विखे पाटलांच्या कुटुंबातील कन्येची ऐतिहासिक कामगिरी; स्वीडनच्या संसदेत मिळवलं स्थान

By, wankhadepravin - September 20, 2026 08:30:11

0

विशेष प्रतिनिधी

मुंबई : महाराष्ट्रातील शिक्षणतज्ज्ञ अशोक विखे पाटील यांच्या कन्या नीला विखे पाटील यांची स्वीडनच्या संसदेत खासदार म्हणून निवड झाली आहे. १३ सप्टेंबर रोजी झालेल्या राष्ट्रीय निवडणुकीत त्यांनी स्टॉकहोम सिटी मतदारसंघातून विजय मिळवला. ४१ वर्षीय नीला विखे पाटील यांच्या निवडीमुळे महाराष्ट्रातील विखे पाटील कुटुंबाचा राजकीय आणि सामाजिक वारसा स्वीडनच्या राष्ट्रीय राजकारणात पोहोचला आहे. स्वीडनची संसद रिक्सदागमध्ये एकूण ३४९ सदस्य आहेत. Nila Vikhe Patil

ग्रीन पार्टीच्या सक्रिय सदस्या

नीला विखे पाटील या स्वीडनच्या ग्रीन पार्टीच्या सक्रिय सदस्य आहेत. त्या स्टॉकहोम ग्रीन पार्टीच्या निवडणूक समितीवरही कार्यरत आहेत. यापूर्वी त्यांनी स्टॉकहोम महानगरपालिकेच्या सिटी कौन्सिलवर निवडून येत स्थानिक राजकारणात काम केले आहे.

स्वीडनचे माजी पंतप्रधान स्टेफान लोव्हेन यांच्या कार्यकाळात नीला यांनी पंतप्रधान कार्यालयात राजकीय सल्लागार म्हणून जबाबदारी पार पाडली. यावेळी त्यांनी वित्त, कर आणि गृहनिर्माण या विषयांवर काम केले होते.

विखे पाटील कुटुंबाशी ऐतिहासिक नातं

नीला विखे पाटील या आशियातील पहिल्या सहकारी साखर कारखान्याचे संस्थापक विठ्ठलराव विखे पाटील यांच्या पणती आहेत. तसेच त्या दिवंगत माजी केंद्रीय मंत्री बाळासाहेब विखे पाटील यांच्या नात आणि महाराष्ट्राचे मंत्री राधाकृष्ण विखे पाटील यांच्या पुतणी आहेत.

महाराष्ट्राशी कौटुंबिक नातं असलेल्या नीला यांचा जन्म स्वीडनमध्ये झाला. मात्र, त्यांच्या बालपणातील काही काळ अहिल्यानगरमध्ये गेला आहे. त्यामुळे स्वीडनमध्ये राजकीय जबाबदारी स्वीकारल्यानंतरही भारताशी आणि महाराष्ट्राशी असलेले आपले नाते त्या सातत्याने अधोरेखित करतात.

अर्थशास्त्र, कायदा आणि व्यवस्थापनाचे शिक्षण

नीला विखे पाटील यांनी गोथेनबर्ग स्कूल ऑफ बिझनेसमधून अर्थशास्त्र आणि कायद्याचे शिक्षण घेतले आहे. त्यांनी एमबीएचे शिक्षणही पूर्ण केले असून माद्रिदमधील कॉम्प्लुटेन्स युनिव्हर्सिटीमध्येही एमबीएचे शिक्षण घेतले आहे.

एसटीच्या १२५ बसस्थानकांवर उभारणार ‘हिरकणी कक्ष’; स्तनदा मातांसाठी सुरक्षित आणि खासगी सुविधा

शिक्षण, प्रशासन आणि राजकीय सल्लागार म्हणून काम करण्याचा अनुभव असलेल्या नीला यांना आता स्वीडनच्या राष्ट्रीय संसदेत काम करण्याची संधी मिळाली आहे.

बालकल्याण आणि पर्यावरणावर भर

खासदार म्हणून निवड झाल्यानंतर नीला विखे पाटील यांनी बालकल्याण आणि पर्यावरण हे आपल्या कामाचे प्रमुख विषय असतील, असे सांगितले. मतदान करू न शकणाऱ्या लोकांचा आवाज बनण्याची इच्छा त्यांनी व्यक्त केली.

“प्रत्येक मुलाला चांगल्या भविष्याची संधी मिळावी आणि स्वच्छ पाणी व पर्यावरण असलेला राहण्यायोग्य ग्रह निर्माण व्हावा,” अशी भूमिका नीला यांनी मांडली.

‘भारताशी माझे जवळचे नाते’

भारताशी असलेल्या नात्याबद्दल बोलताना नीला विखे पाटील यांनी भारताबद्दल आपल्याला खूप प्रेम असल्याचे सांगितले. भारताशी आपले जवळचे आणि घट्ट नाते असल्याचे त्यांनी नमूद केले.

महाराष्ट्रातील विखे पाटील कुटुंबाच्या सामाजिक आणि राजकीय पार्श्वभूमीला आता स्वीडनमधील त्यांच्या सार्वजनिक जीवनाची जोड मिळाली आहे. त्यांच्या निवडीमुळे महाराष्ट्राशी संबंधित व्यक्तीच्या स्वीडनच्या राष्ट्रीय राजकारणातील प्रवेशाची नोंद झाली आहे.