Devendra Fadnavis महाराष्ट्र-न्यू साउथ वेल्स मैत्रीला नवे बळ; मुख्यमंत्री देवेंद्र फडणवीस यांची ऑस्ट्रेलियन शिष्टमंडळासोबत महत्त्वाची बैठक

महाराष्ट्र-न्यू साउथ वेल्स मैत्रीला नवे बळ; मुख्यमंत्री देवेंद्र फडणवीस यांची ऑस्ट्रेलियन शिष्टमंडळासोबत महत्त्वाची बैठक

विशेष प्रतिनिधी

मुंबई : महाराष्ट्र आणि ऑस्ट्रेलियातील न्यू साउथ वेल्स (NSW) राज्यांमधील ऐतिहासिक भागीदारीला नव्याने बळ मिळाले आहे. न्यू साउथ वेल्सचे प्रीमियर ख्रिस मिन्स आणि त्यांच्या शिष्टमंडळाने मुंबईतील मुख्यमंत्री देवेंद्र फडणवीस यांच्या ‘वर्षा’ या शासकीय निवासस्थानी भेट घेतली. यावेळी दोन्ही राज्यांमधील सहकार्य आणखी मजबूत करण्याबाबत महत्त्वपूर्ण चर्चा झाली. Devendra Fadnavis

या बैठकीत महाराष्ट्र सरकार आणि न्यू साउथ वेल्स सरकार यांच्यातील ‘सिस्टर-स्टेट’ सामंजस्य कराराचे (MoU) नूतनीकरण करण्यात आले. हा करार प्रथम २ नोव्हेंबर २०१२ रोजी करण्यात आला होता. या कराराच्या नूतनीकरणामुळे महाराष्ट्र आणि न्यू साउथ वेल्समधील विविध क्षेत्रांतील सहकार्याला नवी दिशा मिळणार आहे.

व्यापार आणि गुंतवणुकीला मिळणार चालना

नूतनीकृत भागीदारीअंतर्गत व्यापार आणि गुंतवणूक, तंत्रज्ञान व नवोपक्रम, अत्याधुनिक उत्पादन क्षेत्र, महत्त्वाची खनिजे, कृषी तंत्रज्ञान, आरोग्यसेवा, शिक्षण आणि कौशल्य विकास यांसारख्या क्षेत्रांमध्ये सहकार्य वाढविण्यावर भर देण्यात येणार आहे.

पुण्यानंतर नागपुरातही ‘डीजे’मुक्त गणेशोत्सवाची मागणी; संदीप जोशींचा पुढाकार, नागरिकांकडून स्वाक्षऱ्या घेणार

याशिवाय ऊर्जा संक्रमणाच्या क्षेत्रातही दोन्ही राज्यांमध्ये सहकार्य वाढविण्याचा निर्णय घेण्यात आला आहे. या भागीदारीमुळे महाराष्ट्रातील उद्योग, तंत्रज्ञान, शिक्षण आणि गुंतवणुकीच्या संधींना चालना मिळण्याची अपेक्षा आहे.

ऑस्ट्रेलियन शिष्टमंडळात कोणाचा समावेश?

न्यू साउथ वेल्सचे प्रीमियर ख्रिस मिन्स यांच्यासोबत NSWचे कोषाध्यक्ष डॅनियल मुकी, भारतातील ऑस्ट्रेलियाचे उच्चायुक्त फिलिप ग्रीन, प्रीमियर विभागाचे सचिव मायकेल कॉट्स-ट्रॉटर, मुंबईतील ऑस्ट्रेलियाचे कॉन्सुल जनरल पॉल मर्फी, भारतातील NSW व्यापार आणि गुंतवणूक आयुक्त मालिनी दत्त तसेच प्रीमियर कार्यालयातील वरिष्ठ धोरण सल्लागार सचिन सक्सेना यांचा शिष्टमंडळात समावेश होता.

महाराष्ट्र आणि न्यू साउथ वेल्समधील ही भागीदारी आगामी काळात आणखी व्यापक करण्याचा निर्धार यावेळी व्यक्त करण्यात आला. या सहकार्यामुळे दोन्ही राज्यांतील नागरिक, विद्यार्थी, उद्योग आणि गुंतवणूकदारांसाठी नव्या संधी निर्माण होण्याची अपेक्षा आहे.