विवेकानंद पाटलांना नवनाथ बन यांचे जोरदार प्रत्युत्तर; म्हणाले, ‘अहंकाराचा वारा तुम्हाला लागलाय!’

By, wankhadepravin - October 9, 2026 03:07:01

0

MPSC आंदोलनावरून राजकीय वातावरण तापले; नाथ संप्रदायाच्या परंपरेचा दाखला देत नवनाथ बन यांचे विवेकानंद पाटील आणि रोहित पवार यांना प्रतिआव्हान

विशेष प्रतिनिधी

पुणे : महाराष्ट्र लोकसेवा आयोगाच्या (MPSC) अध्यक्षांच्या राजीनाम्याच्या मागणीसाठी पुण्यात सुरू असलेल्या विद्यार्थ्यांच्या आंदोलनावरून राजकीय वाद अधिकच तीव्र झाला आहे. आंदोलनाचे नेतृत्व करणारे विवेकानंद पाटील आणि भाजपचे प्रवक्ते नवनाथ बन यांच्यात आरोप-प्रत्यारोप सुरू असून, आता नवनाथ बन यांनी विवेकानंद पाटील यांच्या टीकेला जोरदार प्रत्युत्तर दिले आहे. यावेळी त्यांनी नाथ संप्रदायाच्या परंपरेचा उल्लेख करत विवेकानंद पाटील यांना ज्ञानाचा अहंकार करू नये, असा टोला लगावला. Navnath Ban

MPSC आंदोलनावरून वादाला नवे वळण

पेपरफुटीच्या घटनांनंतर MPSC अध्यक्षांच्या राजीनाम्याची मागणी करत पुण्यात विद्यार्थ्यांचे आंदोलन सुरू आहे. न्यायालयाने विद्यार्थ्यांना आंदोलन मागे घेण्याची विनंती केली असली, तरी अध्यक्षांचा राजीनामा होईपर्यंत आंदोलन सुरूच ठेवण्याचा निर्धार विवेकानंद पाटील यांनी व्यक्त केला आहे.

दरम्यान, भाजपच्या प्रवक्त्यांकडून आंदोलनावर होत असलेल्या टीकेला उत्तर देताना पाटील यांनी लोकशाही आणि संविधानाच्या चौकटीत राहून विद्यार्थ्यांच्या मागण्या मांडत असल्याचे सांगितले. याचवेळी त्यांनी नवनाथ बन यांच्या बौद्धिक क्षमतेवर प्रश्न उपस्थित करत त्यांच्यावर टीका केली होती.

‘आम्ही नाथपंथी आहोत, याचा अभिमान’

विवेकानंद पाटील यांच्या टीकेला उत्तर देताना नवनाथ बन यांनी नाथ संप्रदायाच्या परंपरेचा दाखला दिला. ते म्हणाले, “ज्ञानोबांनी नाथ परंपरा भागवत धर्मापर्यंत आणून ठेवली आहे. आम्ही नाथपंथी आहोत, याचा आम्हाला अभिमान आहे. मंत्राचा जप करत मी लहानाचा मोठा झालो आहे. त्यामुळे विवेकानंद यांनी आपल्या ज्ञानाचा अहंकार करू नये. अहंकाराचा वारा तुम्हाला लागला आहे.”

यापूर्वी विवेकानंद पाटील यांनी नवनाथ संप्रदायातील नऊ नाथ कोण आहेत आणि भागवत संप्रदायाशी त्याचा काय संबंध आहे, हे सांगण्याचे आव्हान दिले होते. त्यावर आता नवनाथ बन यांनी प्रतिप्रश्न उपस्थित करत विवेकानंद पाटील आणि राष्ट्रवादी काँग्रेसचे आमदार रोहित पवार यांना धार्मिक परंपरा आणि ग्रंथांच्या अभ्यासावरून आव्हान दिले.

‘मराठीला ज्ञानभाषा बनवणार’; AIपासून स्पेस टेक्नॉलॉजीपर्यंत फडणवीसांचा मोठा प्लॅन

रामरक्षा आणि नाथ संप्रदायातील अभंगांचा उल्लेख

नवनाथ बन यांनी रामरक्षेचे श्लोक आणि नाथ संप्रदायातील अभंगांचा उल्लेख करत दोघांनीही पुस्तकांचा अभ्यास करून उत्तरे द्यावीत, असे म्हटले. तसेच, “मी प्रश्नांची उत्तरे देणे टाळत होतो; मात्र आता माझा प्रतिप्रश्न आहे. पुस्तकात वाचून उत्तर दिले तरी चालेल,” असे त्यांनी सांगितले.

भागवत आणि वारकरी संप्रदायाच्या परंपरेचा उल्लेख करत त्यांनी संत ज्ञानेश्वर आणि संत तुकाराम यांच्या कार्याची आठवण करून दिली. कोणाच्या बौद्धिक क्षमतेवर टीका करण्यापूर्वी विवेकानंद पाटील आणि रोहित पवार यांनी विचार करावा, असा सल्लाही त्यांनी दिला.

ओबीसी समाजाचा उल्लेख करत विरोधकांवर निशाणा

या वादात नवनाथ बन यांनी आपल्या सामाजिक पार्श्वभूमीचाही उल्लेख केला. आपण ओबीसी समाजातून येत असून, आपल्या आजोबांनी मराठवाड्यातील स्वातंत्र्यलढ्यात योगदान दिल्याचे त्यांनी सांगितले. याचवेळी त्यांनी विरोधकांच्या कुटुंबीयांच्या इतिहासावर प्रश्न उपस्थित करत वैयक्तिक टीका केली.

विवेकानंद पाटील यांनी गट-ड परीक्षेच्या संदर्भात केलेल्या वक्तव्यावरही बन यांनी आक्षेप घेतला. सफाई कर्मचाऱ्यांचा अपमान होईल, अशा प्रकारची वक्तव्ये करू नयेत, असे म्हणत त्यांनी सरंजामशाहीच्या मानसिकतेवरून विरोधकांवर टीका केली.

आंदोलनापेक्षा वैयक्तिक आरोपांची चर्चा अधिक?

MPSC परीक्षांमधील कथित पेपरफुटी आणि विद्यार्थ्यांच्या मागण्यांवरून सुरू झालेल्या आंदोलनाला आता राजकीय वादाची किनार मिळाली आहे. एका बाजूला विद्यार्थ्यांकडून आयोगाच्या अध्यक्षांच्या राजीनाम्याची मागणी केली जात आहे, तर दुसरीकडे आंदोलनातील प्रमुख व्यक्ती आणि राजकीय नेत्यांमध्ये वैयक्तिक आरोप-प्रत्यारोप सुरू आहेत.

या पार्श्वभूमीवर विद्यार्थ्यांच्या मूळ मागण्यांवर तोडगा कधी निघणार आणि MPSC प्रकरणात पुढे कोणती भूमिका घेतली जाणार, याकडे सर्वांचे लक्ष लागले आहे.