नोलन, टॉम हॉलंड यांनी चहा घेतलेल्या ऑलिम्पिया कॉफी हाऊसवर FDA ची कारवाई; परवाना निलंबित

By, wankhadepravin - September 18, 2026 07:30:33

0

विशेष प्रतिनिधी

मुंबई : हॉलिवूड दिग्दर्शक ख्रिस्तोफर नोलन, अभिनेते टॉम हॉलंड आणि मॅट डेमन यांनी भेट दिलेल्या कुलाब्यातील १०८ वर्षे जुन्या ऑलिम्पिया कॉफी हाऊसवर अन्न व औषध प्रशासनाने (FDA) मोठी कारवाई केली आहे. अन्नसुरक्षा आणि स्वच्छतेशी संबंधित गंभीर त्रुटी आढळल्यानंतर या प्रसिद्ध कॉफी हाऊसचा अन्न परवाना तात्काळ निलंबित करण्यात आला आहे.

‘द ओडिसी’ चित्रपटाच्या मुंबई प्रीमियरपूर्वी जुलै महिन्यात नोलन, टॉम हॉलंड आणि मॅट डेमन यांनी ऑलिम्पिया कॉफी हाऊसमध्ये चहा आणि बन मस्काचा आस्वाद घेतला होता. त्यामुळे या कारवाईनंतर प्रसिद्ध कॉफी हाऊस पुन्हा चर्चेत आले आहे.

ग्राहकाच्या तक्रारीनंतर १६ सप्टेंबरला तपासणी

एका ग्राहकाच्या तक्रारीनंतर FDA च्या पथकाने १६ सप्टेंबर रोजी ऑलिम्पिया कॉफी हाऊसची तपासणी केली. या तपासणीत अन्नसाठवणुकीच्या जागेलगत शौचालय, स्वयंपाकघर आणि स्टोअररूममध्ये झुरळे व माशांचा वावर, तसेच अस्वच्छ परिस्थिती आढळल्याचे अधिकाऱ्यांनी नमूद केले.

रेफ्रिजरेटरमध्ये कच्च्या मांसाचे रक्त सांडलेले होते. काही खाद्यपदार्थ थेट जमिनीवर ठेवण्यात आले होते. स्वयंपाक आणि भांडी धुण्याच्या जागेत अस्वच्छ पाणी साचल्याचेही तपासणीत समोर आले.

शाकाहारी-मांसाहारी पदार्थांची अयोग्य साठवणूक

तपासणीदरम्यान शाकाहारी आणि मांसाहारी खाद्यपदार्थ योग्य पद्धतीने वेगळे साठवले जात नसल्याचे आढळले. भाजीपाला आणि मांस कापण्यासाठी जीर्ण लाकडी फळ्यांचा वापर होत असल्याचेही FDA पथकाच्या निदर्शनास आले.

स्वयंपाक आणि खाद्यपदार्थ सेवा देणाऱ्या कर्मचाऱ्यांकडे आवश्यक संरक्षक साधने नसल्याचेही नमूद करण्यात आले. या त्रुटींमुळे अन्नसुरक्षा नियमांचे पालन होत नसल्याचा निष्कर्ष काढण्यात आला.

३५ पैकी ३४ कर्मचाऱ्यांना प्रशिक्षणाचा अभाव

ऑलिम्पिया कॉफी हाऊसमधील ३५ कर्मचाऱ्यांपैकी ३४ कर्मचाऱ्यांना अन्नसुरक्षेबाबत मूलभूत प्रशिक्षण मिळालेले नसल्याचे तपासणीत आढळले. याशिवाय पाण्याच्या गुणवत्तेच्या तपासणीचे अहवाल, स्वच्छता आणि आरोग्याशी संबंधित आवश्यक नोंदी उपलब्ध नसल्याचेही समोर आले.

या सर्व त्रुटींची गंभीर दखल घेत FDA ने अन्नसुरक्षा आणि मानके कायदा, २००६ अंतर्गत कॉफी हाऊसचा परवाना निलंबित केला आहे.

एसटीच्या १२५ बसस्थानकांवर उभारणार ‘हिरकणी कक्ष’; स्तनदा मातांसाठी सुरक्षित आणि खासगी सुविधा

परवाना निलंबित; अन्नविक्रीवर बंदी

परवाना निलंबित असलेल्या कालावधीत ऑलिम्पिया कॉफी हाऊसमध्ये अन्नपदार्थ खरेदी करणे, तयार करणे, साठवणे, विक्री करणे किंवा वितरण करण्यास बंदी राहणार आहे.

आस्थापनाने तपासणीत आढळलेल्या सर्व त्रुटी दूर करणे आवश्यक आहे. त्यानंतर पुनर्तपासणीमध्ये परिस्थिती समाधानकारक आढळल्यासच रेस्टॉरंट पुन्हा सुरू करण्याबाबत निर्णय घेतला जाणार आहे.

नायर हॉस्पिटलच्या कॅन्टीनवरही कारवाई

FDA ने नायर हॉस्पिटलच्या कॅन्टीनवरही कारवाई केली आहे. रुग्ण आणि अभ्यागतांच्या आरोग्याला धोका निर्माण होऊ शकतील अशा अन्नसुरक्षा व स्वच्छतेशी संबंधित त्रुटी आढळल्याने कॅन्टीनचा परवानाही तात्काळ निलंबित करण्यात आला.

याशिवाय चेंबूरमधील ब्लिंक कॉमर्स प्रायव्हेट लिमिटेड, घाटकोपर पश्चिम येथील विश्वास स्वीट्स अँड स्नॅक्स आणि ए-१ जनरल अँड ड्राय फ्रूट्स, वरळीतील मिलन पंजाब आणि मालाड पूर्व येथील सद्गुरू स्वीट्स यांच्यावरही कारवाई करण्यात आल्याचे वृत्त आहे.

‘सुरक्षित अन्न, सुरक्षित महाराष्ट्र’ मोहिमेअंतर्गत कारवाई

FDA आयुक्त तुकाराम मुंढे यांच्या नेतृत्वाखाली राबविण्यात येत असलेल्या ‘सुरक्षित अन्न, सुरक्षित महाराष्ट्र’ मोहिमेअंतर्गत ही कारवाई करण्यात आली. राज्यभरातील खाद्यपदार्थ विक्री केंद्रे, रेस्टॉरंट्स आणि इतर आस्थापनांमध्ये अन्नसुरक्षा नियमांचे पालन होते की नाही, याची तपासणी केली जात आहे.

या मोहिमेत २७ आस्थापनांची तपासणी करण्यात आली असून, त्रुटी दूर करण्यासाठी १३ आस्थापनांना नोटिसा बजावण्यात आल्या आहेत. राज्यव्यापी कारवाईत ७.३८ लाख रुपये किमतीचे २,८१३ किलो दूध व दुग्धजन्य पदार्थ, ४.६६ लाख रुपये किमतीचा इतर निकृष्ट दर्जाचा माल आणि १२.५ लिटर ताडी जप्त करण्यात आल्याचे सांगण्यात आले आहे.

प्रसिद्ध आस्थापनांवर FDA चा कडक बडगा

मुंबईतील जुन्या आणि प्रसिद्ध खाद्य आस्थापनांवर FDA कडून कारवाई सुरू आहे. ग्राहकांच्या आरोग्याशी संबंधित नियमांचे उल्लंघन आढळल्यास आस्थापनाची प्रतिष्ठा किंवा इतिहास न पाहता कारवाई केली जात असल्याचे या मोहिमेतून दिसून येत आहे. ऑलिम्पिया कॉफी हाऊसवरील कारवाईनंतर खाद्यव्यवसायिकांकडून स्वच्छता आणि अन्नसुरक्षा नियमांचे पालन करण्यावर पुन्हा एकदा प्रश्न उपस्थित झाले आहेत.