Pakistan Punjab Government : पाकिस्तानचा यू-टर्न; आंदोलनानंतर हिंदू-शीख नावं पुन्हा बदलण्याचा निर्णय स्थगित

By, Pravin Wankhade - May 28, 2026 08:00:26

0

वृत्तसंस्था

इस्लामाबाद : Pakistan Punjab Government पाकिस्तानच्या पंजाब प्रांत सरकारने लाहोरमधील अनेक रस्ते, चौक आणि भागांना पुन्हा जुन्या हिंदू-शीख काळातील नावं देण्याचा घेतलेला निर्णय आता स्थगित केला आहे. धार्मिक कट्टर गट आणि सोशल मीडियावरील तीव्र विरोधानंतर मरियम नवाज सरकारला अखेर माघार घ्यावी लागल्याचे वृत्त समोर आले आहे.Pakistan Punjab Government

लाहोरच्या ऐतिहासिक वारशाचे पुनरुज्जीवन करण्यासाठी “लाहोर हेरिटेज एरिया रिव्हायव्हल” प्रकल्पांतर्गत हा निर्णय घेण्यात आला होता. या योजनेनुसार फाळणीपूर्व काळातील अनेक नावं पुन्हा वापरण्याची तयारी सुरू होती. “इस्लामपुरा”ला पुन्हा “कृष्ण नगर”, “मौलाना जफर अली खान चौक”ला “लक्ष्मी चौक”, तर काही रस्त्यांना ब्रिटिशकालीन नावं देण्याचा प्रस्ताव होता.Pakistan Punjab Government

महाराष्ट्रातल्या नदीजोड प्रकल्पांना मोदी सरकारची गती; जलजीवन मिशनच्या योजनेलाही नवसंजीवनी!!

हा प्रस्ताव पाकिस्तानचे माजी पंतप्रधान नवाज शरीफ आणि पंजाबच्या मुख्यमंत्री मरियम नवाज यांच्या पुढाकारातून पुढे आला होता. सरकारच्या मते, हा उपक्रम लाहोरच्या बहुसांस्कृतिक आणि ऐतिहासिक ओळखीचे जतन करण्यासाठी होता. हिंदू, शीख, जैन आणि ब्रिटिशकालीन वारसा पुन्हा अधोरेखित करण्याचा प्रयत्न म्हणून याकडे पाहिले जात होते.

मात्र या निर्णयाला काही धार्मिक संघटना आणि कट्टरपंथी गटांनी जोरदार विरोध केला. “हिंदू आणि शीख नावं पुन्हा आणून इस्लामी ओळख कमकुवत केली जात आहे,” असा आरोप करण्यात आला. सोशल मीडियावरही सरकारविरोधात मोहिम राबवण्यात आली. वाढत्या दबावानंतर लाहोर प्रशासनाने “अजून अंतिम निर्णय झालेला नाही” असे सांगत संपूर्ण प्रक्रिया थांबवली.

या घडामोडींमुळे पाकिस्तानमध्ये सांस्कृतिक वारसा विरुद्ध धार्मिक राजकारण असा मोठा वाद पुन्हा समोर आला आहे. अनेक इतिहासतज्ज्ञ आणि उदारमतवादी गटांनी या नावबदल उपक्रमाला समर्थन दिले होते. त्यांच्या मते, लाहोरचा इतिहास केवळ एका धर्माशी जोडलेला नसून हिंदू, शीख, मुस्लिम आणि ब्रिटिश अशा विविध संस्कृतींचा प्रभाव त्या शहरावर राहिला आहे.

दरम्यान, पाकिस्तानमध्ये अलीकडच्या काळात काही हिंदू आणि शीख वारसा स्थळांचे पुनरुज्जीवन करण्याचे प्रयत्नही झाले आहेत. लाहोर किल्ल्यातील “लोह मंदिर”चे पुनरुज्जीवन, काही गुरुद्वारांचे संवर्धन आणि ऐतिहासिक मंदिरांच्या दुरुस्तीची कामे यामुळे सकारात्मक संदेश देण्याचा प्रयत्न केला जात होता. मात्र नावबदलाच्या मुद्द्यावर झालेल्या विरोधामुळे सरकार पुन्हा बचावात्मक भूमिकेत गेल्याचे दिसत आहे.