Trump : ट्रम्प यांची इराणवर सर्वात मोठा हल्ला करण्यापासून माघार; सल्लागारांचा इशारा, देशात इंटरसेप्टर क्षेपणास्त्रांची कमतरता

By, wankhadepravin - July 26, 2026 09:00:10

0

वृत्तसंस्था

वॉशिंग्टन डीसी : अमेरिकन राष्ट्राध्यक्ष डोनाल्ड ट्रम्प यांनी इराणवर सर्वात मोठा हल्ला करण्याच्या आपला निर्णय तूर्त स्थगित केला आहे. ‘द न्यूयॉर्क टाइम्स’च्या वृत्तानुसार, वरिष्ठ लष्करी अधिकाऱ्यांनी असा इशारा दिला होता की, मोठ्या प्रमाणावरील लष्करी कारवाईमुळे अमेरिकेच्या ‘पॅट्रियट इंटरसेप्टर’ क्षेपणास्त्रांचा साठा वेगाने संपू शकतो.

‘जॉइंट चीफ्स ऑफ स्टाफ’चे अध्यक्ष जनरल डॅन केन यांनी असा सल्ला दिला की, अशा मोठ्या मोहिमेमुळे मध्य पूर्वेत तैनात असलेल्या अमेरिकन आणि मित्र राष्ट्रांच्या सैनिकांची सुरक्षा धोक्यात येऊ शकते. या वृत्तात नमूद केले आहे की, एप्रिल महिन्याच्या अखेरीपर्यंत अमेरिकेने १,२०० हून अधिक ‘पॅट्रियट इंटरसेप्टर’ क्षेपणास्त्रांचा वापर केला होता.

तरीही ट्रम्प यांनी म्हटले आहे की, गरज भासल्यास आपल्यापुढे सर्व पर्याय खुले आहेत. सध्या लष्करी कारवाईऐवजी, अमेरिकेने व्यावसायिक बाबक झंजानी यांच्या नेटवर्कशी संबंधित चार व्यक्ती आणि नऊ कंपन्यांवर नवीन निर्बंध लादून इराणवर आर्थिक दबाव वाढवण्याचा मार्ग निवडला आहे.

Devendra Fadnavis : राहुल गांधींनी पळपुटेपणा सोडून संसदेत चर्चेला यावं; मुख्यमंत्री देवेंद्र फडणवीसांचे आव्हान, म्हणाले- विद्यार्थी आंदोलनातून ठाकरे बंधूंचा अस्तित्व शोधण्याचा प्रयत्न

इराणचा युक्रेनच्या मुत्सद्याला समन्स

कॅस्पियन समुद्रातील आपल्या एका व्यापारी जहाजावर झालेल्या कथित हल्ल्याचा निषेध करण्यासाठी इराणने युक्रेनच्या एका मुत्सद्याला समन्स पाठवला आहे. या हल्ल्यात एका खलाशाचा मृत्यू झाला असून अन्य एक जण जखमी झाला असल्याचा दावा इराणने केला आहे. या घटनेचे वर्णन ‘आक्रमक कृत्य’ असे करत, इराणच्या परराष्ट्र मंत्रालयाने स्पष्ट केले की देश आपल्या राष्ट्रीय हितांचे आणि सुरक्षेचे रक्षण करेल.

दरम्यान, युक्रेनचे राष्ट्राध्यक्ष वोलोदिमिर झेलेन्स्की यांनी दावा केला की, युक्रेनने कॅस्पियन समुद्रातील अशा जहाजांना लक्ष्य केले होते ज्यांचा वापर इराणशी संबंधित लष्करी साहित्याची वाहतूक करण्यासाठी केला जात होता. मात्र, त्यांनी इराणच्या व्यापारी जहाजावरील हल्ल्याला थेट दुजोरा दिला नाही.

इस्रायल अमेरिकेला चिथावणी देत असल्याचा इराणचा आरोप

इराणच्या ‘इस्लामिक रिव्होल्युशनरी गार्ड कॉर्प्स’ने (IRGC) इस्रायलवर अमेरिकेला चिथावणी देत असल्याचा आरोप केला आहे. IRGC च्या प्रवक्त्याने सांगितले की, इस्रायल अमेरिकेच्या अध्यक्षांना चुकीची माहिती देऊन इराणविरोधात वातावरण निर्माण करत आहे. अमेरिकेची मध्यपूर्वेतील उपस्थिती कायम राहावी आणि अमेरिकेच्या सामर्थ्याचा वापर करून इस्रायलने आपली धोरणात्मक उद्दिष्टे साध्य करावीत, हा त्यामागचा उद्देश आहे.

IRGC ने इस्रायलला इशारा दिला आहे की, जर त्यांनी पुन्हा युद्ध सुरू केले, तर इराणकडून प्रचंड विध्वंस घडवून आणणारे प्रत्युत्तर दिले जाईल.

जॉर्डनमध्ये अमेरिकन सैनिकांच्या मृत्यूनंतर अमेरिकेची चिंता वाढली

जॉर्डनमध्ये अलीकडेच तीन अमेरिकन सैनिकांचा मृत्यू झाल्यामुळे अमेरिकेची चिंता वाढली आहे. एका वरिष्ठ अमेरिकन अधिकाऱ्याने दिलेल्या माहितीनुसार, इराणने केलेल्या ड्रोन आणि क्षेपणास्त्र हल्ल्यात एका बॅलिस्टिक क्षेपणास्त्राने अमेरिकेची संरक्षण फळी भेदली. लष्करी तज्ज्ञांच्या मते, हा संघर्ष अधिक तीव्र झाला, तर अमेरिकन सैन्य, आखाती देशांमधील मित्रराष्ट्र आणि महत्त्वाची लष्करी ठिकाणे इराणच्या प्रत्युत्तरादाखल होणाऱ्या हल्ल्यांच्या धोक्याच्या कक्षेत येऊ शकतात.

अमेरिकेने काल रात्री प्रथमच कोणतेही हल्ले केले नाही

गेल्या दोन आठवड्यांपासून सुरू असलेल्या लष्करी तणावाच्या पार्श्वभूमीवर, अमेरिकेने शनिवारी रात्री प्रथमच इराणवर कोणतीही बॉम्बफेक केली नाही. यापूर्वी सलग १३ रात्री अमेरिकेने हवाई हल्ले केले होते, ज्याला प्रत्युत्तर म्हणून इराणने या भागातील अमेरिकेच्या लष्करी मालमत्तेला लक्ष्य केले होते. तथापि, संभाव्य घडामोडींचा अंदाज घेऊन पेंटागॉनने अलीकडच्या काळात मध्यपूर्वेत अतिरिक्त लष्करी कुमक आणि शस्त्रास्त्रे तैनात केली आहेत. तसेच, ऊर्जा प्रकल्प, वाहतूक मार्ग आणि ‘पीक-एक्स’ (Peak-X) पर्वतावर स्थित इराणच्या अणु प्रकल्पावर हल्ले करण्याच्या पर्यायांचीही लष्करी नियोजकांकडून तयारी केली जात होती.