ट्रम्प एअर फोर्स वनमध्ये चढले… पण काही मिनिटांतच गुपचूप विमान बदललं; नेमकं काय घडलं?

By, wankhadepravin - August 12, 2026 10:00:31

0

विशेष प्रतिनिधी

अमेरिकेचे राष्ट्राध्यक्ष डोनाल्ड ट्रम्प यांनी तुर्कीमध्ये झालेल्या नाटो शिखर परिषदेनंतर परतीच्या प्रवासात ऐनवेळी विमान बदलल्याचे अखेर स्पष्ट केले आहे. संभाव्य धोक्यामुळे सीक्रेट सर्व्हिस आणि लष्कराच्या सूचनेनुसार विमान बदलल्याचे ट्रम्प यांनी सांगितले. अमेरिकेने विमानावर इराणकडून क्षेपणास्त्र हल्ला होण्याचा विश्वासार्ह धोका ओळखल्याची माहिती समोर आली आहे.

“सीक्रेट सर्व्हिस आणि लष्कराने मला दुसऱ्या विमानाने जाण्यास सांगितले. मला त्यांचे म्हणणे मानावे लागते,” असे ट्रम्प यांनी मंगळवारी पत्रकारांशी बोलताना सांगितले.

एअर फोर्स वनमध्ये बसले, पण गुपचूप विमान बदलले

८ जुलै रोजी अंकारा विमानतळावर ट्रम्प एअर फोर्स वनमध्ये चढताना कॅमेऱ्यांमध्ये कैद झाले होते. मात्र त्यानंतर घडलेला प्रकार अत्यंत गुप्त ठेवण्यात आला. अहवालानुसार, ट्रम्प यांना विमानाच्या दुसऱ्या बाजूला उभ्या केलेल्या केटरिंग ट्रकच्या मदतीने गुपचूप खाली उतरवण्यात आले. त्यानंतर त्यांना लष्कराच्या C-32A या छोट्या विमानात नेण्यात आले.

हे विमान उपराष्ट्रपतींच्या प्रवासासाठीही वापरले जाते. संरक्षणमंत्री पीट हेगसेथ यांनीही स्वतंत्रपणे या विमानात प्रवेश केला. संपूर्ण कारवाई अशा पद्धतीने करण्यात आली की राष्ट्राध्यक्ष अद्याप एअर फोर्स वनमध्येच असल्याचा भास निर्माण व्हावा.

पत्रकारांना ठेवण्यात आलं अंधारात

ट्रम्प यांच्यासोबत प्रवास करणारे पत्रकार आणि व्हाइट हाऊसचे काही कर्मचारी यांना या विमान बदलाची कोणतीही माहिती देण्यात आली नव्हती. त्यांना एअर फोर्स वनमध्येच ठेवण्यात आले आणि विमानाच्या खिडक्यांचे पडदे खाली ठेवण्यास सांगण्यात आले.

व्हाइट हाऊस कॉरेस्पॉन्डंट्स असोसिएशनच्या अहवालानुसार, पत्रकारांना खिडकीचे पडदे खाली ठेवण्याच्या सूचना संशयास्पद वाटल्या. एका छायाचित्रकाराने खिडकीचा पडदा थोडा उघडला असता तो तातडीने पुन्हा बंद करण्यास सांगण्यात आला.

ट्रम्प यांना घेऊन जाणाऱ्या C-32A विमानाने ‘Reach 18’ हा कॉल साइन वापरला, तर पत्रकार असलेल्या विमानाने ‘AF1’ हा कॉल साइन कायम ठेवला. यामुळे राष्ट्राध्यक्ष एअर फोर्स वनमध्येच असल्याचा आभास कायम ठेवण्यात आला.

वरळीत फडणवीसांचा मोठा दावा, नेमकं काय म्हणाले? ‘भारताला महासत्ता…’

इराणकडून क्षेपणास्त्र हल्ल्याचा धोका?

अमेरिकेने इराणकडून विमानावर क्षेपणास्त्र हल्ला होण्याचा विश्वासार्ह धोका ओळखल्याचे अधिकाऱ्यांनी अमेरिकेतील माध्यमांना सांगितले. मात्र, ट्रम्प यांनी या धोक्याबाबत फारशी माहिती विचारली नसल्याचे म्हटले.

“बहुधा धोका होता. मी त्याबद्दल फार काही विचारले नाही. मला अनेक धमक्या मिळतात,” असे ट्रम्प म्हणाले. “माझ्या जीवाला असलेल्या अनेक धमक्यांबद्दल तुम्हाला माहितीही नसते,” असेही त्यांनी स्पष्ट केले.

यापूर्वी ट्रम्प यांनी नाटो शिखर परिषदेदरम्यान आपण इराणचे ‘नंबर वन टार्गेट’ असल्याचा दावा केला होता.

जुन्या एअर फोर्स वनने प्रवास करण्याचा निर्णय

ट्रम्प तुर्कीला कतारने अमेरिकेला दिलेल्या नव्या बोईंग 747-8 विमानातून पोहोचले होते. मात्र, परतीच्या प्रवासासाठी त्यांनी “जुन्या एअर फोर्स वनमधून प्रवास करण्याची इच्छा” व्यक्त केली होती.

विमान बदलल्यानंतर ट्रम्प C-32A मधून ब्रिटनला गेले. त्यानंतर ते पुन्हा जुन्या एअर फोर्स वनमध्ये बसले आणि अमेरिकेत परतले. पुढे वॉशिंग्टनला जाण्यासाठी त्यांनी कतारकडून मिळालेल्या नव्या विमानाचा वापर केला.

या संपूर्ण गुप्त विमान बदलामुळे पत्रकारांच्या सुरक्षेबाबतही प्रश्न उपस्थित झाले आहेत. पत्रकारांच्या सुरक्षेची जबाबदारी प्रशासनाची असून, त्यांना अनावश्यक धोक्यात टाकले जाऊ नये, अशी भूमिका कमिटी टू प्रोटेक्ट जर्नलिस्ट्सने व्यक्त केली आहे.