एका मुलाची इस्रोमध्ये निवड, दुसरी IIT मध्ये!; आता महापालिका रुग्णालयांतही कॉक्लिअर इम्प्लांट शस्त्रक्रिया, शिंदेंची घोषणा

By, wankhadepravin - November 7, 2026 07:30:29

0

ठाणे महापालिकेच्या धर्तीवर राज्यभर सुविधा सुरू करण्याचा प्रयत्न; लवकर निदान आणि उपचारांवर भर, हृदय व कॉक्लिअर इम्प्लांट शस्त्रक्रिया झालेल्या चिमुकल्यांसोबत दिवाळी स्नेहमेळावा

विशेष प्रतिनिधी

मुंबई : ऐकू आणि बोलू न शकणाऱ्या चिमुकल्यांसाठी दिलासादायक बातमी आहे. राज्यातील सर्व महानगरपालिका रुग्णालयांमध्ये कॉक्लिअर इम्प्लांट शस्त्रक्रियेची सुविधा सुरू करण्यासाठी प्रयत्न केले जाणार आहेत. ठाणे महानगरपालिकेच्या धर्तीवर इतर महापालिका रुग्णालयांमध्येही कॉक्लिअर इम्प्लांट शस्त्रक्रिया, लवकर निदान आणि उपचारांची व्यवस्था उभारण्यात येईल. यासाठी मुख्यमंत्री आणि आरोग्यमंत्र्यांशी चर्चा करणार असल्याची घोषणा उपमुख्यमंत्री एकनाथ शिंदे यांनी केली.

मलबार हिल येथील शासकीय निवासस्थान ‘नंदनवन’ येथे हृदय आणि कॉक्लिअर इम्प्लांट शस्त्रक्रिया झालेल्या मुलांसाठी आणि त्यांच्या पालकांसाठी दिवाळी स्नेहमेळाव्याचे आयोजन करण्यात आले होते. शिवसेना वैद्यकीय मदत कक्ष, डॉ. श्रीकांत शिंदे फाउंडेशन आणि आरोग्यदूत फाउंडेशन यांच्या संयुक्त विद्यमाने हा कार्यक्रम पार पडला. यावेळी उपमुख्यमंत्री शिंदे बोलत होते.

श्रीनगरमधील ७२ मुलांवर मुंबईत शस्त्रक्रिया

या कार्यक्रमाला दिवंगत अभिनेते नाना पाटेकर यांचे पुत्र मल्हार पाटेकर उपस्थित होते. त्यांनी श्रीनगरमधील ७२ मुलांना कॉक्लिअर इम्प्लांट शस्त्रक्रियेची गरज असल्याची माहिती दिली. यावर या सर्व मुलांना मुंबईत आणून त्यांच्यावर शस्त्रक्रिया करण्यात येतील, अशी ग्वाही एकनाथ शिंदे यांनी दिली.

‘खेलो इंडिया’च्या माध्यमातून खेळ गावागावांत पोहोचला – मुख्यमंत्री देवेंद्र फडणवीस

रुग्ण देशाच्या कोणत्याही भागातील असला तरी त्याच्यावर उपचार केले जातील, असेही त्यांनी स्पष्ट केले. आर्थिक परिस्थिती किंवा भौगोलिक अंतर यामुळे कोणतेही मूल उपचारांपासून वंचित राहू नये, अशी भूमिका त्यांनी मांडली.

‘वेळेत शस्त्रक्रिया झाल्यास मुलांचे आयुष्य बदलते’

उपमुख्यमंत्री शिंदे म्हणाले की, ठाणे महानगरपालिकेच्या कॉक्लिअर इम्प्लांट योजनेसाठी मुख्यमंत्री सहायता निधीतून काही खर्च देण्यात आला होता. ठाणे महापालिकेने आता या योजनेअंतर्गत लवकर निदानाची सुविधाही सुरू केली आहे. अशाच प्रकारची व्यवस्था राज्यातील इतर महानगरपालिका रुग्णालयांमध्ये सुरू करण्याचा प्रयत्न आहे.

वेळेत निदान आणि शस्त्रक्रिया झाल्यास मूल ऐकू आणि बोलू शकते. त्यामुळे त्याच्या संपूर्ण आयुष्याला नवी दिशा मिळू शकते. ही केवळ वैद्यकीय सुविधा नसून काळाची आणि समाजाची गरज असल्याचे शिंदे यांनी नमूद केले.

२८ जिल्ह्यांमध्ये पोहोचली वैद्यकीय मदत कक्षाची टीम

शिवसेना वैद्यकीय मदत कक्ष आणि डॉ. श्रीकांत शिंदे फाउंडेशन गेल्या नऊ वर्षांपासून अशा गरजू कुटुंबांच्या मदतीसाठी कार्यरत आहेत. या उपक्रमाची टीम राज्यातील २८ जिल्ह्यांमध्ये पोहोचली असून, गडचिरोलीपासून सांगलीपर्यंत गावोगावी जाऊन मुलांचे निदान करण्यात आले. त्यानंतर उपचार आणि शस्त्रक्रियांसाठी मुलांना मुंबईत आणण्यात आले.

कॉक्लिअर इम्प्लांट झालेल्या मुलांनी ठाण्यात सादर केलेल्या नाटकाचा उल्लेख करताना शिंदे भावुक झाले. या मुलांमध्ये प्रचंड बुद्धिमत्ता आणि क्षमता आहे. त्यांना केवळ मदतीचा हात देण्याची गरज आहे, असे ते म्हणाले.

या उपक्रमातून उपचार घेतलेल्या एका मुलीने आयआयटीमध्ये प्रवेश मिळवला, तर एका मुलाची इस्रोमध्ये निवड झाल्याची माहितीही त्यांनी दिली.

पालकांच्या वेदना शब्दांत सांगता येणार नाहीत

आपले मूल ऐकू किंवा बोलू शकत नाही अथवा त्याच्या हृदयाला छिद्र असल्याचे समजल्यावर पालकांवर काय परिस्थिती ओढवते, हे त्या कुटुंबांनाच समजू शकते. अशा वेळी त्यांना आधार देणे आणि मुलांना उपचार उपलब्ध करून देणे महत्त्वाचे आहे, असे शिंदे म्हणाले.

या उपक्रमासाठी डॉ. श्रीकांत शिंदे फाउंडेशनचे मंगेश चिवटे आणि त्यांच्या सहकाऱ्यांनी घेतलेल्या परिश्रमांचेही त्यांनी कौतुक केले.

यावेळी खासदार डॉ. श्रीकांत शिंदे, विविध वृत्तवाहिन्यांचे संपादक, डॉक्टर, उपचार घेतलेल्या बालकांचे पालक आणि विविध क्षेत्रांतील मान्यवर उपस्थित होते.