तटकरे-थोरवे वादाला नवे वळण; कंपन्यांच्या मुद्द्यावर नेमका काय आरोप?

By, wankhadepravin - September 13, 2026 01:00:43

0

विशेष प्रतिनिधी

मुंबई : राष्ट्रवादी काँग्रेसच्या अजित पवार गटाचे नेते सुनील तटकरे यांच्यावर शिवसेनेच्या शिंदे गटाचे आमदार महेंद्र थोरवे यांनी गंभीर आरोप केले आहेत. तटकरे कंपन्यांना ब्लॅकमेल करत असल्याचा दावा करत, खालापूर परिसरातील कंपन्यांना राष्ट्रवादी काँग्रेसकडून त्रास दिला जात असल्याचा आरोपही त्यांनी केला. Sunil Tatkare

राष्ट्रवादी काँग्रेसच्या अजित पवार गटाचे जिल्हाध्यक्ष सुधाकर घारे यांच्या आंदोलनाच्या मुद्द्यावरून शिंदे गट आणि राष्ट्रवादी काँग्रेसमध्ये संघर्ष सुरू असतानाच थोरवे यांनी तटकरे यांच्यावर निशाणा साधला. हे आंदोलन आंदोलनकर्त्यांनी स्वतःची झोळी भरण्यासाठी केलेली स्टंटबाजी असल्याचा आरोप त्यांनी केला.

“हा प्रकार सर्वांच्या लवकरच लक्षात येईल,” असे सांगत थोरवे यांनी खालापूरमधील कंपन्यांवर दबाव आणण्याचे काम होत असल्याचा आरोप केला. स्थानिकांना रोजगार उपलब्ध करून देण्याचे काम या कंपन्या करत असून, त्या बंद पाडण्याचा कोणी प्रयत्न केल्यास त्याला जशास तसे उत्तर दिले जाईल, असा इशाराही त्यांनी दिला.

दरम्यान, हे आरोप महेंद्र थोरवे यांनी केलेले असून, सुनील तटकरे किंवा राष्ट्रवादी काँग्रेसकडून या आरोपांवर प्रतिक्रिया समोर आलेली नाही.

प्रसाद वाटप करणाऱ्या गणेश मंडळांना एफडीए नोंदणी बंधनकारक

रायगडच्या राजकारणात तडजोडीनंतर नवा वाद

गेल्या काही दिवसांपासून रायगडच्या पालकमंत्रीपदावरून मंत्री भरत गोगावले आणि मंत्री अदिती तटकरे यांच्यात रस्सीखेच सुरू होती. मात्र, विधानपरिषद निवडणुकीत शिवसेना शिंदे गटाने राष्ट्रवादी काँग्रेसचे उमेदवार अनिकेत तटकरे यांना सहकार्य करत स्वतःचा उमेदवारी अर्ज मागे घेतला. त्यामुळे अनिकेत तटकरे यांच्या बिनविरोध निवडीचा मार्ग मोकळा झाला.

या राजकीय तडजोडीनंतर रायगडच्या पालकमंत्रीपदाची जबाबदारी अखेर भरत गोगावले यांच्याकडे सोपविण्यात आली.

‘सरोगसी बाळ’ म्हणत दळवींनी साधला निशाणा

या राजकीय घडामोडींनंतर शिंदे गटाचे आमदार महेंद्र दळवी यांनी अनिकेत तटकरे यांच्यावरही शेलक्या शब्दांत टीका केली. त्यांनी अनिकेत तटकरे यांचा उल्लेख ‘सरोगसी बाळ’ असा करत, विधानपरिषद निवडणुकीत शिवसेनेने उमेदवारी अर्ज मागे घेतला नसता तर त्यांचा राजकीय जन्मच झाला नसता, असा दावा केला.

रायगडमधील राजकीय तडजोडीनंतर शिंदे गट आणि अजित पवार गटातील मतभेद मिटल्याचे चित्र निर्माण झाले होते. मात्र, आता थोरवे आणि दळवी यांच्या वक्तव्यांमुळे दोन्ही गटांतील राजकीय संघर्ष पुन्हा उफाळून येण्याची चिन्हे दिसत आहेत.