सत्येंद्र जैन पुन्हा अटकेत! दिल्ली जल बोर्ड टेंडर प्रकरणात ACBचा मोठा दणका

By, wankhadepravin - August 19, 2026 11:30:39

0

विशेष प्रतिनिधी

नवी दिल्ली: दिल्ली जल बोर्डाच्या सांडपाणी प्रक्रिया केंद्रांच्या नूतनीकरण आणि क्षमता वाढीच्या निविदांमधील कथित गैरव्यवहारप्रकरणी दिल्ली सरकारच्या लाचलुचपत प्रतिबंधक शाखेने माजी मंत्री आणि आम आदमी पक्षाचे नेते सत्येंद्र जैन यांना अटक केली आहे. जैन यांच्यासह एकूण सहा जणांना मंगळवारी अटक करण्यात आली.

अटक करण्यात आलेल्यांमध्ये दिल्ली जल बोर्डाचे माजी मुख्य कार्यकारी अधिकारी उदित प्रकाश राय, माजी कंत्राटी सल्लागार अंकित श्रीवास्तव, एएन एंटरप्रायझेसचे मालक नागेंद्र यादव, युरोटेक एन्व्हायर्नमेंटचे राजा कुमार कुरा आणि सृजनहारचे मालक पंकज वर्मा यांचा समावेश असल्याचे लाचलुचपत प्रतिबंधक शाखेने म्हटले आहे.

दक्षता संचालनालयाकडून प्राप्त तक्रारीच्या आधारे या प्रकरणाचा तपास सुरू करण्यात आला होता. सांडपाणी प्रक्रिया केंद्रांच्या नूतनीकरणासाठी राबविलेल्या निविदा प्रक्रियेत अटींमध्ये फेरफार, विशिष्ट तंत्रज्ञानाचा आग्रह आणि काही कंपन्यांना फायदा मिळवून देण्यासाठी संगनमत झाल्याचा तपास यंत्रणांचा आरोप आहे.

या प्रकरणाचा संबंध दिल्लीतील १० सांडपाणी प्रक्रिया केंद्रांच्या क्षमता वाढ आणि आधुनिकीकरणाशी आहे. पप्पनकलां, निलोठी, नजफगढ, केशोपूर, कोरोनेशन पिलर, नरेला, रोहिणी आणि कोंडली येथील प्रकल्पांसाठी चार निविदा काढण्यात आल्या होत्या.

संविधानाच्या गप्पा, पण चर्चेपासून पळ! फडणवीसांचा विरोधकांना थेट सवाल

तपास यंत्रणांच्या म्हणण्यानुसार, या चार निविदांचा प्रारंभिक अंदाजित खर्च सुमारे १,५४६ कोटी रुपये होता. निविदा प्रक्रियेदरम्यान तो वाढवून १,९४३ कोटी रुपये करण्यात आला. योग्य प्रक्रिया आणि प्रकल्प अहवालांचे पालन न करता ही वाढ करण्यात आल्याचा आरोप तपास यंत्रणांनी केला आहे..

अंमलबजावणी संचालनालयाच्या म्हणण्यानुसार, युरोटेक एन्व्हायर्नमेंटल प्रायव्हेट लिमिटेडचे व्यवस्थापकीय संचालक राजा कुमार कुरा यांनी दिल्ली जल बोर्डातील अधिकारी आणि काही खासगी व्यक्तींशी संगनमत करून निविदेच्या अटी अशा पद्धतीने बदलून घेतल्या की युरोटेक संबंधित तंत्रज्ञानाचा एकमेव पात्र पुरवठादार ठरेल.

चार निविदांमध्ये केवळ तीन संयुक्त उपक्रम सहभागी झाले होते आणि निविदा मिळाल्यानंतर संबंधित काम अखेरीस हैदराबादस्थित युरोटेक कंपनीकडे उपकंत्राटाद्वारे गेल्याचाही तपास यंत्रणांचा आरोप आहे.

या प्रकरणात अंमलबजावणी संचालनालयाने यापूर्वी स्वतंत्र आर्थिक गैरव्यवहाराचा तपास केला आहे. ईडीने डिसेंबर २०२५ मध्ये सत्येंद्र जैन यांच्यासह १४ जणांविरोधात आरोपपत्र दाखल केले होते. ईडीच्या दाव्यानुसार या प्रकरणातून सुमारे १७.७० कोटी रुपयांची कथित गुन्ह्यातून मिळालेली रक्कम निर्माण झाली आणि तिचा वापर तसेच हस्तांतरण करण्यात आले.

ईडीने असा आरोप केला आहे की राजा कुमार कुरा आणि त्यांच्या सहकाऱ्यांनी सुमारे ६.७३ कोटी रुपयांचे बेकायदा कमिशन दिले. बनावट देयके, बँक व्यवहार तसेच रोख आणि हवाला माध्यमातून ही रक्कम दिल्याचा तपास यंत्रणेचा दावा आहे. या प्रक्रियेत युरोटेकला सुमारे ९.९६ कोटी रुपयांचा अनुचित नफा झाल्याचेही ईडीचे म्हणणे आहे.

या प्रकरणातील विविध आरोपींशी संबंधित सुमारे १५.३६ कोटी रुपयांची मालमत्ता ईडीने यापूर्वी अंतरिम स्वरूपात जप्त केली आहे.

सत्येंद्र जैन यांच्या अटकेनंतर आम आदमी पक्षाने या कारवाईवर जोरदार टीका केली आहे. पक्षाचे राष्ट्रीय संयोजक अरविंद केजरीवाल यांनी भाजपवर राजकीय विरोधकांना लक्ष्य करण्याचा आरोप केला.

आपने यापूर्वीही या प्रकरणातील आरोप फेटाळताना महत्त्वाचा मुद्दा उपस्थित केला होता. संबंधित चार निविदा ऑक्टोबर २०२२ मध्ये मंजूर झाल्याचे तपास यंत्रणांचे म्हणणे असताना, जैन यांना मे २०२२ मध्येच ईडीने अन्य प्रकरणात अटक केली होती आणि त्या काळात ते खात्याविना मंत्री होते, असा पक्षाचा दावा आहे.