ऑडिओ बॉम्बचा आणखी एक धमाका होणार?; मनोज जरांगेंचा विरोधकांना थेट इशारा

By, wankhadepravin - November 4, 2026 10:00:12

0

विशेष प्रतिनिधी

जालना : मराठा आरक्षणाच्या मुद्द्यावरून संघर्ष करणारे आंदोलनाचे नेते मनोज जरांगे पाटील यांनी पुन्हा एकदा राज्य सरकार, मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्याविरोधात आक्रमक पवित्रा घेतला आहे. “माझ्याकडे केवळ 4 ऑडिओ क्लिप्स नाहीत, तर अशा अनेक स्फोटक ऑडिओ क्लिप्सचा साठा आहे. मराठा समाजातीलच कार्यकर्ते आणि महिलांना पैसे पुरवून माझ्याविरोधात टोळ्या उभ्या करण्याचे षडयंत्र जर फडणवीस आणि शिंदेंनी तातडीने थांबवले नाही, तर मी योग्य वेळ आल्यावर सरकारचे वस्त्रहरण करणारे आणखी मोठे ऑडिओ बॉम्ब फोडणार,” असा थेट आणि खळबळजनक इशारा मनोज जरांगे पाटील यांनी दिला आहे. Manoj Jarange

एका वृत्तवाहिनीशी बोलताना जरांगे यांनी सत्ताधाऱ्यांवर गंभीर आरोपांची सरबत्ती केली असून, विरोध करणाऱ्या महिलांच्या बैठकांमध्ये थेट मुख्यमंत्री कार्यालयातील विशेष कार्य अधिकारी (OSD) सहभागी असल्याचा गंभीर दावाही त्यांनी केला.

माझ्याविरोधात महिलांची टोळी; बैठकीत थेट फडणवीसांचा OSD

गेल्या काही दिवसांपासून मराठा समाजातीलच काही चेहरे जरांगे यांच्या आंदोलनावर उघडपणे टीका करत आहेत. यावर भाष्य करताना जरांगे यांनी सत्ताधाऱ्यांवर कट रचल्याचा आरोप केला. “हे सर्व मुख्यमंत्र्यांच्या आणि उपमुख्यमंत्र्यांच्या इशाऱ्यावर सुरू आहे. पैसे देऊन मराठा समाजाचेच कार्यकर्ते आणि भगिनींना माझ्याविरोधात बोलण्यासाठी पुढे केले जात आहे. समाजा-समाजात आणि मराठ्यांमध्येच फूट पाडण्याचे हे अत्यंत गलिच्छ राजकारण आहे.”

फडणवीसांच्या OSD चा सहभाग?

“माझ्याविरोधात महिलांची एक विशेष टोळी तयार करण्यात आली आहे. येत्या बुधवारी पुन्हा अशीच एक बैठक बोलावण्यात आली असून, त्यामध्ये थेट देवेंद्र फडणवीस यांचा ओएसडी (OSD) सामील आहे. सत्ताधाऱ्यांना वाटते की आम्ही गरीब आहोत, पण आमच्या मनगटात किती ताकद आहे आणि मी कुठपर्यंत हात टाकू शकतो याचा अजून त्यांना अंदाज आलेला नाही.”

कुणबी नोंदींची शोधमोहीम ठप्प; 93 लाख नोंदी दिल्या तरी सरकारचा गेम सुरू!

कुणबी जातप्रमाणपत्रे आणि वंशावळीच्या नोंदी शोधण्याच्या सरकारी आश्वासनांवरून त्यांनी बळीराजा आणि मराठा समाजाला जागरूक राहण्याचे आवाहन केले. “सरकारने मराठा समाजाची कुणबी प्रमाणपत्रे देण्याची प्रक्रिया पूर्णपणे रोखून धरली आहे. सर्व जुन्या नोंदी थांबवल्या असून शोधमोहीमही जाणीवपूर्वक बंद पाडली आहे. आम्ही स्वतः अभ्यासकांच्या मदतीने 93 लाख नोंदी शोधून दिल्या, तरीही सरकार पुढे काहीही करायला तयार नाही.”

गोकुळमध्ये मागच्या दाराने 8 संचालक वाढवण्याचा प्रयत्न? चंद्रकांतदादांचं मुख्यमंत्र्यांना पत्र व्हायरल; कोल्हापुरात खळबळ!

हैदराबाद, सातारा गॅझेटिअर देणार नाहीत

“पश्चिम महाराष्ट्र आणि मराठवाड्यातील जनतेने आता तरी जागे व्हायला हवे. सरकार हैदराबाद, सातारा किंवा बॉम्बे गव्हर्नमेंटच्या गॅझेटिअरच्या आधारे हक्काचे आरक्षण देण्यास नकार देत आहे. तुमच्या हक्काचे हिरावून घेऊन सरकार मराठ्यांचा मोठा गेम करत आहे; अशा वेळी नेत्यांवरचे आंधळे प्रेम सोडून सत्याच्या पाठीशी उभे राहा,” असे आवाहन त्यांनी केले.

2029 च्या निवडणुकीत काहींची जिरवायची आहे!

मनोज जरांगे पाटील यांनी केवळ आरक्षणाचा प्रश्नच लावून धरला नाही, तर आगामी राजकीय समीकरणांवरही आपली नजर असल्याचे जाहीर केले. “आगामी 2029 च्या विधानसभा आणि लोकसभा निवडणुकांमध्ये मला काही विशिष्ट लोकांची कायमची जिरवायची आहे,” असे थेट वक्तव्य त्यांनी केले.

राजकीय वर्तुळात चर्चांना उधाण

जरांगे यांच्या या विधानामुळे त्यांचा रोख नेमका कोणत्या बड्या नेत्यांकडे आहे, याबाबत राजकीय वर्तुळात जोरदार चर्चा रंगली आहे. मराठा आरक्षणाच्या मुद्द्यावरून समाजाशी दगाफटका करणाऱ्या सर्व नेत्यांना आगामी काळात मतपेटीतून धडा शिकवण्याचा इशारा त्यांनी दिला.

वेळ आल्यावर एकामागून एक बॉम्ब पडणार!

आपल्याकडील पुराव्यांचा उल्लेख करताना मनोज जरांगे शेवटी म्हणाले, “ज्या ऑडिओ क्लिप्स बाहेर आल्या आहेत, ती केवळ सुरुवात आहे. माझ्याकडे अशा अनेक क्लिप्स आहेत ज्यामध्ये सरकारमधील लोकांचे कारनामे कैद आहेत.”

षडयंत्र थांबवा, अन्यथा परिणाम भोगा

“जर सरकारने मराठा कार्यकर्त्यांवर दबाव आणणे आणि त्यांना विकत घेण्याचे उद्योग बंद केले नाहीत, तर पुढील काही महिन्यांत मी जनतेच्या न्यायालयात हे सर्व ऑडिओ बॉम्ब फोडणार,” असा इशारा देऊन त्यांनी सत्ताधाऱ्यांची झोप उडवली आहे.