पुरावे सुरक्षित असल्याचा सरकारी पक्षाचा दावा; संतोष देशमुख हत्या प्रकरणाची पुढील सुनावणी ३० सप्टेंबरला

By, wankhadepravin - September 22, 2026 11:30:58

0

विशेष प्रतिनिधी

बीड: मस्साजोगचे सरपंच संतोष देशमुख हत्या प्रकरणातील न्यायालयीन प्रक्रियेला वेग आला असून, नुकत्याच झालेल्या सुनावणीत सरकारी पक्षाने जप्त पुराव्यांची सुरक्षितता आणि सातत्य दर्शवणारी ‘चेन ऑफ कस्टडी’ कायदेशीरदृष्ट्या वैध असल्याचा युक्तिवाद केला. दोन्ही बाजूंचा युक्तिवाद ऐकल्यानंतर न्यायालयाने या प्रकरणाची पुढील सुनावणी ३० सप्टेंबर रोजी निश्चित केली आहे.

खटल्याचे गांभीर्य लक्षात घेऊन प्रत्यक्ष साक्षीदारांची साक्ष आणि पुराव्यांची उलटतपासणी शक्य तितक्या लवकर सुरू करण्यात यावी, अशी मागणीही सरकारी पक्षाने न्यायालयात केली. त्यामुळे पीडित कुटुंबाला न्याय मिळण्याची प्रक्रिया अधिक वेगाने पुढे जाईल, असा युक्तिवाद करण्यात आला.

३० सप्टेंबरच्या सुनावणीकडे लक्ष

संतोष देशमुख यांच्या हत्येनंतर बीड जिल्ह्यासह राज्यभरात तीव्र प्रतिक्रिया उमटल्या होत्या. या प्रकरणात तपास यंत्रणांनी आरोपींविरुद्ध दोषारोपपत्र दाखल केले असून, आता पुढील न्यायालयीन टप्प्याकडे सर्वांचे लक्ष लागले आहे.

संतोष देशमुख यांचे ९ डिसेंबर रोजी अपहरण करून हत्या करण्यात आल्याचा आरोप आहे. या प्रकरणाचा विशेष तपास पथकाकडून तपास सुरू असून, कृष्णा आंधळे हा आरोपी अद्याप फरार असल्याचे सांगितले जाते.

पोलिसांनी यापूर्वी न्यायालयात केलेल्या दाव्यानुसार, संतोष देशमुख यांच्या हत्येच्या दिवशी विष्णू चाटे, सुदर्शन घुले आणि वाल्मिक कराड यांच्यात फोनवर संभाषण झाले होते. अपहरणाची वेळ आणि आरोपींमधील फोन संपर्काची वेळ जवळपास समान असल्याचाही दावा तपास यंत्रणेकडून करण्यात आला आहे.

एसटीच्या १२५ बसस्थानकांवर उभारणार ‘हिरकणी कक्ष’; स्तनदा मातांसाठी सुरक्षित आणि खासगी सुविधा

छायाचित्रे आणि सीसीटीव्ही फुटेज महत्त्वाचे पुरावे

या प्रकरणात काही छायाचित्रे आणि सीसीटीव्ही फुटेज तपासाचा भाग ठरले आहेत. देशमुख यांना गंभीर मारहाण करण्यात आल्याचे दर्शवणारी छायाचित्रे समोर आली होती.

तसेच, आवादा कंपनीच्या अधिकाऱ्यांकडून कथित खंडणी मागितल्याच्या प्रकरणाशी संबंधित २९ नोव्हेंबर २०२४ रोजीचे सीसीटीव्ही फुटेजही तपासात महत्त्वाचे मानले जात आहे.

तपास यंत्रणेच्या दाव्यानुसार, त्या दिवशी विष्णू चाटे यांच्या कार्यालयात बैठक झाली होती. फुटेजमध्ये वाल्मिक कराड यांच्यासह प्रतीक घुले, सुदर्शन घुले आणि इतर काही व्यक्ती दिसत असल्याचे सांगण्यात आले आहे.

संतोष देशमुख हत्या प्रकरणाच्या पार्श्वभूमीवर निलंबित करण्यात आलेले पोलीस उपनिरीक्षक राजेश पाटील हे देखील संबंधित सीसीटीव्ही फुटेजमध्ये आरोपींसोबत दिसत असल्याचा दावा करण्यात आला आहे.

वाल्मिक कराड यांनी विष्णू चाटे यांच्या मोबाईलवरून आवादा कंपनीच्या अधिकाऱ्यांकडे दोन कोटी रुपयांची खंडणी मागितल्याचा आरोप आहे. त्यामुळे संबंधित सीसीटीव्ही फुटेज आणि कॉल रेकॉर्ड या प्रकरणाच्या तपासात महत्त्वाचे पुरावे मानले जात आहेत.

या सर्व आरोपांची अंतिम सत्यता न्यायालयीन प्रक्रियेत पुरावे, साक्षी आणि दोन्ही बाजूंच्या युक्तिवादांच्या आधारे निश्चित होणार आहे.