UGC-NETच्या तीन विषयांची फेरपरीक्षा; NTAकडून वेळापत्रक जाहीर

By, wankhadepravin - August 17, 2026 08:30:05

0

विशेष प्रतिनिधी

नवी दिल्ली : UGC-NET जून 2026 परीक्षेबाबत राष्ट्रीय चाचणी संस्था (NTA) यांनी महत्त्वाचा निर्णय घेतला आहे. इंग्रजी, वाणिज्य आणि समाजशास्त्र या तीन विषयांची परीक्षा पुन्हा घेण्यात येणार असून, NTAने फेरपरीक्षेचे वेळापत्रक जाहीर केले आहे. विशेष म्हणजे, या फेरपरीक्षेसाठी उमेदवारांकडून कोणतेही अतिरिक्त शुल्क आकारले जाणार नाही.

NTAने यापूर्वी 22 ते 30 जून 2026 या कालावधीत 87 विषयांसाठी UGC-NET परीक्षा घेतली होती. ज्युनियर रिसर्च फेलोशिप (JRF), सहाय्यक प्राध्यापक पदासाठी पात्रता तसेच PhD प्रवेशासाठी ही परीक्षा घेतली जाते.

संविधानाच्या गप्पा, पण चर्चेपासून पळ! फडणवीसांचा विरोधकांना थेट सवाल

इंग्रजी, वाणिज्य आणि समाजशास्त्र विषयांच्या प्रश्नपत्रिकांमध्ये गंभीर स्वरूपाच्या त्रुटी आढळल्याच्या अनेक तक्रारी NTAकडे प्राप्त झाल्या होत्या. त्यानंतर या प्रश्नपत्रिकांची तपासणी करण्यासाठी विशेष समिती स्थापन करण्यात आली. समितीच्या तपासणीत तथ्यात्मक, टंकलेखन, भाषांतर तसेच प्रश्नांच्या रचनेशी संबंधित अनेक चुका आढळून आल्या.

प्रसिद्ध अभ्यासकांच्या नावांच्या स्पेलिंगमध्ये चुका, पुस्तकांच्या शीर्षकांमध्ये त्रुटी, तसेच प्रश्नांमध्ये व्याकरण, लिंग आणि एकवचन-अनेकवचनाशी संबंधित चुका असल्याचे निदर्शनास आले. याशिवाय, प्रस्थापित संकल्पनांसाठी अ-प्रमाणित शब्दावलीचा वापर करण्यात आला होता. मागील परीक्षांमध्ये विचारण्यात आलेले अनेक प्रश्न पुन्हा समाविष्ट करण्यात आल्याचेही समितीच्या निदर्शनास आले.

NTAच्या म्हणण्यानुसार, ‘चॅलेंज’ प्रक्रियेद्वारे केवळ काही प्रश्न वगळून या सर्व गंभीर त्रुटी दूर करणे शक्य नव्हते. त्यामुळे इंग्रजी, वाणिज्य आणि समाजशास्त्र या तीन विषयांची परीक्षा नव्याने घेण्याचा निर्णय घेण्यात आला आहे.

फेरपरीक्षेसाठी परीक्षा केंद्रे, शहरांची यादी आणि प्रवेशपत्रांबाबतची माहिती NTAकडून स्वतंत्रपणे अधिकृत संकेतस्थळावर प्रसिद्ध केली जाणार आहे. उमेदवारांनी अधिकृत सूचनांकडे लक्ष ठेवण्याचे आवाहन करण्यात आले आहे.