपणे बंद

संवर्धनाचे काम सुरक्षित आणि अचूक पद्धतीने पार पडावे यासाठी 23 आणि 24 जून रोजी मंदिरात कोणत्याही प्रकारचे दर्शन उपलब्ध राहणार नाही.

23 जून – विठ्ठल मंदिर पूर्णपणे बंद
24 जून – विठ्ठल मंदिर पूर्णपणे बंद

या कालावधीत सर्वसामान्य भाविकांसह कोणालाही दर्शन घेता येणार नसल्याचे मंदिर प्रशासनाने स्पष्ट केले आहे.

ASI आणि तज्ज्ञांच्या देखरेखीखाली काम

संपूर्ण प्रक्रिया भारतीय पुरातत्त्व सर्वेक्षण विभाग (ASI), राज्य पुरातत्त्व विभाग आणि मूर्ती संवर्धन क्षेत्रातील तज्ज्ञांच्या मार्गदर्शनाखाली पार पडणार आहे. मूर्तीचे पावित्र्य अबाधित ठेवत तिचे वैज्ञानिक पद्धतीने जतन करणे हा या उपक्रमाचा मुख्य उद्देश असल्याचे प्रशासनाने सांगितले आहे.

यापूर्वीही चार वेळा झाले संवर्धन

श्री विठ्ठलाच्या मूर्तीचे यापूर्वीही वेळोवेळी संवर्धन करण्यात आले आहे. सन 1988, 2005, 2012 आणि 2020 मध्ये मूर्तीवर विशेष लेपन करून संरक्षणात्मक उपाययोजना करण्यात आल्या होत्या. आता जवळपास पाच वर्षांनंतर पुन्हा एकदा मूर्तीच्या जतनासाठी ही प्रक्रिया राबवली जात आहे.

वारीपूर्वी महत्त्वाचा निर्णय

आषाढी एकादशीच्या पार्श्वभूमीवर लवकरच लाखो वारकरी पंढरपुरात दाखल होणार आहेत. त्याआधी विठुरायाच्या मूर्तीचे संवर्धन पूर्ण करून भाविकांसाठी सुरक्षित आणि सुरळीत दर्शन व्यवस्था उपलब्ध व्हावी, यासाठी हा निर्णय घेण्यात आल्याचे मंदिर प्रशासनाने स्पष्ट केले आहे.

म्हणूनच 23 आणि 24 जून रोजी पंढरपूरला जाण्याचे नियोजन केलेल्या भाविकांनी आपला प्रवास पुढे ढकलावा, असे आवाहन करण्यात आले आहे. विठुरायाच्या मूर्तीचे जतन आणि भावी पिढ्यांसाठी तिचे संवर्धन करण्याच्या दृष्टीने हा निर्णय अत्यंत महत्त्वाचा मानला जात आहे.