Netanyahu : नेतान्याहूंचा मोठा आदेश; गाझाच्या ७०% भागावर ताबा मिळवण्याचे इस्रायली सैन्याला निर्देश

By, Pravin Wankhade - May 30, 2026 12:00:26

0

वृत्तसंस्था

तेल अवीव : Netanyahu इस्रायलचे पंतप्रधान बेंजामिन नेतन्याहू यांनी गाझा पट्टीवरील नियंत्रण आणखी वाढवण्याचे आदेश इस्रायली सैन्याला दिले आहेत. सध्या इस्रायलचा गाझाच्या सुमारे ६० टक्के भागावर ताबा असल्याचा दावा नेतान्याहू यांनी केला असून हा आकडा ७० टक्क्यांपर्यंत नेण्याचे निर्देश दिल्याचे त्यांनी जाहीर केले.Netanyahu

वेस्ट बँकमधील एका परिषदेत बोलताना नेतान्याहू म्हणाले की, “आम्ही हमासला पूर्णपणे दबावत आहोत. आधी ५० टक्के भागावर नियंत्रण होते, आता ते ६० टक्क्यांपर्यंत पोहोचले आहे आणि पुढील लक्ष्य ७० टक्के आहे.”Netanyahu

CM Devendra Fadnavis : अर्थखाते सुनेत्रा पवारांकडे जाणार? मुख्यमंत्री देवेंद्र फडणवीसांचे स्पष्ट विधान; चर्चांना दिला पूर्णविराम

या घोषणेमुळे इस्रायल-हमास युद्धातील तणाव पुन्हा वाढण्याची शक्यता व्यक्त केली जात आहे. कारण ऑक्टोबर २०२५ मध्ये अमेरिकेच्या मध्यस्थीने झालेल्या युद्धविराम करारानुसार इस्रायलला गाझाच्या सुमारे ५३ टक्के भागापुरतेच नियंत्रण मान्य करण्यात आले होते. मात्र त्यानंतर इस्रायली सैन्याने टप्प्याटप्प्याने आपला प्रभाव वाढवत ६० टक्क्यांहून अधिक भागावर नियंत्रण प्रस्थापित केल्याचा आरोप होत आहे.

आंतरराष्ट्रीय माध्यमांच्या अहवालानुसार, इस्रायलच्या या हालचालीमुळे गाझामधील लाखो पॅलेस्टिनी नागरिक अधिकच कमी जागेत अडकले आहेत. संयुक्त राष्ट्रांच्या अहवालातही गाझातील मानवी परिस्थिती गंभीर असल्याचे नमूद करण्यात आले आहे. पाणीटंचाई, अन्नसंकट, तात्पुरत्या निवाऱ्यांतील गर्दी आणि सततचे हवाई हल्ले यामुळे परिस्थिती आणखी बिकट होत असल्याचे सांगितले जात आहे.

दरम्यान, नेतान्याहू यांच्या या आदेशावरून आंतरराष्ट्रीय स्तरावर तीव्र प्रतिक्रिया उमटू लागल्या आहेत. अनेक मानवाधिकार संघटनांनी याला युद्धविराम कराराचे उल्लंघन म्हटले आहे. काही पाश्चिमात्य देशांनीही इस्रायलच्या वाढत्या लष्करी कारवाईबाबत चिंता व्यक्त केली आहे. विशेषतः जर्मनीसारख्या देशांनी इस्रायलच्या भूमिकेबाबत सावध भूमिका घेतल्याचे दिसून येत आहे.

गाझामधील युद्ध ऑक्टोबर २०२३ मध्ये हमासच्या हल्ल्यानंतर सुरू झाले होते. त्यानंतर इस्रायलने मोठ्या प्रमाणात लष्करी कारवाई केली. विविध आंतरराष्ट्रीय अहवालांनुसार, या संघर्षात आतापर्यंत हजारो नागरिकांचा मृत्यू झाला असून गाझातील मोठा भाग उद्ध्वस्त झाला आहे.