सुट्टे खाद्यतेल विक्रीसाठी सरकारची मोठी घोषणा; तुकाराम मुंढेंचा निर्णय तूर्तास स्थगित, १ वर्षाची मुदतवाढ

By, wankhadepravin - September 1, 2026 07:00:54

0

विशेष प्रतिनिधी

मुंबई : सुट्टे खाद्यतेल विक्रीवर निर्बंध घालण्याच्या निर्णयावरून सुरू असलेल्या चर्चेला आता नवे वळण मिळाले आहे. राज्य सरकारने सुट्टे खाद्यतेल विक्री करणाऱ्या व्यापाऱ्यांना आणखी एक वर्षाची मुदत देण्याचा निर्णय घेतला आहे. त्यामुळे अन्न व औषध प्रशासनाचे (FDA) आयुक्त तुकाराम मुंढे यांच्या निर्णयाला तूर्तास मुदतवाढीच्या माध्यमातून दिलासा मिळाला आहे.

अन्नपदार्थांमधील भेसळ आणि निकृष्ट दर्जाच्या खाद्यपदार्थांविरोधात FDAकडून कारवाई करण्यात येत आहे. तुकाराम मुंढे यांनी आयुक्तपदाची सूत्रे स्वीकारल्यानंतर खाद्यपदार्थांच्या गुणवत्तेबाबत कठोर भूमिका घेतली आहे. याच पार्श्वभूमीवर सुट्ट्या खाद्यतेलाच्या विक्रीवर निर्बंध लागू करण्याचा निर्णय घेण्यात आला होता.

मात्र, या निर्णयामुळे छोट्या व्यापाऱ्यांना आणि पारंपरिक पद्धतीने खाद्यतेल विक्री करणाऱ्या व्यावसायिकांना मोठा आर्थिक फटका बसण्याची शक्यता असल्याचा दावा व्यापाऱ्यांकडून करण्यात आला होता.

मुख्यमंत्री फडणवीस यांच्यासोबत व्यापाऱ्यांची बैठक

सुट्टे खाद्यतेल विक्री करणाऱ्या व्यापाऱ्यांच्या शिष्टमंडळाने मुख्यमंत्री देवेंद्र फडणवीस यांची भेट घेतली. या बैठकीत व्यापाऱ्यांनी त्यांच्या व्यवसायासमोरील अडचणी मुख्यमंत्र्यांसमोर मांडल्या.

रिक्षा-टॅक्सीचालकांना मराठीसाठी आणखी एक वर्षाची मुदतवाढ

या चर्चेनंतर सरकारने सुट्टे खाद्यतेल विक्रीसाठी एक वर्षाची तात्पुरती मुदत देण्याचा निर्णय घेतला आहे. मात्र, ही मुदत संपल्यानंतर पुन्हा मुदतवाढ दिली जाणार नसल्याचे मुख्यमंत्री फडणवीस यांनी स्पष्ट केले आहे.

‘एका वर्षात व्यवसायात आवश्यक बदल करा’

मुख्यमंत्र्यांनी व्यापाऱ्यांना या एका वर्षाच्या कालावधीत आपल्या व्यवसाय पद्धतीत आवश्यक बदल करण्याचे आवाहन केले आहे. कायद्याचे पालन सर्वांनाच करावे लागेल, असेही त्यांनी स्पष्ट केले.

फडणवीस म्हणाले की, २०११ मध्ये हा कायदा करण्यात आला असून खाद्यपदार्थांची गुणवत्ता हा त्यामागील महत्त्वाचा निकष आहे. मात्र, आजही अनेक गरीब आणि सर्वसामान्य नागरिक सुट्टे तेल खरेदी करतात. त्यामुळे कायद्याची अंमलबजावणी करताना सामान्य नागरिक आणि पारंपरिक व्यावसायिक यांच्यात समतोल साधण्याची गरज आहे.

FDA आणि व्यापाऱ्यांची संयुक्त समिती

पारंपरिक पद्धतीने खाद्यतेलाचा व्यवसाय करणाऱ्या व्यापाऱ्यांना काय बदल करावे लागतील, यासाठी FDA आणि व्यापाऱ्यांची संयुक्त समिती स्थापन करण्यात येणार आहे. आवश्यकता भासल्यास राज्य सरकारकडूनही मदत केली जाईल.

त्यामुळे सध्या सुट्टे खाद्यतेल विक्री करणाऱ्या व्यापाऱ्यांना एक वर्षाचा तात्पुरता दिलासा मिळाला आहे. मात्र, या कालावधीत नियमांनुसार व्यवसाय पद्धतीत बदल करणे त्यांच्यासाठी आवश्यक असणार आहे.