वृत्तसंस्था
वॉशिंग्टन डीसी : Donald Trump अमेरिकेचे राष्ट्राध्यक्ष डोनाल्ड ट्रम्प यांच्या फोटोसह २५० डॉलरची विशेष नोट जारी करण्याचा प्रस्ताव अमेरिकेत चर्चेत आला आहे. अमेरिकेच्या स्वातंत्र्याच्या २५० व्या वर्षानिमित्त ही स्मरणिका नोट आणण्याची तयारी सुरू असल्याची माहिती समोर आली आहे.Donald Trump
अमेरिकेच्या ट्रेझरी विभागातील काही वरिष्ठ अधिकाऱ्यांनी या प्रस्तावावर प्राथमिक हालचाली सुरू केल्याचे वृत्त आहे. ट्रेझरी सचिव स्कॉट बेसेंट यांनीही सांगितले की, काँग्रेसने मंजुरी दिल्यास विभाग आवश्यक तयारीसाठी सज्ज आहे.Donald Trump
मात्र या प्रस्तावासमोर मोठा कायदेशीर अडथळा आहे. अमेरिकेच्या १८६६ सालच्या कायद्यानुसार जिवंत व्यक्तीचा फोटो अमेरिकन चलनावर छापता येत नाही. त्यामुळे ट्रम्प यांच्या फोटोसह नोट जारी करण्यासाठी काँग्रेसला कायद्यात बदल करावा लागेल.
रिपब्लिकन खासदार जो विल्सन यांनी या संदर्भात विधेयक मांडल्याची माहिती आहे. या प्रस्तावित नोटेवर ट्रम्प यांचा फोटो, स्वाक्षरी आणि अमेरिकेच्या २५० व्या वर्धापनदिनाचे चिन्ह असू शकते. काही प्रारूप डिझाइनही तयार करण्यात आल्याचे वृत्त आहे.
दरम्यान, या प्रस्तावामुळे अमेरिकेत मोठा राजकीय वाद निर्माण झाला आहे. विरोधकांनी याला “व्यक्तिपूजा” असल्याची टीका केली आहे. तर ट्रम्प समर्थकांच्या मते, अमेरिकेच्या २५० व्या वर्षानिमित्त अशा स्मरणिका नोटेला ऐतिहासिक महत्त्व असेल.
या संपूर्ण प्रकरणात आणखी एक महत्त्वाची बाब समोर आली आहे. अमेरिकन चलन मुद्रण विभागाच्या तत्कालीन संचालिका पॅट्रिशिया सोलिमेन यांनी या प्रस्तावावरील कायदेशीर आणि प्रशासकीय आक्षेप नोंदवल्यानंतर त्यांची बदली करण्यात आल्याचे वृत्त समोर आले आहे.
सध्या हा प्रस्ताव केवळ प्राथमिक चर्चेच्या टप्प्यात असून अंतिम निर्णय अमेरिकन काँग्रेसच्या मंजुरीवर अवलंबून आहे. त्यामुळे ट्रम्प यांच्या फोटोसह २५० डॉलरची नोट प्रत्यक्षात बाजारात येईल की नाही, याबाबत अजूनही अनिश्चितता कायम आहे.
महत्वाच्या बातम्या
To be published, comments must be reviewed by the administrator.*
Our website uses cookies to improve your experience. Learn more
Download App