‘घाबरून मंत्र्यांच्या पंगतीला बसणार नाही’; परवानगी नाकारल्यानंतर जरांगेंचा सरकारला थेट इशारा

By, wankhadepravin - September 15, 2026 08:30:25

0

विशेष प्रतिनिधी

जालना : मुंबईतील प्रस्तावित आंदोलनाला पोलिसांनी परवानगी नाकारल्यानंतरही मराठा आरक्षण आंदोलनकर्ते मनोज जरांगे पाटील आपल्या भूमिकेवर ठाम आहेत. मुंबईला जाण्याचा निर्णय कोणत्याही परिस्थितीत बदलणार नसल्याचे सांगत त्यांनी सरकारला आक्रमक इशारा दिला आहे. “आंदोलनस्थळी मरेन, पण सरकारपुढे शरण जाणार नाही,” असा निर्धार जरांगे यांनी व्यक्त केला.

अंतरवाली सराटी, ता. अंबड येथे सुरू असलेल्या त्यांच्या उपोषणाचा आज १७वा दिवस आहे. मराठा आरक्षणाच्या मागणीसाठी पुढील आंदोलनाची दिशा ठरवताना जरांगे यांनी १९ सप्टेंबरपासून मुंबईत बेमुदत उपोषण करण्याची घोषणा केली होती. मात्र, त्यांच्या आंदोलनाला मुंबई पोलिसांनी परवानगी नाकारली आहे. Manoj Jarange

सहकाऱ्यांवरील चौकशीवरून सरकारवर निशाणा

मुंबईत आंदोलनासाठी जाण्यापासून रोखण्यासाठी आपल्या सहकाऱ्यांवर चौकशीचा दबाव आणला जात असल्याचा आरोप जरांगे यांनी केला. सुटीच्या दिवशीही काही सहकाऱ्यांना चौकशीसाठी बोलावले जात असल्याचे त्यांनी म्हटले.

प्रसाद वाटप करणाऱ्या गणेश मंडळांना एफडीए नोंदणी बंधनकारक

“चौकशांना घाबरून किंवा सरकारपुढे शरण जाऊन मी गद्दारी करणार नाही. सरकार माझी निष्ठा विकत घेऊ शकत नाही. मराठा समाजाचा स्वाभिमान कायम ठेवणार,” असे जरांगे म्हणाले.

प्रसंगी आंदोलनस्थळीच समाजासमोर मृत्यू पत्करेन; मात्र सरकारपुढे गुडघे टेकणार नाही, अशी भूमिका त्यांनी मांडली. तसेच, दबावाला बळी पडून मंत्र्यांच्या पंगतीला बसणार नसल्याचेही त्यांनी स्पष्ट केले.

‘मुंबईला जाण्यापासून रोखण्याचा प्रयत्न’

हिंदू सणांच्या काळात मुंबईत आंदोलनासाठी येत असल्याने आपल्याविरोधात कट रचला जात असल्याचा दावाही जरांगे यांनी केला. मात्र, या आरोपांच्या समर्थनार्थ त्यांनी कोणताही स्वतंत्र पुरावा सादर केलेला नाही.

आंदोलनाला आर्थिक मदत करणाऱ्या समाजातील सक्षम व्यक्तींवरही दबाव आणला जात असल्याचा आरोप त्यांनी केला. “प्रत्येक समाजात श्रीमंत लोक असतात. समाज अडचणीत असताना ते मदत करतात. त्यात गैर काय?” असा सवाल जरांगे यांनी उपस्थित केला.

भाषेवरील टीकेलाही उत्तर

दरम्यान, आपल्या भाषेबाबत होत असलेल्या टीकेवरही जरांगे यांनी स्पष्टीकरण दिले. आपली भाषा शिवराळ नसून ग्रामीण भागातील असल्याचे ते म्हणाले.

“माझी भाषा खेड्यातील आहे. तरीही कोणाला माझे काही शब्द किंवा भाषा आक्षेपार्ह वाटत असेल, तर मी ते शब्द आणि शिव्या मागे घेतो. मात्र, आमचे प्रश्न सोडवा,” असे आवाहन त्यांनी केले.

मुंबई आंदोलनावर सस्पेन्स कायम

पोलिसांनी परवानगी नाकारल्याने जरांगे यांच्या मुंबई आंदोलनासमोर कायदेशीर आणि प्रशासकीय अडचणी निर्माण झाल्या आहेत. मात्र, या अडचणी असूनही मुंबईला जाण्याचा निर्धार त्यांनी कायम ठेवला आहे. त्यामुळे आता १९ सप्टेंबरला जरांगे यांच्या आंदोलनाची पुढील दिशा काय असेल आणि प्रशासन त्यावर कोणती भूमिका घेणार, याकडे राज्याचे लक्ष लागले आहे.