चाकण-हिंजवडीच्या 1,826 कोटींच्या आराखड्याला फडणवीसांची तत्त्वतः मंजुरी; डिसेंबरपासून कामांना सुरुवात

By, wankhadepravin - September 29, 2026 11:30:27

0

विशेष प्रतिनिधी

मुंबई : चाकण आणि हिंजवडी परिसरातील रस्ते, वाहतूक व्यवस्थापन, पावसाळी पाणी निचरा आणि अन्य पायाभूत सुविधांच्या सुधारणेसाठी राज्य सरकारने मोठा निर्णय घेतला आहे. चाकणसाठी १,४०० कोटी रुपये आणि हिंजवडीसाठी ४२६ कोटी रुपये अशा एकूण १,८२६ कोटी रुपयांच्या विकास आराखड्याला मुख्यमंत्री देवेंद्र फडणवीस यांनी तत्त्वतः मंजुरी दिली आहे. CM Fadnavis

सह्याद्री अतिथीगृह येथे सोमवारी (२८ सप्टेंबर) झालेल्या बैठकीत चाकण आणि हिंजवडी परिसरातील प्रस्तावित विकासकामांचे सादरीकरण करण्यात आले. प्रकल्पांची कामे वेळेत पूर्ण करण्यासाठी डिसेंबरपासून प्रत्यक्ष कामांना सुरुवात करण्याचे नियोजन असल्याची माहिती पुणे जिल्हाधिकारी जितेंद्र डुडी यांनी दिली.

चाकण आणि हिंजवडी परिसरातील खराब रस्ते, वाहतूक कोंडी, अपुरा वीजपुरवठा आणि पावसाळ्यात रस्त्यांवर साचणाऱ्या पाण्यामुळे उद्योजक आणि नागरिकांना मोठ्या अडचणींचा सामना करावा लागत आहे. या समस्यांमुळे काही उद्योजकांनी उद्योगांचे स्थलांतर करण्याचा इशाराही दिला होता. या पार्श्वभूमीवर राज्य सरकारने चाकण औद्योगिक परिसरातील समस्या सोडवण्यासाठी पुणे जिल्हाधिकाऱ्यांच्या अध्यक्षतेखाली उच्चस्तरीय समिती स्थापन केली होती.

या समितीने चाकण आणि हिंजवडी परिसरातील नागरी समस्या दूर करण्यासाठी आवश्यक उपाययोजनांचा आराखडा तयार करून मुख्यमंत्र्यांसमोर सादर केला.

विविध विभागांच्या समन्वयातून विकासकामे

चाकणमधील पायाभूत सुविधा सुधारण्यासाठी एमआयडीसी, पीएमआरडीए, सार्वजनिक बांधकाम विभाग, जिल्हा परिषद आणि इतर संबंधित यंत्रणांनी समन्वयाने काम करावे, अशी सूचना मुख्यमंत्री फडणवीस यांनी केली.

रस्ते, पावसाळी पाणी निचरा, वाहतूक व्यवस्थापन आणि सार्वजनिक सुविधांसाठी उपलब्ध असलेल्या विविध विभागांच्या निधीचा आणि यंत्रणांचा एकत्रित वापर करण्यावर भर देण्यात आला आहे.

AI आधारित वाहतूक व्यवस्थापन

चाकण, तळेगाव आणि हिंजवडी परिसरातील वाढती वाहतूक कोंडी लक्षात घेता कृत्रिम बुद्धिमत्तेवर आधारित वाहतूक व्यवस्थापन यंत्रणा उभारण्याचे नियोजन करण्यात आले आहे.

वाहतूक पोलिसांच्या समन्वयाने कमांड अँड कंट्रोल सेंटरच्या माध्यमातून वाहतुकीवर लक्ष ठेवले जाणार आहे. नियमभंग करणाऱ्या वाहनांवर कारवाई करण्यासाठी सीसीटीव्ही आणि इंटेलिजंट ट्रॅफिक मॅनेजमेंट सिस्टीमचा वापर केला जाणार आहे.

‘मराठवाडा वॉटर ग्रीड प्रकल्प महाविकास आघाडीने गुंडाळला’; मुख्यमंत्री देवेंद्र फडणवीसांचा आरोप

हिंजवडीसाठी ४२६ कोटींचा स्वतंत्र आराखडा

हिंजवडीतील वाहतूक कोंडी सोडवण्यासाठी ४२६ कोटी रुपयांचा स्वतंत्र आराखडा तयार करण्यात आला आहे. हिंजवडीतील वीजपुरवठ्याशी संबंधित अडचणी दूर करण्यासाठी सहा एकर जागा उपलब्ध करून देण्यात आली आहे.

तसेच वाहतूक आणि अन्य व्यवस्थापनासाठी महाराष्ट्र सुरक्षा दलाचे १०० जवान उपलब्ध करून देण्याची प्रक्रिया सुरू असल्याची माहिती बैठकीत देण्यात आली.

अवजड वाहनांसाठी पाच ठिकाणी पार्किंग

चाकण औद्योगिक परिसरात अवजड वाहनांसाठी पुरेशी पार्किंग व्यवस्था नसल्याने अनेक वाहने रस्त्यांवर उभी केली जातात. परिणामी वाहतूक कोंडीची समस्या वाढते. ही समस्या सोडवण्यासाठी एमआयडीसीने पाच ठिकाणी पार्किंगची व्यवस्था उपलब्ध करून दिली आहे.

अवजड वाहनांनी रस्त्यांवर न थांबता या पार्किंग सुविधेचा वापर करावा, यासाठी स्वतंत्र धोरणात्मक व्यवस्था तयार करण्यात येणार आहे.

४९८ किमी रस्त्यांचा अभ्यास

चाकण औद्योगिक परिसरातील एकूण ४९८ किलोमीटरच्या रस्ते जाळ्याचा अभ्यास करण्यात आला आहे. वाहतुकीची घनता, औद्योगिक महत्त्व, मालवाहतुकीची वर्दळ, रस्त्यांची सद्यस्थिती, पाणी साचण्याची समस्या, सुरक्षितता आणि विविध भागांशी असलेली जोडणी या निकषांच्या आधारे रस्त्यांची निवड करण्यात आली आहे.

पहिल्या टप्प्यात सुमारे ७५ किलोमीटर रस्त्यांची सुधारणा करण्यात येणार आहे. या रस्त्यांवर पादचाऱ्यांसाठी स्वतंत्र मार्ग, पावसाच्या पाण्याचा निचरा, वाहतूक व्यवस्थेसाठी आवश्यक सुविधा आणि रस्ते सुरक्षेला प्राधान्य दिले जाणार आहे.

भूसंपादनाशिवाय कामे करण्याचे नियोजन

उपलब्ध रस्ते हक्काच्या जागेचा योग्य वापर करून विकासकामे करण्याचे नियोजन आहे. त्यामुळे पहिल्या टप्प्यात भूसंपादनाची आवश्यकता भासणार नसल्याचे सांगण्यात आले.

रस्त्यांवरील अतिक्रमणे हटवून उपलब्ध जागेचा अधिकाधिक वापर केला जाणार आहे. तसेच भविष्यातील गरजा लक्षात घेऊन रस्त्यांखाली विविध सेवा वाहिन्यांसाठी स्वतंत्र जागेची तरतूद करण्याचाही प्रस्ताव आहे.

रस्त्यांचे सुशोभीकरणही होणार

चाकण औद्योगिक परिसरातील रस्त्यांच्या दुभाजकांचे सुशोभीकरण आणि देखभाल खासगी संस्थांच्या सहभागातून करण्याचा प्रस्ताव आहे. औद्योगिक आस्थापनांच्या सहभागातून परिसराचे सुशोभीकरण, सार्वजनिक शौचालये आणि बसथांबे उभारण्याचाही विचार करण्यात आला आहे.

या आराखड्याची अंमलबजावणी वेळेत झाल्यास चाकण आणि हिंजवडीतील वाहतूक कोंडी, पावसाळ्यातील पाणी साचण्याची समस्या, रस्त्यांची दुरवस्था आणि औद्योगिक परिसरातील पायाभूत सुविधांशी संबंधित अडचणी कमी करण्यास मदत होण्याची अपेक्षा आहे. डिसेंबरपासून कामांना सुरुवात करण्याच्या नियोजनामुळे पुढील पावसाळ्यापूर्वी काही महत्त्वाची कामे पूर्ण करण्याचे आव्हान प्रशासनासमोर आहे.