मतदार यादीबाबत निवडणूक आयोगाचा मोठा निर्णय; दावे-हरकतींसाठी आता २६ ऑक्टोबरपर्यंत मुदत

By, wankhadepravin - October 13, 2026 05:30:35

0

विशेष प्रतिनिधी

मुंबई : राज्यातील मतदार यादीच्या विशेष सखोल फेरतपासणी (SIR) प्रक्रियेंतर्गत प्रारूप मतदार यादीवरील दावे आणि हरकती दाखल करण्यासाठी निवडणूक आयोगाने मुदतवाढ दिली आहे. आता नागरिकांना २६ ऑक्टोबर २०२६ पर्यंत दावे आणि हरकती सादर करता येणार आहेत. मात्र, अंतिम मतदार यादी प्रसिद्ध करण्याच्या तारखेत बदल करण्यात आलेला नसून, ती १६ नोव्हेंबर २०२६ रोजीच प्रसिद्ध केली जाणार आहे. voter list

दावे-हरकतींसाठी पुन्हा मुदतवाढ

राज्यात १ ऑक्टोबर २०२६ या दिनांकाच्या आधारे मतदार यादी तयार करण्याची प्रक्रिया सुरू आहे. या प्रक्रियेअंतर्गत ३१ ऑगस्ट रोजी प्रारूप मतदार यादी प्रसिद्ध करण्यात आली होती. त्यानंतर या यादीतील नावे, नोंदी आणि तपशिलांबाबत नागरिकांना दावे व हरकती दाखल करण्याची संधी देण्यात आली.

मात्र, नागरिकांना आवश्यक कागदपत्रे सादर करण्यासाठी आणि मतदार यादीतील नोंदी तपासण्यासाठी अधिक वेळ मिळावा, यासाठी दावे व हरकती दाखल करण्याच्या मुदतीत पुन्हा वाढ करण्यात आली आहे. त्यानुसार, आता २६ ऑक्टोबरपर्यंत अर्ज सादर करता येणार आहेत.

‘मराठीला ज्ञानभाषा बनवणार’; AIपासून स्पेस टेक्नॉलॉजीपर्यंत फडणवीसांचा मोठा प्लॅन

१० नोव्हेंबरपर्यंत दावे-हरकतींचा निपटारा

निवडणूक आयोगाच्या सुधारित वेळापत्रकानुसार, दावे आणि हरकती दाखल करण्याचा कालावधी ३१ ऑगस्ट ते २६ ऑक्टोबर असा निश्चित करण्यात आला आहे. तर नोटीस देणे, सुनावणी आणि दावे-हरकती निकाली काढण्याची प्रक्रिया ३१ ऑगस्ट ते १० नोव्हेंबर या कालावधीत पूर्ण केली जाणार आहे.

या प्रक्रियेनंतर मतदार यादीतील आवश्यक दुरुस्त्या आणि बदल पूर्ण करून अंतिम यादी प्रसिद्ध केली जाईल.

अंतिम मतदार यादी १६ नोव्हेंबरला

दावे आणि हरकती दाखल करण्यासाठी मुदतवाढ देण्यात आली असली, तरी अंतिम मतदार यादीच्या तारखेत बदल झालेला नाही. सुधारित वेळापत्रकानुसार, अंतिम मतदार यादी १६ नोव्हेंबर २०२६ रोजी प्रसिद्ध होणार आहे.

त्यामुळे प्रारूप मतदार यादीत नाव नसलेल्या नागरिकांनी, तसेच नाव, पत्ता किंवा इतर तपशिलांमध्ये दुरुस्ती आवश्यक असलेल्या मतदारांनी निर्धारित मुदतीत संबंधित निवडणूक यंत्रणेकडे संपर्क साधून आवश्यक प्रक्रिया पूर्ण करावी.