बारामतीकरांसाठी मोठी बातमी! सुनेत्रा पवारांच्या बैठकीत पाणीप्रश्नावर महत्त्वाचा निर्णय

By, wankhadepravin - October 30, 2026 01:00:27

0

विशेष प्रतिनिधी

बारामती : तालुक्यातील दुष्काळी भागातील शेतकऱ्यांसाठी दिलासादायक निर्णय घेण्यात आला आहे. जनाई-शिरसाई उपसा सिंचन योजनेसाठी ८०० एमसीएफटी पाणी उपलब्ध करून देण्यास मान्यता मिळाली असून, येत्या २ नोव्हेंबरपासून वरवंड आणि शिर्सुफळ तलावांमध्ये पाणी सोडण्यास सुरुवात होणार आहे. त्यामुळे सिंचनाच्या पाण्याची प्रतीक्षा करणाऱ्या शेतकऱ्यांना मोठा दिलासा मिळण्याची अपेक्षा आहे. Sunetra Pawar

उपमुख्यमंत्री सुनेत्रा पवार यांच्या अध्यक्षतेखाली पुण्यातील विधान भवनात झालेल्या कालवा सल्लागार समितीच्या बैठकीत हा महत्त्वपूर्ण निर्णय घेण्यात आला. या बैठकीला जलसंपदामंत्री राधाकृष्ण विखे पाटील, मंत्री दत्तात्रय भरणे यांच्यासह जिल्ह्यातील लोकप्रतिनिधी उपस्थित होते. बारामती तालुक्यातील दुष्काळी परिस्थिती आणि शेतीसाठी वाढती पाण्याची गरज लक्षात घेऊन जनाई-शिरसाई योजनेच्या आवर्तनाबाबत बैठकीत चर्चा झाली. त्यानंतर योजनेसाठी ८०० एमसीएफटी पाणी उपलब्ध करून देण्यास मान्यता देण्यात आली.

‘सत्ता बदलायची असेल तर निवडणुका जिंका’; रेजीम चेंजच्या मुद्द्यावर फडणवीसांचा विरोधकांना इशारा

जनाई-शिरसाई उपसा सिंचन योजना पूर्ण क्षमतेने कार्यान्वित करण्यासाठी संबंधित अधिकाऱ्यांच्या समन्वयातून पाणी वितरणाचे नियोजन करण्यात येणार आहे. साधारणतः ३० ते ३५ दिवस योजना सुरू ठेवण्याचे प्रस्तावित आहे. २ नोव्हेंबरपासून वरवंड आणि शिर्सुफळ तलावांमध्ये पाणी सोडण्यास सुरुवात होणार असल्याने परिसरातील सिंचनाचा प्रश्न मार्गी लागण्यास मदत होणार आहे. बारामती तालुक्यातील दुष्काळी गावांमधील शेती मोठ्या प्रमाणावर सिंचनाच्या पाण्यावर अवलंबून आहे.

पावसातील अनिश्चिततेमुळे शेतकऱ्यांना पाण्याचे नियोजन करताना अडचणींचा सामना करावा लागतो. अशा परिस्थितीत जनाई-शिरसाई योजनेसाठी मंजूर झालेल्या पाण्यामुळे शेतीला आधार मिळण्याची अपेक्षा आहे. उपलब्ध पाण्याचे योग्य वितरण झाल्यास त्याचा फायदा परिसरातील शेतकऱ्यांना होऊ शकतो. या निर्णयाची माहिती बारामती तालुका राष्ट्रवादी काँग्रेसचे अध्यक्ष संदीप बांदल यांनी दिली.