शेतकऱ्याच्या घरी भरीत-भाकरीचे जेवण, गावातच मुक्काम; फडणवीसांनी शेतकऱ्यांसोबत साजरी केली दिवाळी, १८ लाख शेतकऱ्यांसाठी मोठी घोषणा!

By, wankhadepravin - November 8, 2026 02:30:10

0

दुष्काळाच्या पार्श्वभूमीवर नागपूर जिल्ह्यातील लोहारी सावंगा गावाला मुख्यमंत्र्यांची भेट; शेतकऱ्यांशी साधला संवाद, अडचणी सोडवण्याचे दिले आश्वासन

विशेष प्रतिनिधी

नागपूर : राज्यातील दुष्काळी परिस्थितीमुळे संकटात सापडलेल्या शेतकऱ्यांना धीर देण्यासाठी मुख्यमंत्री देवेंद्र फडणवीस यांनी यंदाची दिवाळी शेतकऱ्यांसोबत साजरी केली. नागपूर जिल्ह्यातील नरखेड तालुक्यातील लोहारी सावंगा या गावाला भेट देत त्यांनी शेतकऱ्यांशी संवाद साधला. विशेष म्हणजे, गावातील शेतकरी रामभाऊ बालपांडे यांच्या घरी भरीत-भाकरीचे जेवण करून मुख्यमंत्र्यांनी गावातच मुक्काम केला. यावेळी शेतकऱ्यांच्या समस्या जाणून घेत त्यावर मार्ग काढण्याचे आश्वासनही त्यांनी दिले.

राज्यात यंदा कमी पर्जन्यमानामुळे अनेक भागांत दुष्काळी परिस्थिती निर्माण झाली आहे. या संकटाचा सामना करणाऱ्या शेतकऱ्यांचा आत्मविश्वास वाढावा आणि त्यांना शासन आपल्या पाठीशी असल्याची जाणीव व्हावी, या उद्देशाने शेतकऱ्यांसोबत दिवाळी साजरी करण्याची भूमिका मुख्यमंत्र्यांनी घेतली होती. त्यानुसार ७ नोव्हेंबर रोजी त्यांनी लोहारी सावंगा येथे भेट दिली.

गावात आगमन झाल्यानंतर महिलांनी पारंपरिक पद्धतीने मुख्यमंत्र्यांचे स्वागत केले. त्यानंतर त्यांनी सामुदायिक प्रार्थनेत सहभाग घेतला. रामभाऊ बालपांडे यांच्या घरी भोजन केल्यानंतर गावकऱ्यांशी संवाद साधत त्यांच्या अडचणी आणि समस्या जाणून घेतल्या.

पाणी, चारा आणि सिंचनासाठी प्रयत्न सुरू

कमी पावसामुळे निर्माण झालेल्या परिस्थितीतून शेतकऱ्यांना बाहेर काढण्यासाठी शासन सातत्याने प्रयत्न करत आहे. नागरिकांना पिण्याचे पाणी, जनावरांना चारा आणि उपलब्धतेनुसार सिंचनासाठी पाणी मिळावे, यासाठी उपाययोजना करण्यात येत असल्याचे फडणवीस यांनी सांगितले.

यावेळी शेतकऱ्यांनी विविध प्रश्न मांडले. पुरुषोत्तम वघाळे यांनी खोरी प्रकल्पाचा मुद्दा उपस्थित केला. या प्रकल्पाला मान्यता देण्यात आली असून लवकरच काम सुरू होईल, असे मुख्यमंत्र्यांनी स्पष्ट केले. तर जगदीश देशमुख यांनी ४३ वर्षांपूर्वी पायाभरणी झालेल्या पाझर तलावाचे काम अद्याप अपूर्ण असल्याची बाब निदर्शनास आणून दिली. यावर आवश्यक कार्यवाही लवकरच करण्याचे आश्वासन मुख्यमंत्र्यांनी दिले.

‘खेलो इंडिया’च्या माध्यमातून खेळ गावागावांत पोहोचला – मुख्यमंत्री देवेंद्र फडणवीस

वन्यप्राण्यांच्या त्रासावरही उपाययोजना

रोही, वाघ आणि रानडुकरांमुळे शेतीपिकांचे मोठे नुकसान होत असल्याची तक्रार राजेंद्र चाफले आणि तेजपाल चौधरी यांनी केली. वन्यप्राण्यांच्या त्रासापासून शेतकऱ्यांना दिलासा देण्याची मागणी त्यांनी केली. यावर सौर कुंपणाची योजना उपलब्ध करून दिली जात असली तरी शेतकऱ्यांचा त्याला अपेक्षित प्रतिसाद मिळत नसल्याचे मुख्यमंत्री म्हणाले. त्यामुळे शक्य असेल त्या ठिकाणी शेतीलगतच्या जंगलांना कुंपण करण्याचा प्रयत्न सुरू असल्याचे त्यांनी सांगितले.

गावकऱ्यांनी पशुवैद्यकीय दवाखाना, प्राथमिक आरोग्य केंद्र आणि रेशन धान्य वितरणासंबंधीचे प्रश्नही मांडले. दुष्काळी परिस्थिती लक्षात घेऊन सर्व प्रकारच्या शिधापत्रिकाधारकांना धान्य वितरित केले जात असल्याची माहिती मुख्यमंत्र्यांनी दिली.

१८ लाख शेतकऱ्यांना प्रत्येकी ५० हजारांचे सानुग्रह अनुदान

नियमित कर्जफेड करणाऱ्या शेतकऱ्यांनाही दिलासा मिळावा, अशी मागणी यावेळी करण्यात आली. त्यावर उत्तर देताना नियमितपणे कर्जाची परतफेड करणाऱ्या शेतकऱ्यांसाठी प्रत्येकी ५० हजार रुपयांचे सानुग्रह अनुदान देण्यात येणार असल्याचे फडणवीस यांनी सांगितले. कर्जमाफीची रक्कम जमा झाल्यानंतर नियमित कर्जफेड करणाऱ्या १८ लाख शेतकऱ्यांच्या खात्यात प्रत्येकी ५० हजार रुपये जमा केले जाणार असल्याची माहिती त्यांनी दिली.

तालुका स्तरावरही मुख्यमंत्री सहायता कक्ष

गावातील एका अभियांत्रिकीच्या विद्यार्थ्याचा अपघातात पाय निकामी झाला असून त्याला तातडीने वैद्यकीय मदतीची गरज असल्याची बाब मुख्यमंत्र्यांच्या निदर्शनास आणून देण्यात आली. यावर संबंधित युवकाच्या संपूर्ण उपचारांची जबाबदारी घेण्याचे आश्वासन त्यांनी दिले.

जिल्हास्तरावर मुख्यमंत्री सहायता निधी कक्ष सुरू करण्यात आले आहेत. आता दुष्काळी परिस्थिती लक्षात घेता तालुका स्तरावरही मुख्यमंत्री सहायता कक्ष सुरू करण्यात येत असल्याचे त्यांनी सांगितले. गावकऱ्यांनी मांडलेल्या प्रत्येक समस्येची दखल घेत संबंधित यंत्रणांना योग्य कार्यवाही करण्याचे निर्देशही मुख्यमंत्र्यांनी दिले.

गावकऱ्यांनी मानले मुख्यमंत्र्यांचे आभार

लोहारी सावंगा हे नागपूर जिल्ह्याच्या एका टोकाला असलेले गाव आहे. अशा गावाला मुख्यमंत्र्यांनी भेट देऊन शेतकऱ्यांच्या अडचणी समजून घेतल्या आणि संकटाचा सामना करण्यासाठी आत्मविश्वास दिला, अशी भावना गावकऱ्यांनी व्यक्त केली.

या दौऱ्यावेळी महसूल मंत्री चंद्रशेखर बावनकुळे, आमदार राजू पोतदार, आमदार चरणसिंह ठाकूर, आमदार आशिष देशमुख, जिल्हाधिकारी कुमार आशीर्वाद, मुख्य कार्यकारी अधिकारी विनायक महामुनी, माजी आमदार सुधाकर कोहळे आणि सरपंच विपीन चाफले यांच्यासह अन्य मान्यवर उपस्थित होते.