शेअर बाजारात आलेली जोरदार तेजी म्हणजे धोकादायक बुडबुडा, रिझर्व्ह बँकेचा इशारा।RBI warns about Market Boom

शेअर बाजारात आलेली जोरदार तेजी म्हणजे धोकादायक बुडबुडा, रिझर्व्ह बँकेचा इशारा

विशेष प्रतिनिधी

नवी दिल्ली – ‘कोविड’च्या महासाथीमुळे देशात ‘लॉकडाउन’ जाहीर झाल्याने अर्थचक्राची चाके मंदावली आहेत. व्यापार-उद्योगावर विपरित परिणाम झाला आहे. मात्र याच काळात शेअर बाजारात तेजीचे वारे आहे. शेअर बाजारात सध्या आलेल्या या तेजीबद्दल रिझर्व्ह बँकेने धोक्याची घंटा वाजविली आहे. RBI warns about Market Boom

२०२०-२१ मध्ये एकूण देशांतर्गत उत्पादनात अंदाजे ८ टक्के घट झालेली असताना, दुसरीकडे देशातील शेअर बाजारात आलेली जोरदार तेजी म्हणजे धोकादायक बुडबुडा आहे, असे मत रिझर्व्ह बँकेने आपल्या वार्षिक अहवालात व्यक्त केले आहे.

शेअर बाजाराने रचला इतिहास, मार्केट कॅप पहिल्यांदाच 3 ट्रिलियन डॉलरच्या पुढे, अवघ्या 7 वर्षांत दुप्पट

मुंबई शेअर बाजाराचा निर्देशांक- ‘सेन्सेक्स’ने फेब्रुवारी २०२१ मध्ये ५२ हजार अंशांची विक्रमी पातळी ओलांडली होती. आताही तो ५१ हजार अंशांच्या वरच आहे.

‘जीडीपी’तील अंदाजे ८ टक्के घसरणीच्या पार्श्वभूमीवर ‘इक्विटी’ या ॲसेटच्या किमतीत झालेली मोठी वाढ ही बुडबुड्यासारखी धोकादायक ठरते, असे निरीक्षण रिझर्व्ह बँकेच्या अहवालात नोंदविण्यात आले आहे.

सध्या ‘जीडीपी’चा दर देखील मोठ्या प्रमाणात घसरला आहे. असे सर्व विपरीत घडलेले असतानाही शेअर बाजारात मात्र तेजीचे वारे जोरदार वाहताना दिसत आहे. पहिल्या देशव्यापी ‘लॉकडाउन’च्या प्रारंभी (मार्च २०२०) शेअर बाजार मोठ्या प्रमाणात कोसळला होता. पण त्यानंतरच्या अवघ्या १०-११ महिन्यांत तो दुपटीने वाढला.