सर्वसामान्यांच्या खिशाला मोठी कात्री! राज्यात दूध प्रति लिटर 4 रुपयांनी महागले, दुग्धजन्य पदार्थांचेही दर 10 टक्क्यांनी वाढणार!

By, wankhadepravin - November 14, 2026 01:00:16

0

विशेष प्रतिनिधी

पुणे: जीवनावश्यक वस्तूंच्या वाढत्या महागाईने आधीच मेटाकुटीला आलेल्या सर्वसामान्य नागरिकांना आता आणखी एक मोठा आर्थिक धक्का बसणार आहे. राज्यातील दूध उत्पादक व व्यावसायिक कल्याणकारी संघाच्या पुण्यात पार पडलेल्या महत्त्वाच्या बैठकीत गाय आणि म्हशीच्या दुधाच्या दरात प्रति लिटर 4 रुपयांची वाढ करण्याचा निर्णय घेण्यात आला आहे.

यासोबतच पनीर, तूप, दही, ताक आणि श्रीखंड यांसारख्या दुग्धजन्य पदार्थांच्या दरातही सुमारे 10 टक्के वाढ करण्याचे ठरवण्यात आले आहे. विशेष म्हणजे, अमूल आणि मदर डेअरी या राष्ट्रीय ब्रँड्सनी आधीच दरवाढ लागू केली असून, आता कोल्हापूरच्या गोकुळ दूध संघानेही दूध दरवाढीचे स्पष्ट संकेत दिले आहेत.

कात्रज डेअरीतील बैठकीत 45 दूध ब्रँड प्रतिनिधींचा एकमताने निर्णय

पुण्यातील कात्रज डेअरीच्या मुख्य कार्यालयात राज्यातील 45 सहकारी आणि खासगी दूध ब्रँडच्या प्रतिनिधींची संयुक्त बैठक पार पडली. या बैठकीत दूध संकलन, प्रक्रिया आणि वितरणावर होणाऱ्या वाढत्या खर्चाचा सविस्तर आढावा घेण्यात आला. त्यानंतर गाय आणि म्हशीच्या दुधाच्या विक्री दरात प्रति लिटर 4 रुपयांची वाढ करण्यावर एकमताने शिक्कामोर्तब करण्यात आले. डिझेल आणि साखरेचे वाढलेले दर, परराज्यातील दूध ब्रँड्सची वाढती स्पर्धा आणि डीलर रेट्सचा ताळमेळ बसवण्यासाठी ही दरवाढ अपरिहार्य असल्याचे दूध उत्पादक व व्यावसायिक कल्याणकारी संघाकडून स्पष्ट करण्यात आले आहे.

अमूल आणि मदर डेअरीनंतर आता गोकुळचेही दर वाढणार

देशातील आघाडीचे दूध ब्रँड असलेल्या अमूलने 12 नोव्हेंबरपासून आपल्या दुधाच्या दरात प्रति लिटर 2 ते 4 रुपयांची वाढ लागू केली आहे. यामध्ये अमूलचे ताजा टोन्ड दूध 2 रुपयांनी, तर अमूल गोल्ड 4 रुपयांनी महागले आहे. त्याच धर्तीवर मदर डेअरीनेही आपल्या दुधाच्या दरांमध्ये 2 ते 4 रुपयांची वाढ केली आहे. या पाठोपाठ आता कोल्हापूर जिल्हा सहकारी दूध उत्पादक संघ म्हणजेच गोकुळनेही दरवाढीच्या हालचाली सुरू केल्या आहेत. गोकुळचे नवनियुक्त चेअरमन राजेश पाटील यांनी तसे स्पष्ट संकेत दिले असून, शनिवारी होणाऱ्या नव्या संचालक मंडळाच्या पहिल्याच बैठकीत गोकुळ दूध दरवाढीचा अंतिम निर्णय होण्याची दाट शक्यता आहे.

चारा, पशुखाद्य आणि वाहतूक खर्चामुळे दरवाढ अटळ

सध्या देशभरात वाढलेली महागाई आणि इंधनाचे चढे दर हे या दूध दरवाढीमागील प्रमुख कारण मानले जात आहे. ग्रामीण भागात हिरवा आणि सुका चारा तसेच पशुखाद्याच्या किमती मोठ्या प्रमाणात वाढल्यामुळे दूध उत्पादक शेतकऱ्यांचा उत्पादन खर्च वाढला आहे. दुसरीकडे पॅकेजिंग साहित्य, शीतकरण प्रक्रिया आणि डिझेल दरवाढीमुळे मालवाहतुकीचा खर्चही आवाक्याबाहेर गेला आहे. त्यामुळे दूध उत्पादक शेतकरी आणि दूध संघांना आर्थिक नुकसान सोसावे लागू नये, यासाठी ही दरवाढ करण्याचा निर्णय घेण्यात आला आहे. मात्र, ऐन महागाईच्या काळात दूध आणि दुग्धजन्य पदार्थ महागल्याने सर्वसामान्य गृहिणींचे मासिक बजेट पूर्णपणे कोलमडणार आहे.