२१ लाख शेतकऱ्यांच्या खात्यात १९ हजार कोटी जमा; दिवाळी शेतकऱ्यांसोबत साजरी करणार, फडणवीसांची मोठी घोषणा

By, wankhadepravin - November 4, 2026 07:00:24

0

विशेष प्रतिनिधी

मुंबई : दिवाळीपूर्वी शेतकऱ्यांना आर्थिक दिलासा देण्यासाठी राज्य सरकारने जाहीर केलेल्या पाच हजार रुपयांच्या अग्रीम मदतीचे वितरण वेगाने सुरू आहे. आतापर्यंत राज्यातील ७३ लाख शेतकऱ्यांच्या बँक खात्यांमध्ये ही रक्कम जमा झाली असून, येत्या दोन दिवसांत जवळपास ९५ टक्के शेतकऱ्यांपर्यंत मदत पोहोचेल, अशी माहिती मुख्यमंत्री देवेंद्र फडणवीस यांनी दिली.

राज्यातील दुष्काळसदृश परिस्थितीच्या पार्श्वभूमीवर शेतकऱ्यांना आर्थिक आधार देण्यासाठी राज्य सरकारने केंद्र सरकारच्या मदतीची वाट न पाहता पाच हजार रुपयांची अग्रीम मदत देण्याचा निर्णय घेतला होता. ही रक्कम दिवाळीपूर्वी शेतकऱ्यांच्या खात्यात जमा करण्याची घोषणा मुख्यमंत्र्यांनी केली होती. त्यानुसार मदतीचे वितरण सुरू असून, बहुतांश शेतकऱ्यांना पुढील दोन दिवसांत पैसे मिळणार आहेत.

गोकुळमध्ये मागच्या दाराने 8 संचालक वाढवण्याचा प्रयत्न? चंद्रकांतदादांचं मुख्यमंत्र्यांना पत्र व्हायरल; कोल्हापुरात खळबळ!

खात्यांमधील तांत्रिक अडचणींमुळे काही शेतकरी प्रतीक्षेत!

मुख्यमंत्री फडणवीस यांनी सांगितले की, आतापर्यंत ७३ लाख शेतकऱ्यांच्या खात्यांमध्ये पाच हजार रुपयांची मदत जमा झाली आहे. पुढील दोन दिवसांत जवळपास ९५ टक्के शेतकऱ्यांच्या खात्यांमध्ये पैसे पोहोचतील. उर्वरित काही शेतकऱ्यांच्या बाबतीत बँक खात्यांशी संबंधित तांत्रिक अडचणी असू शकतात. त्यामुळे पाच टक्क्यांपर्यंत शेतकऱ्यांना मदत मिळण्यास विलंब होण्याची शक्यता असल्याचेही त्यांनी स्पष्ट केले.

मराठवाड्यातील २.७६ लाख शेतकऱ्यांना कर्जमाफीचा लाभ

दरम्यान, पुण्यश्लोक अहिल्यादेवी होळकर कर्जमाफी योजनेअंतर्गतही राज्य सरकारने मोठी रक्कम शेतकऱ्यांच्या खात्यात जमा केली आहे. आज पुन्हा ४ लाख ८६ हजार शेतकऱ्यांच्या खात्यांमध्ये एकूण ४ हजार ७६४ कोटी रुपये जमा करण्यात आल्याची माहिती फडणवीस यांनी दिली.

विशेष म्हणजे, या कर्जमाफीचा सर्वाधिक लाभ मराठवाड्यातील शेतकऱ्यांना मिळाला आहे. मराठवाड्यातील जवळपास २ लाख ७६ हजार शेतकऱ्यांच्या खात्यांमध्ये कर्जमाफीची रक्कम जमा करण्यात आली आहे.

त्यामुळे एकीकडे दुष्काळी परिस्थितीत पाच हजार रुपयांची अग्रीम मदत, तर दुसरीकडे कर्जमाफीच्या माध्यमातून शेतकऱ्यांना दिलासा देण्याचा सरकारचा प्रयत्न सुरू आहे. दिवाळीपूर्वी उर्वरित पात्र शेतकऱ्यांच्या खात्यांत मदत जमा होणार असल्याने शेतकऱ्यांचे लक्ष आता पुढील दोन दिवसांच्या प्रक्रियेकडे लागले आहे.