पुण्यात उष्णतेचा पारा वाढला, आता पावसाची शक्यता?

By, wankhadepravin - September 21, 2026 05:30:31

0

विशेष प्रतिनिधी

पुणे : पुणे शहर आणि जिल्ह्यात गेल्या काही दिवसांपासून कमाल तापमानात वाढ होत असताना आता पावसाच्या सरींची शक्यता निर्माण झाली आहे. वाढत्या उष्णतेमुळे स्थानिक पातळीवर ढगनिर्मितीसाठी अनुकूल वातावरण तयार होऊ शकते. त्यामुळे पुण्यासह राज्यातील विविध भागांत पावसाची शक्यता हवामान विभागाने वर्तवली आहे. काही ठिकाणी मेघगर्जना, विजांचा कडकडाट आणि सोसाट्याच्या वाऱ्यासह वादळी पाऊस पडण्याची शक्यता आहे. Meteorological Department.

पुण्यात संध्याकाळी वातावरण बदलण्याची शक्यता

पुणे शहर आणि परिसरात संध्याकाळच्या सुमारास काही ठिकाणी ढग दाटून येण्याची शक्यता आहे. स्थानिक हवामान परिस्थितीनुसार मेघगर्जनेसह पावसाच्या सरी पडू शकतात. उत्तर मध्य महाराष्ट्र, मराठवाडा आणि विदर्भातील विविध भागांतही वादळी पावसाचा अंदाज देण्यात आला आहे.

एसटीच्या १२५ बसस्थानकांवर उभारणार ‘हिरकणी कक्ष’; स्तनदा मातांसाठी सुरक्षित आणि खासगी सुविधा

गेल्या दोन दिवसांत पुण्यातील तापमानात वाढ झाली आहे. शहरात कमाल तापमान ३१.७ अंश सेल्सिअस, तर किमान तापमान २२.२ अंश सेल्सिअस नोंदवण्यात आले. जिल्ह्यातील काही भागांत कमाल तापमान ३३ अंश सेल्सिअसच्या पुढे गेले आहे. त्यामुळे सकाळच्या वेळी उन्हाची तीव्रता जाणवत असून, रात्री आणि पहाटेच्या वेळेतील गारवाही कमी झाला आहे.

बंगालच्या उपसागरातील हवामान प्रणालीचा परिणाम?

बंगालच्या उपसागरात कमी दाबाचे क्षेत्र निर्माण होण्याची शक्यता असून, त्याचा महाराष्ट्रातील हवामानावर परिणाम होऊ शकतो. या हवामान प्रणालीमुळे राज्यातील काही भागांत पावसासाठी पोषक वातावरण तयार होण्याची शक्यता आहे. मात्र, पुण्यात पावसाचे प्रमाण आणि नेमकी तीव्रता स्थानिक हवामान परिस्थितीवर अवलंबून राहणार आहे.

राज्यात पावसाची तूट; शेतकऱ्यांची चिंता वाढली

१ ते १४ सप्टेंबरदरम्यान राज्यात सरासरीच्या तुलनेत १६ टक्के पावसाची कमतरता नोंदवण्यात आली. मराठवाड्यात पावसाची तूट ३६ टक्के, तर विदर्भात २४ टक्के राहिली. मध्य महाराष्ट्र आणि कोकणातही पावसाची स्थिती समाधानकारक नसल्याचे नमूद करण्यात आले आहे.

पावसातील तुटीमुळे शेतीच्या पाण्याचा प्रश्न आणि पिकांच्या स्थितीबाबत शेतकऱ्यांच्या चिंतेत वाढ झाली आहे. आगामी काळात राज्यातील विविध भागांत होणाऱ्या पावसाकडे शेतकरी आणि नागरिकांचे लक्ष लागले आहे.