New Rule In Online Payment : एक जानेवारीपासून बदलणार ऑनलाइन पेमेंटचे नियम, काय होणार परिणाम? वाचा सविस्तर..

By, Vishal Joshi - December 23, 2021 03:45:49

0

रिझर्व्ह बँकेने गतवर्षी ऑनलाइन पेमेंट नियमांमध्ये बदल जाहीर केले होते. या वर्षी सप्टेंबरमध्ये, आरबीआयने ऑनलाइन व्यापाऱ्यांना वर्षाच्या अखेरीस टोकन लागू करण्यास सुरुवात केली. बँका त्यांच्या ग्राहकांना टोकन प्रणालीबाबत वेळोवेळी माहिती देत आहेत. New Rule In Online Payment change from Jan 1st Read All you need to know

वृत्तसंस्था

नवी दिल्ली : रिझर्व्ह बँकेने गतवर्षी ऑनलाइन पेमेंट नियमांमध्ये बदल जाहीर केले होते. या वर्षी सप्टेंबरमध्ये, आरबीआयने ऑनलाइन व्यापाऱ्यांना वर्षाच्या अखेरीस टोकन लागू करण्यास सुरुवात केली. बँका त्यांच्या ग्राहकांना टोकन प्रणालीबाबत वेळोवेळी माहिती देत आहेत.

देशात डिजिटल पेमेंट सातत्याने वाढत आहे. आता बहुतेक जण जेवण ऑर्डर करण्यासाठी, कॅब बुक करण्यासाठी किंवा इतर कोणत्याही खरेदीसाठी ऑनलाइन पेमेंट वापरत आहेत. मात्र, डिजिटल पेमेंटचे जग जसजसे वाढत आहे, तसतसे सायबर फसवणुकीच्या घटना वेगाने वाढत आहेत. सायबर गुन्हेगार लोकांचा डेटा चोरण्यासाठी आणि त्यांचे पैसे हडप करण्यासाठी नवीन तंत्रज्ञान आणि अॅप्स वापरत आहेत.

लोकांना चांगली सुरक्षा प्रदान करण्यासाठी आणि ऑनलाइन पेमेंट सुरक्षित करण्यासाठी, भारतीय रिझर्व्ह बँक (RBI) ने सर्व व्यापारी आणि पेमेंट गेटवेना वापरकर्त्याचे तपशील आणि डेबिट-क्रेडिट कार्ड तपशील हटविण्यास सांगितले आहे.

१ जानेवारीपासून नवीन नियम

आरबीआयच्या आदेशानंतर व्यापारी आणि पेमेंट गेटवे यांना त्यांच्या सर्व्हरवर साठवलेली युजर्सची सर्व माहिती हटवावी लागेल. याचा अर्थ असा की वेबसाइटवर पेमेंट करण्यासाठी तुम्हाला आता कार्डचे संपूर्ण तपशील प्रविष्ट करावे लागतील.

बँकांनी आपल्या ग्राहकांना नवीन नियमांबद्दल सांगण्यास सुरुवात केली आहे. HDFC ही अग्रगण्य खासगी बँकांपैकी एक, आपल्या ग्राहकांना संदेश पाठवत आहे की त्यांना एकतर संपूर्ण कार्ड तपशील प्रविष्ट करावे लागतील किंवा टोकन निवडावे लागेल.

नवीन नियम : एटीएम, पेन्शन आणि सिलिंडरपासून चेक बुकपर्यंत, हे ९ मोठे नियम जे आजपासून बदलणार

टोकनाजेशन म्हणजे काय?

सध्या ऑनलाइन पेमेंट किंवा व्यवहार करण्यासाठी डेबिट किंवा क्रेडिट कार्डचा 16 अंकी क्रमांक, कार्डची एक्सपायरी डेट, सीव्हीव्ही आणि वन-टाइम पासवर्ड टाकावा लागतो. तुमचा कार्ड क्रमांक पेमेंट अॅप किंवा ऑनलाइन शॉपिंग प्लॅटफॉर्मवर संग्रहित केला जातो आणि तुम्ही फक्त CVV आणि OTP टाकून पेमेंट करू शकता. पण आता तसे होणार नाही.

टोकनायझेशन वास्तविक कार्ड नंबरला एक पर्यायी कोड नियुक्त करते, ज्याला “टोकन” म्हणतात. टोकनायझेशनच्या मदतीने कार्डधारकाला त्याच्या डेबिट किंवा क्रेडिट कार्डचे सर्व तपशील शेअर करण्याची गरज नाही. टोकनायझेशन म्हणजे मूळ कार्ड क्रमांक वैकल्पिक कोडद्वारे बदलणे या कोडलाच टोकन म्हणतात.

टोकनाजेशन प्रत्येक कार्ड, टोकन विनंतीकर्ता आणि व्यापारी यांच्यासाठी युनिक असेल. टोकन तयार झाल्यानंतर टोकनयुक्त कार्ड तपशील मूळ कार्ड क्रमांकाच्या जागी वापरला जाऊ शकतो. ऑनलाइन पेमेंटसाठी ही प्रणाली अधिक सुरक्षित मानली जात असल्याचे बोलले जात आहे.

नवी प्रणाली किती सुरक्षित?

आरबीआयच्या म्हणण्यानुसार, टोकनयुक्त कार्ड व्यवहार सुरक्षित मानले जातात कारण त्याद्वारे ऑनलाइन पेमेंट करताना वास्तविक कार्ड तपशील व्यापाऱ्यासोबत शेअर केला जात नाही.

टोकन कार्ड नेटवर्कद्वारे वास्तविक कार्ड डेटा सुरक्षित मोडमध्ये गोळा केला जातो. आरबीआयने असेही म्हटले आहे की, टोकन परत मूळ कार्ड तपशिलांमध्ये रूपांतरित करणे डी-टोकनायझेशन म्हणून ओळखले जाते. या सेवेचा लाभ घेण्यासाठी ग्राहकाला कोणतेही शुल्क भरावे लागणार नाही.

काय बदलणार नव्या वर्षात?

नवीन वर्षात 1 जानेवारीपासून तुम्ही एखाद्याला ऑनलाइन पेमेंट कराल तेव्हा तुम्हाला प्रमाणीकरण-AFA च्या अतिरिक्त घटकासह तुमची संमती द्यावी लागेल. एकदा हे पूर्ण झाल्यावर तुम्ही तुमच्या कार्डचा CVV आणि OTP टाकून पेमेंट पूर्ण करू शकाल.