मराठवाड्याचा दुष्काळ कायमचा संपणार? फडणवीसांनी सांगितला मोठा प्लॅन; कृष्णाखोऱ्यातून ३०, कोकणातून ७० टीएमसी पाणी आणणार!

By, wankhadepravin - September 17, 2026 04:00:59

0

विशेष प्रतिनिधी

छत्रपती संभाजीनगर : मराठवाड्याने स्वातंत्र्यासाठी संघर्ष केला, आता दुष्काळाशी लढा सुरू आहे. पावसाने ओढ दिल्याने शेतकरी चिंतेत असला, तरी शासन त्यांच्या पाठीशी ठामपणे उभे आहे. मराठवाड्याच्या दुष्काळाची समस्या कायमस्वरूपी दूर करण्यासाठी कृष्णाखोरे आणि कोकणातील वाहून जाणारे पाणी मराठवाड्यात आणण्याचा सरकारचा संकल्प आहे, अशी माहिती मुख्यमंत्री देवेंद्र फडणवीस यांनी दिली. पुढील सात वर्षांत टप्प्याटप्प्याने हे काम पूर्ण करण्याचा विश्वासही त्यांनी व्यक्त केला. Marathwada

मराठवाडा मुक्तिसंग्राम दिनानिमित्त छत्रपती संभाजीनगर येथील सिद्धार्थ उद्यानात आयोजित मुख्य शासकीय सोहळ्यात मुख्यमंत्री फडणवीस बोलत होते. त्यांच्या हस्ते ध्वजारोहण करण्यात आले. यावेळी त्यांनी शहीद स्मारकास पुष्पचक्र अर्पण करून अभिवादन केले. त्यानंतर पोलिसांकडून तीन फैरी झाडून मानवंदना देण्यात आली.

या सोहळ्यास सामाजिक न्यायमंत्री तथा जिल्ह्याचे पालकमंत्री संजय शिरसाट, महापौर समीर राजूरकर, जिल्हा परिषदेचे अध्यक्ष अविनाश गलांडे, खासदार संदिपान भुमरे, डॉ. कल्याण काळे, विविध आमदार, विभागीय आयुक्त जी. श्रीकांत, जिल्हाधिकारी विनय गौडा जी.सी., मनपा आयुक्त अमोल येडगे, वरिष्ठ पोलीस अधिकारी, मुक्तिसंग्राम सैनिक, त्यांचे कुटुंबीय आणि विविध क्षेत्रांतील मान्यवर उपस्थित होते.

पुढील पिढीला दुष्काळ पाहू देणार नाही

मुख्यमंत्री फडणवीस म्हणाले की, मराठवाड्याच्या या पिढीने दुष्काळाचा सामना केला आहे. मात्र, पुढील पिढीला दुष्काळ पाहावा लागू नये, असा संकल्प सरकारने केला आहे. त्यासाठी जलसंधारण, नदीजोड प्रकल्प आणि पाणी हस्तांतरणाच्या माध्यमातून दीर्घकालीन उपाययोजनांवर काम सुरू आहे.

कृष्णा खोऱ्यातील पाणी भीमा खोऱ्यातून अतिरिक्त ३० टीएमसी पाणी मराठवाड्यात आणण्याचे काम सुरू करण्यात येणार आहे. या प्रकल्पामुळे धाराशिव, बीड आणि लातूरच्या भागांना पाणी उपलब्ध करून देण्यास मदत होईल, असे त्यांनी सांगितले.

याशिवाय, उल्हास खोऱ्यातून कोकणातील पाणी गोदावरी खोऱ्यात आणण्यासाठी नदीजोड प्रकल्पाचा अहवाल तयार करण्याचे काम अंतिम टप्प्यात असल्याचे मुख्यमंत्र्यांनी नमूद केले. या माध्यमातून जवळपास ७० टीएमसी पाणी गोदावरी खोऱ्यात आणण्याचा अंदाज आहे. टप्प्याटप्प्याने सात वर्षांत ही कामे पूर्ण करण्याचे नियोजन असल्याचे त्यांनी स्पष्ट केले.

शेतकऱ्यांना सर्व प्रकारची मदत देणार

यंदा पावसाचा मोठा खंड पडल्याने शेती आणि पिकांचे मोठ्या प्रमाणात नुकसान झाले आहे. शेतकरी चिंतेत असून, कोणत्याही परिस्थितीत सरकार त्यांच्या पाठीशी उभे राहील, अशी ग्वाही मुख्यमंत्री फडणवीस यांनी दिली.

ते म्हणाले, “शेतकऱ्यांना सर्व प्रकारची मदत देण्यात येईल. पंचनाम्यांची प्रक्रिया ५ ऑक्टोबरनंतर पूर्ण करून शेतकऱ्यांना मदत केली जाईल.” पिण्याचे पाणी, चारा आणि टंचाई निवारणासाठी आवश्यक नियोजन करण्यात आल्याचेही त्यांनी सांगितले.

१५ लाखांहून अधिक शेतकरी कर्जमुक्त

शेतकऱ्यांसाठी सरकारने सुरू केलेल्या पुण्यश्लोक अहिल्यादेवी होळकर शेतकरी कर्जमुक्ती योजनेचा सर्वाधिक लाभ मराठवाड्यातील शेतकऱ्यांना मिळाल्याचे मुख्यमंत्री म्हणाले. आतापर्यंत १५ लाखांहून अधिक शेतकरी कर्जमुक्त झाले आहेत.

शेतकऱ्यांना मोफत वीज देण्याचा निर्णय यापूर्वीच घेण्यात आला आहे. यासोबतच जवळपास ४८ हजार कोटी रुपयांची जुनी वीज बिले रद्द करण्याचा निर्णय सरकारने घेतल्याची माहिती फडणवीस यांनी दिली.

छत्रपती संभाजीनगरमध्ये प्रत्येक घरी रोज पाणी

छत्रपती संभाजीनगर शहराच्या पाणीपुरवठा योजनेचे काम अंतिम टप्प्यात पोहोचले आहे. या योजनेसाठी निधीची कमतरता पडू दिली नाही. कामातील अडचणी दूर करून प्रकल्पाला गती देण्यात येत आहे. लवकरच शहरातील प्रत्येक घरात दररोज पिण्याचे पाणी पोहोचवण्याच्या दिशेने वाटचाल सुरू असल्याचे मुख्यमंत्री फडणवीस यांनी सांगितले.

इलेक्ट्रिक वाहन निर्मितीचे प्रमुख केंद्र होणार

छत्रपती संभाजीनगरमध्ये शेंद्रा-बिडकीन औद्योगिक वसाहत आणि डीएमआयसी क्लस्टरच्या माध्यमातून मोठ्या प्रमाणात औद्योगिक विकास होत आहे. समृद्धी महामार्ग आणि पश्चिम उन्नत द्रुतगती मार्गामुळे या भागातील दळणवळण सुविधांना चालना मिळाली आहे.

टोयोटा, जेएसडब्ल्यू आणि एथर यांसारख्या कंपन्यांच्या गुंतवणुकीमुळे आगामी काळात छत्रपती संभाजीनगर हे देशातील इलेक्ट्रिक वाहन निर्मितीचे प्रमुख केंद्र बनण्याची शक्यता असल्याचे मुख्यमंत्री म्हणाले.

औद्योगिक विस्तारासाठी आणखी ८ हजार एकर जागा अधिग्रहित करून औद्योगिक वसाहत वाढवण्याचे काम सुरू आहे. या गुंतवणुकीमुळे रोजगाराच्या संधी निर्माण होऊन मराठवाड्याच्या आर्थिक विकासाला चालना मिळेल, असे त्यांनी स्पष्ट केले.

एसटीच्या १२५ बसस्थानकांवर उभारणार ‘हिरकणी कक्ष’; स्तनदा मातांसाठी सुरक्षित आणि खासगी सुविधा

जालना ड्रायपोर्ट आणि सहापदरी रस्त्यांना गती

जालना ड्रायपोर्टचे काम सुरू झाले असून, छत्रपती संभाजीनगरमध्ये तयार होणाऱ्या इलेक्ट्रिक वाहनांच्या आयात-निर्यातीसाठी त्याचा उपयोग होणार आहे. संरक्षण उत्पादन क्षेत्रातही या भागाला मोठी संधी असल्याचे मुख्यमंत्र्यांनी सांगितले.

शेंद्रा-बिडकीन आणि बिडकीन-ढोरेगाव हे दोन रस्ते सहापदरी करण्यासाठी साडेतीन हजार कोटी रुपयांची तरतूद करण्यात आली आहे. शहरातील वाहतूक कोंडी कमी करण्यासाठी सर्वांत लांब उन्नत रस्ता उभारण्याचे कामही सुरू असल्याची माहिती त्यांनी दिली.

आरोग्य सुविधांच्या विस्तारावर भर

छत्रपती संभाजीनगरच्या शासकीय वैद्यकीय महाविद्यालयात ७१० कोटी रुपये खर्चून नवीन इमारत उभारण्याचे काम सुरू आहे. धाराशिवमध्ये ५०० खाटांचे अद्ययावत रुग्णालय आणि वैद्यकीय महाविद्यालय उभारण्याची योजना आहे. तसेच, परळी येथे ५६५ कोटी रुपये खर्चून पशुवैद्यकीय महाविद्यालय उभारण्याचे काम सुरू असल्याचे मुख्यमंत्री फडणवीस यांनी सांगितले.

सर्व घटकांच्या विकासासाठी सरकार कटिबद्ध

मराठवाडा हा अनेक अडचणींचा सामना करणारा आकांक्षी प्रदेश आहे. समाजातील सर्व घटकांना सोबत घेऊन प्रदेशाला विकासाच्या वाटेवर आणण्याचे काम सुरू आहे. शिक्षण, रोजगार आणि आरोग्य सुविधांच्या माध्यमातून नागरिकांच्या जीवनात परिवर्तन घडवण्याचा सरकारचा प्रयत्न असल्याचे मुख्यमंत्री फडणवीस यांनी सांगितले.

कार्यक्रमानंतर मुख्यमंत्र्यांनी मुक्तिसंग्राम सैनिक आणि त्यांच्या कुटुंबीयांची भेट घेऊन संवाद साधला.