प्रातिनिधिक संसदेत तरी PM व्हा, बिचाऱ्या सोनियाजींच्या मनाला शांती लाभेल!; खऱ्या संसदेत तर स्वप्नही पूर्ण होणार नाही; अमित शहांचा राहुल गांधींवर प्रहार

By, wankhadepravin - November 3, 2026 11:30:37

0

विशेष प्रतिनिधी

हैदराबाद: “दिल्लीत विरोधकांनी भरवलेली तथाकथित ‘प्रातिनिधिक संसद’ ही केवळ एक बनावट नौटंकी आहे. राहुल गांधींनी जर मला विचारले असते, तर मी त्यांना थेट सल्ला दिला असता की, बाबा रे, त्या बनावट संसदेतच स्वतःला एकदाचे पंतप्रधान घोषित करून घे; किमान सोनियाजींच्या मनाला तरी तेवढीच शांती लाभेल! कारण देशाच्या खऱ्याखुऱ्या संसदेत राहुल गांधी कधीही पंतप्रधान होऊ शकणार नाहीत, हे सूर्यप्रकाशाइतके स्वच्छ आहे,” अशा अत्यंत बोचऱ्या आणि खोचक शब्दांत केंद्रीय गृहमंत्री अमित शाह यांनी काँग्रेस नेते राहुल गांधी यांचा जाहीर पंचनामा केला. Amit Shah

हैदराबाद येथे भाजपच्या वतीने आयोजित करण्यात आलेल्या विराट ‘लोकशाही बचाओ, अराजकता हटाओ’ महामोर्चाच्या सभेत अमित शाह बोलत होते. विरोधकांकडून मतदार यादीच्या विशेष सखोल पुनरीक्षणाला (SIR) केला जाणारा विरोध, ईव्हीएमवर उपस्थित केले जाणारे संशय आणि घुसखोरांच्या मुद्द्यांवरून अमित शाह यांनी काँग्रेस आणि ‘इंडी’ आघाडीच्या दुटप्पी राजकारणाची लक्तरे वेशीवर टांगली. देशभरात २२ ऑक्टोबर ते ५ नोव्हेंबर २०२६ या कालावधीत भाजपच्या या देशव्यापी मोहिमेचा पहिला टप्पा राबवला जात असून, या अंतर्गत विरोधकांच्या खोट्या नरेटिव्हचा पर्दाफाश केला जात आहे.

गोकुळमध्ये मागच्या दाराने 8 संचालक वाढवण्याचा प्रयत्न? चंद्रकांतदादांचं मुख्यमंत्र्यांना पत्र व्हायरल; कोल्हापुरात खळबळ!

अमित शाह यांच्या भाषणातील ठळक मुद्दे…

“३ कोटी बांगलादेशी घुसखोर ही काँग्रेसची व्होट बँक; शेवटच्या घुसखोराला हुसकावून लावल्याशिवाय स्वस्थ बसणार नाही!”
“काँग्रेस पक्ष आणि राहुल गांधी मतदार यादीच्या शुद्धीकरणासाठी सुरू असलेल्या ‘SIR’ प्रक्रियेला इतका कडाडून विरोध का करत आहेत? कारण देशातील तब्बल ३ कोटी बांगलादेशी घुसखोरांची नावे ही काँग्रेसची हक्काची व्होट बँक आहेत. या घुसखोरांच्या जिवावर काँग्रेसला सत्ता हवी आहे.”
“राहुल गांधींनी कितीही आरडाओरड केली तरी देशातून आणि मतदार यादीतून शेवटच्या घुसखोराचे नाव हटवून त्यांना बाहेर काढल्याशिवाय भाजप सरकार स्वस्थ बसणार नाही.”
“२०१४ आणि २०१९ च्या विजयात SIR होते का?; नाचता येईना अंगण वाकडे!”
“राहुल गांधींचा आरोप आहे की भाजप ‘SIR’ प्रक्रियेमुळे निवडणुका जिंकत आहे. मला काँग्रेसला विचारायचे आहे की, २०१४ मध्ये आम्ही पूर्ण बहुमताने जिंकलो तेव्हा SIR होते का? २०१९ च्या ऐतिहासिक विजयात SIR होते का? आम्ही २०२४ ची लोकसभा जिंकली आणि त्यानंतर महाराष्ट्र, हरियाणा, दिल्ली, बिहार, पश्चिम बंगाल आणि आसाममध्ये विजय मिळवला. आता याच ताकदीवर आम्ही तेलंगणासुद्धा जिंकून दाखवू.”
“जेव्हा काँग्रेस जिंकते, तेव्हा जनतेने कौल दिला; आणि जेव्हा दारुण पराभव होतो, तेव्हा ईव्हीएम आणि निवडणूक आयोगाने हरवले, असा कांगावा केला जातो. मग सांगा, जर ईव्हीएम सदोष होते तर तेलंगणात रेवंत रेड्डी कसे जिंकले? केरळ आणि हिमाचल प्रदेशात तुमची सरकारे कशी आली? काँग्रेसची अवस्था ‘नाचता येईना अंगण वाकडे’ अशी झाली आहे.”
प्रातिनिधिक संसदेत स्वतःला पंतप्रधान घोषित करा; खऱ्या संसदेत जनता पाय ठेवू देणार नाही
“दोन दिवसांपूर्वी राहुल गांधींनी दिल्लीत प्रातिनिधिक संसदेचा देखावा उभा केला. खऱ्या संसदेत देशातील १४० कोटी जनता तुम्हाला कधीही पंतप्रधानपदी बसू देणार नाही. त्यामुळे आईच्या समाधानासाठी त्या बनावट संसदेतच पंतप्रधानपदाची शपथ घेऊन सोनियाजींच्या जिवाला शांती द्या,” असा तिखट टोला शाहांनी लगावला.
हातात संविधान, पण आदर शून्य; निवडणुका संपताच बँकॉक आणि परदेश दौरे!
“राहुल गांधी देशात काम करत नाहीत. निवडणुका संपल्या की ते थेट परदेशात निघून जातात. हातात केवळ संविधानाचे लाल पुस्तक घेऊन फिरतात, पण प्रत्यक्ष संविधानाचा आणि लोकशाही संस्थांचा त्यांना काडीचाही आदर नाही.”
“जर विरोधकांमध्ये हिंमत असेल, तर आम्ही ईव्हीएम, एसआयआर आणि घुसखोरांच्या मुद्द्यावर संसदेचे विशेष अधिवेशन बोलावण्यास तयार आहोत. समोरासमोर येऊन चर्चा करा; मात्र पळपुटे विरोधक चर्चेला येणार नाहीत. त्यांना फक्त रस्त्यावर अराजकता पसरवून स्वतःला चर्चेत ठेवायचे आहे.”
१० वर्षांत १२ लाख कोटींचे घोटाळे करणाऱ्यांच्या हाती देश पुन्हा कसा सोपवायचा?
“काँग्रेसने देशावर सलग १० वर्षे राज्य करताना तब्बल १२ लाख कोटी रुपयांचे महाघोटाळे केले. देशाची तिजोरी लुटणाऱ्या या भ्रष्टाचाऱ्यांच्या हातात देश पुन्हा कसा सोपवता येईल?”
“पंतप्रधान नरेंद्र मोदी गेल्या १२ वर्षांपासून अविरतपणे देशसेवा करत आहेत. त्यांच्यावर विरोधक चार आण्याच्या (२५ पैशांच्या) भ्रष्टाचाराचाही आरोप करू शकलेले नाहीत. मोदीजींच्या दूरदृष्टी आणि त्यागाची बरोबरी राहुल गांधी कधीच करू शकत नाहीत.”

भाजपच्या देशव्यापी ‘लोकशाही बचाओ’ मोहीम, 4 कारणे

1. ‘SIR’ प्रक्रियेचे सत्य जनतेपर्यंत नेणे: निवडणूक आयोगाच्या मतदार यादी विशेष सखोल पुनरीक्षणाचा (SIR) उद्देश केवळ मतदार यादी शुद्ध करणे आणि खऱ्या, पात्र भारतीय नागरिकांना मतदानाचा हक्क अबाधित ठेवणे हा आहे, हे जनतेला पटवून देणे.

2. ‘मतचोरी’च्या खोट्या नरेटिव्हला चोख प्रत्युत्तर: राहुल गांधी आणि विरोधी पक्ष मतदार यादीतील गोंधळाचे खोटे कारण पुढे करून स्वायत्त संस्थांवर जो अविश्वास दाखवत आहेत, त्या राजकीय अजेंड्याचा पर्दाफाश करणे.

3. घटनात्मक संस्थांची प्रतिष्ठा जपणे: सर्वोच्च न्यायालय आणि केंद्रीय निवडणूक आयोगासारख्या घटनात्मक संस्थांची विश्वासार्हता नष्ट करण्याचे आंतरराष्ट्रीय षडयंत्र हाणून पाडणे.

4. विरोधकांचा दुटप्पीपणा उघडा पाडणे: विरोधक स्वतः जिंकतात तेव्हा लोकशाही मानतात आणि हरले की संविधानाला धोका असल्याचा कांगावा करतात, हा दुटप्पी चेहरा जनतेसमोर आणणे.