विशेष प्रतिनिधी
गडचिरोली: ‘धरती आबा’ भगवान बिरसा मुंडा यांच्या 151 व्या जयंतीनिमित्त गडचिरोली येथे ‘जनजातीय गौरव दिवस – राष्ट्रीय आदिवासी सांस्कृतिक महोत्सवा’चा भव्य उद्घाटन सोहळा आज पार पडला. या कार्यक्रमात बोलताना मुख्यमंत्री देवेंद्र फडणवीस यांनी सांगितले की, एकेकाळी नक्षलवाद आणि माओवादाशी लढणारा गडचिरोली जिल्हा आता 100 टक्के माओवादातून मुक्त झाला असून देशाची नवी ‘स्टील सिटी’ म्हणून पुढे येत आहे आणि या विकासाच्या प्रवासात आदिवासी समाज सर्वात पुढे आहे. या वेळी उपमुख्यमंत्री एकनाथ शिंदे यांनीही भगवान बिरसा मुंडा यांच्या कार्याला अभिवादन करत गडचिरोली हा आता शेवटचा जिल्हा नसून विकासाचा पहिला जिल्हा ठरेल, असा विश्वास व्यक्त केला.
आदिवासी नायकांचा दडपलेला इतिहास पंतप्रधान मोदींमुळे जगासमोर आला: देवेंद्र फडणवीस
संपूर्ण देशात साजरा होणाऱ्या या मुख्य राष्ट्रीय कार्यक्रमाचे यजमानपद गडचिरोलीला मिळाल्याबद्दल मुख्यमंत्री देवेंद्र फडणवीस यांनी पंतप्रधान नरेंद्र मोदी यांचे आभार मानले. मुख्यमंत्र्यांच्या म्हणण्यानुसार, जनजातीय आणि आदिवासी समाजाला एक मोठा इतिहास व समृद्ध संस्कृती लाभली आहे. ज्या-ज्या वेळी देशावर परकीय हल्ले झाले, त्या वेळी लढण्यासाठी आदिवासी नायक नेहमीच पुढे राहिले; मात्र आपल्याला शिकवण्यात आलेल्या इतिहासातून त्यांचे हे योगदान जाणीवपूर्वक वगळण्यात आले होते. नरेंद्र मोदी पंतप्रधान झाल्यानंतर त्यांनी आदिवासी नायकांचे हे महान कार्य जगासमोर आणण्याचा निश्चय केला आणि त्यामुळेच आज हा खरा इतिहास जनतेसमोर येत आहे, असे प्रतिपादन फडणवीस यांनी केले.
जल, जंगल आणि जमिनीच्या हक्कासाठी बिरसा मुंडांचा संघर्ष आणि कल्याणकारी योजना
इंग्रज राजवटीतील संघर्षाची आठवण करून देताना देवेंद्र फडणवीस म्हणाले की, ब्रिटिशांनी सावकारांना हाताशी धरून आदिवासी बांधवांना पाणी, जंगल आणि जमिनीच्या हक्कापासून वंचित ठेवण्याचा प्रयत्न केला होता. त्या काळात भगवान बिरसा मुंडा यांनी इंग्रजांविरोधात प्रखर लढा देऊन आदिवासी बांधवांना त्यांचे हक्क पुन्हा मिळवून दिले. आज पंतप्रधान मोदींच्या नेतृत्वाखाली ‘धरती आबा’ आणि इतर अनेक कल्याणकारी योजनांच्या माध्यमातून आदिवासी समाजाच्या प्रगतीसाठी ठोस काम सुरू आहे. राज्य सरकारकडून आदिवासी विद्यार्थ्यांसाठी उत्तम शिक्षण आणि निवासाची सोय उपलब्ध करून दिली जात असून गडचिरोलीच्या औद्योगिक विकासामुळे स्थानिकांना मोठी संधी मिळत असल्याचे मुख्यमंत्र्यांनी स्पष्ट केले.
बिरसा मुंडा म्हणजेच आदिवासींचा स्वाभिमान; गडचिरोली ठरणार विकासाचा पहिला जिल्हा: एकनाथ शिंदे
या सोहळ्यात उपमुख्यमंत्री एकनाथ शिंदे यांनी भगवान बिरसा मुंडा यांना अभिवादन करत राज्यातील जनतेला जनजातीय गौरव दिवसाच्या शुभेच्छा दिल्या. लुबाडणूक आणि फसवणुकीविरोधात मोठा संघर्ष उभारणारे भगवान बिरसा मुंडा हे आदिवासी समाजाचा स्वाभिमान आहेत, असे शिंदे म्हणाले. आदिवासी बांधवांच्या विकासात अडथळा ठरणाऱ्या नक्षलवादाचा बिमोड पंतप्रधान नरेंद्र मोदी यांच्या नेतृत्वाखाली झाला आहे. त्यामुळे गडचिरोली हा आता महाराष्ट्राच्या किंवा देशाच्या नकाशावरील शेवटचा जिल्हा राहिलेला नसून तो विकासाचा पहिला जिल्हा ठरेल, असे सांगत या भागात आधुनिक पायाभूत सुविधांची कामे सरकारकडून वेगाने सुरू असल्याची माहिती एकनाथ शिंदे यांनी दिली.
महत्वाच्या बातम्या
To be published, comments must be reviewed by the administrator.*
Our website uses cookies to improve your experience. Learn more
Download App