‘किलर बहू’ला वसीयततून वगळल्याचा मुद्दा तपासाच्या केंद्रस्थानी; 300 हून अधिक कॉल्समुळे मुलावरही पोलिसांचा संशय

By, wankhadepravin - September 16, 2026 04:00:47

0

विशेष प्रतिनिधी

कानपूर : फार्मास्युटिकल व्यापारी विनीत मनोचा यांच्या हत्या प्रकरणात पोलिसांचा तपास आता त्यांच्या 2022 मधील वसीयत, मालमत्तेचे वाटप आणि संशयितांमधील फोन संभाषणांभोवती फिरत आहे. 63 वर्षीय विनीत मनोचा यांच्या वसीयतीत पत्नी पुनीता, मुलगा सुब्रत आणि मुलगी शुभानी यांना मालमत्तेत हिस्सा देण्यात आला होता; मात्र त्यांची सून शालू हिला वसीयतीतून वगळण्यात आले होते. त्यामुळे मालमत्तेच्या वाटपाचा आणि हत्येचा काही संबंध आहे का, याचा तपास पोलिसांकडून केला जात आहे. killer daughter-in-law

दरम्यान, शालूचा वकील शिवकांत दीक्षित यांनी पोलिसांकडून जप्त करण्यात आलेल्या तिच्या मोबाईलच्या हाताळणीवर प्रश्न उपस्थित केले आहेत. 6 सप्टेंबर रोजी सकाळी 10.03 वाजता त्या मोबाईलशी संबंधित इन्स्टाग्राम अकाउंटवर हालचाल झाल्याचा दावा त्यांनी केला असून, याची स्वतंत्र चौकशी करण्याची मागणी केली आहे. हत्येच्या रात्री सुब्रत एका बँकेत गेल्याचेही सांगितले जात असून, या बाबीची चौकशी करण्याची मागणी वकिलांनी केली आहे.

शालूचा सहभाग नाकारण्याचा दावा

पोलिसांनी न्यायालयाची परवानगी घेतल्यानंतर सोमवारी तुरुंगात शालू आणि माजी नोकर विशाल गौतम यांची चौकशी केली. पोलिसांच्या म्हणण्यानुसार, शालूने हत्येतील सहभाग नाकारला आहे. मात्र, विशाल गौतमने पुन्हा एकदा शालूच्या सांगण्यावरून विनीत यांची हत्या केल्याचा दावा केला आहे.

पोलीस आयुक्त रघुबीर लाल यांच्या म्हणण्यानुसार, विशालने 3 सप्टेंबर रोजी नवा सिमकार्ड घेतला होता. त्याने त्याच दिवशी जुना नंबर वापरणे बंद केले. हत्या होण्याच्या दोन दिवस आधी घेतलेल्या या नव्या क्रमांकावरून त्याने शालूसह सुब्रतशीही संपर्क साधला होता.

“जर शालूने हत्येचा कट रचला असेल आणि विशालने गुन्ह्यासाठी नवीन नंबर घेतला असेल, तर त्या नंबरवरून सुब्रतला फोन का करण्यात आला?” असा सवाल पोलीस आयुक्तांनी उपस्थित केला आहे. त्यामुळे सुब्रतची संभाव्य भूमिका आणि विशालसोबतचे त्याचे संबंधही तपासाच्या कक्षेत आले आहेत.

प्रसाद वाटप करणाऱ्या गणेश मंडळांना एफडीए नोंदणी बंधनकारक

सुब्रत-विशालमध्ये 300 हून अधिक संभाषणे

पोलिसांनी सात मोबाईल क्रमांकांचे कॉल डिटेल रेकॉर्ड तपासले असून, त्यामध्ये सुब्रत आणि विशाल यांच्यातील 300 हून अधिक संभाषणे समोर आली आहेत. तपासण्यात आलेल्या क्रमांकांपैकी ही सर्वाधिक संभाषणे असल्याने पोलिसांचा संशय अधिक वाढला आहे.

पोलिसांनी दोन क्रमांक विशालचे, तीन क्रमांक सुब्रतचे आणि दोन क्रमांक शालूचे तपासले आहेत. या सर्व क्रमांकांचे सुमारे 1,000 पानांचे कॉल डिटेल रेकॉर्ड पोलिसांच्या हाती लागले आहेत. 1 मेपासून हत्येच्या रात्रीपर्यंतचे हे रेकॉर्ड तपासले जात असून, हत्येपूर्वी आणि हत्येनंतर झालेले फोन, संभाषणाचा कालावधी तसेच कोणाशी संपर्क साधण्यात आला, याचा बारकाईने तपास सुरू आहे.

कर्जबाजारीपणाचाही तपास

विनीत मनोचा यांच्या मालमत्ता आणि आर्थिक व्यवहारांचीही पोलिसांकडून चौकशी सुरू आहे. कानपूर आणि गाझियाबादमध्ये त्यांची मालमत्ता असल्याचे तपासात समोर आले आहे. बिरहाना रोडवरील फ्लॅट, कॅनॉल रोडवरील मालमत्ता तसेच इतर मालमत्तांचाही तपास केला जात आहे.

पोलिस आयुक्तांच्या माहितीनुसार, सुब्रतवर ऑनलाइन कर्ज आणि इतर आर्थिक देणी असल्याचे संकेत तपासात मिळाले आहेत. त्यामुळे आर्थिक अडचणी आणि वडिलांच्या मालमत्तेचा या हत्येशी काही संबंध होता का, याचा तपास केला जात आहे.

हत्येनंतर भिंत ओलांडून पलायन

पोलिसांच्या माहितीनुसार, हत्या केल्यानंतर विशाल आणि त्याचा साथीदार राजकिशोर हे इंदिरानगर येथील रतन ऑर्बिट अपार्टमेंटमधून भिंत ओलांडून पसार झाले. त्यानंतर त्यांनी टॅक्सी बुक केल्याचे समोर आले आहे. दोघांनी एका मित्राला पाच वेळा फोन केल्याचेही तपासात आढळले आहे.

या मित्राचीही चौकशी करण्याची तयारी पोलिसांनी सुरू केली आहे. हत्येनंतर विशालने या मित्राला घटनेची माहिती दिली होती का किंवा त्याच्याकडून मदत मागितली होती का, याचा तपास केला जात आहे.

‘सुब्रतचे नाव घ्या’, असा विशालला सल्ला?

पोलिसांच्या म्हणण्यानुसार, विशालने यापूर्वी चौकशीदरम्यान असा दावा केला होता की, पकडले गेल्यास सुब्रतचे नाव घेण्यास शालूने त्याला सांगितले होते. मात्र, या दाव्याची स्वतंत्रपणे पडताळणी पोलिसांकडून केली जात आहे.

आता वसीयत, मालमत्तेचे वाटप, आर्थिक व्यवहार, कॉल डिटेल रेकॉर्ड आणि संशयितांमधील संपर्क या सर्व बाबी एकत्रितपणे तपासल्या जात आहेत. शालू आणि विशाल यांची पुन्हा चौकशी करण्यासाठी पोलिस कोठडी मागण्याची तयारी करत असून, पुढील टप्प्यात शालू, विशाल आणि सुब्रत यांची समोरासमोर चौकशी करण्याची शक्यता आहे.