नेपाळमध्ये नऊ दिवस बोगद्यात अडकलेला कामगार जिवंत बाहेर; ‘हरे कृष्ण’ महामंत्राचा जप करत ठेवला धीर

By, wankhadepravin - September 4, 2026 07:00:55

0

विशेष प्रतिनिधी

काठमांडू : नेपाळमधील त्रिशुली-3A जलविद्युत प्रकल्पाच्या बोगद्यात तब्बल नऊ दिवस अडकून राहिल्यानंतर 30 वर्षीय संजय साह यांची सुखरूप सुटका करण्यात आली. या काळात त्यांनी सतत ‘हरे कृष्ण’ महामंत्राचा जप करत देवाकडे प्रार्थना केली. अखेर श्रीकृष्ण जन्माष्टमीच्या दिवशी त्यांची सुटका झाल्याने या घटनेला भावनिक किनार लाभली आहे.

संजय साह हे नेपाळ विद्युत प्राधिकरणाचे कर्मचारी असून ते मधेश प्रांतातील सप्तरी जिल्ह्यातील रहिवासी आहेत. प्रकल्पात ते फोरमन म्हणून कार्यरत होते. दुर्घटना घडली तेव्हा ते कंट्रोल रूममध्ये काम करत होते.

“गेल्या नऊ दिवसांपासून मी हरे कृष्ण महामंत्राचा जप करत होतो,” असे सुटका झाल्यानंतर साह यांनी सुरक्षा कर्मचाऱ्यांना सांगितले.

नेपाळी लष्कराने जारी केलेल्या व्हिडिओमध्ये संजय साह यांना एका कामगाराच्या पाठीवर बसवून बोगद्यातून बाहेर आणताना दिसत आहे. त्यांच्या चेहऱ्यावर आणि शरीरावर चिखल लागलेला होता.

इतरांना वाचवण्यासाठी स्वतः मागे राहिले

साह यांनी सांगितले की, दुर्घटनेची माहिती मिळाल्यानंतर त्यांनी इतर कामगारांना सुरक्षित बाहेर जाण्याचा इशारा दिला. मात्र, इतरांच्या सुरक्षेची जबाबदारी आपली असल्याचे वाटल्याने ते मागे राहिले. स्वतः बाहेर पडण्याचा प्रयत्न करेपर्यंत परिस्थिती हाताबाहेर गेली होती.

पुण्यानंतर नागपुरातही ‘डीजे’मुक्त गणेशोत्सवाची मागणी; संदीप जोशींचा पुढाकार, नागरिकांकडून स्वाक्षऱ्या घेणार

त्यानंतर तब्बल नऊ दिवस ते बोगद्यातील अंधारात अडकून राहिले. जवळ असलेल्या आणखी तीन-चार कामगारांशी ते बोलून किंवा आवाज करून संपर्क साधत होते.

बोगदा खूप लांब असल्याने आणखी काही कामगार आत अडकले असण्याची शक्यता त्यांनी व्यक्त केली. पुराच्या पाण्याच्या प्रचंड प्रवाहामुळे काही जण बोगद्याच्या आणखी आत वाहून गेले असावेत, असेही त्यांनी सांगितले.

दोन कामगारांची सुखरूप सुटका

शुक्रवारी संजय साह यांच्यासह 45 वर्षीय कबीर महारजन यांचीही सुटका करण्यात आली. महारजन हे प्रकल्पात मेकॅनिकल सुपरवायझर म्हणून कार्यरत होते. प्रकृतीत काही गुंतागुंत निर्माण झाल्याने त्यांना पुढील उपचारांसाठी हेलिकॉप्टरने काठमांडू येथील नेपाळ आर्मी हॉस्पिटलमध्ये दाखल करण्यात आले. साह यांना त्रिशुली येथील स्थानिक रुग्णालयात उपचारासाठी नेण्यात आले असून त्यांची प्रकृती स्थिर असल्याचे सुरक्षा अधिकाऱ्यांनी सांगितले.

सहा जलविद्युत प्रकल्पांमध्ये शेकडो जण अडकले?

त्रिशुली नदी परिसरातील सहा जलविद्युत प्रकल्पांशी संबंधित बोगद्यांमध्ये अद्याप मोठ्या संख्येने कामगार अडकले असण्याची शक्यता आहे. अधिकाऱ्यांच्या माहितीनुसार, सुमारे 900 जण बोगद्यांमध्ये अडकले असण्याची शक्यता आहे. स्वतंत्र वीज उत्पादक संघटनेनुसार, 11 जलविद्युत प्रकल्पांवरील 600 हून अधिक कामगार अद्याप बेपत्ता आहेत.

नेपाळी लष्कराच्या नेतृत्वाखाली विशेष उपकरणांच्या मदतीने शोध आणि बचावकार्य सुरू आहे.

महापुराने नेपाळमध्ये मोठी हानी

26 ऑगस्ट रोजी नेपाळ-तिबेट सीमेवरील बर्फ आणि खडकांच्या हिमस्खलनामुळे आलेल्या अचानक पुराने उत्तर आणि मध्य नेपाळमध्ये मोठी हानी झाली. अनेक गावे, रस्ते आणि शाळा पुराच्या पाण्यात वाहून गेल्या.

उपलब्ध माहितीनुसार, नेपाळमध्ये आतापर्यंत 1,287 जणांचा मृत्यू झाला असून 5,083 जण बेपत्ता आहेत. हजारो नागरिक विस्थापित झाले आहेत. चीनच्या तिबेट भागातही 21 जणांचा मृत्यू झाल्याची माहिती असून 541 जण बेपत्ता असल्याचे सांगण्यात आले आहे.

नऊ दिवस बोगद्यात अंधारात अडकूनही ‘हरे कृष्ण’ महामंत्राचा जप करत संजय साह यांनी ठेवलेला धीर आणि अखेर जन्माष्टमीच्या दिवशी झालेली सुटका या घटनेची सर्वत्र चर्चा होत आहे.