साखर कारखानदारांनो, आधी ऊसदर जाहीर करा! स्वाभिमानी शेतकरी संघटनेची आक्रमक भूमिका

By, wankhadepravin - October 18, 2026 08:00:51

0

साखर ५० रुपये किलो, इथेनॉल ८० रुपये लिटर दराची मागणी; नाशिकमधील साखर कारखानदारांना निवेदन

विशेष प्रतिनिधी

लासलगाव : ऊसदराचा प्रश्न मार्गी लागेपर्यंत नाशिक जिल्ह्यातील साखर कारखान्यांनी ऊसतोड सुरू करू नये, अशी ठाम मागणी स्वाभिमानी शेतकरी संघटनेने केली आहे. यासंदर्भात संघटनेच्या वतीने जिल्ह्यातील विविध साखर कारखान्यांच्या चेअरमन आणि कार्यकारी संचालकांना निवेदन देण्यात आले आहे. ऊसदर निश्चित झाल्यानंतरच गाळप हंगामाला सुरुवात करावी, अशी भूमिका संघटनेने मांडली आहे.

कादवा सहकारी साखर कारखाना, सहकार महर्षी शंकरराव काळे सहकारी साखर कारखाना, रानवड सहकारी साखर कारखाना, ग्रेनॉच इंडस्ट्रीज लिमिटेड तसेच केजीएस शुगर अँड बायो एनर्जीज लिमिटेडच्या व्यवस्थापनाला हे निवेदन देण्यात आले. ऊस उत्पादक शेतकऱ्यांच्या हिताचा विचार करून कारखानदारांनी संघटनेच्या मागणीला सहकार्य करावे, असे आवाहनही करण्यात आले आहे.

‘मराठीला ज्ञानभाषा बनवणार’; AIपासून स्पेस टेक्नॉलॉजीपर्यंत फडणवीसांचा मोठा प्लॅन

साखर आणि इथेनॉलच्या दराबाबत मागणी

खासदार राजू शेट्टी यांच्या अध्यक्षतेखाली १० ऑक्टोबर २०२६ रोजी झालेल्या ऊस परिषदेत साखरेला प्रतिकिलो ५० रुपये, तर इथेनॉलला प्रतिलिटर ८० रुपये दर देण्याची मागणी करण्यात आली होती. ऊस उत्पादक शेतकऱ्यांना त्यांच्या उत्पादनाचा योग्य मोबदला मिळावा आणि ऊसदराचा प्रश्न निकाली निघावा, यासाठी संघटना आग्रही आहे.

दरम्यान, केंद्रीय कृषिमंत्री शिवराजसिंह चौहान यांच्यासोबत दिल्ली येथे झालेली शेतकरी नेत्यांची बैठक निष्फळ ठरल्याचे संघटनेने निवेदनात नमूद केले आहे. ऊसदराच्या प्रश्नावर केंद्र सरकारकडून ठोस निर्णय घेतला जात नसल्याने शेतकऱ्यांमध्ये नाराजी असल्याचेही संघटनेचे म्हणणे आहे.

दराचा निर्णय होईपर्यंत ऊसतोड थांबवण्याची भूमिका

ऊसदराच्या प्रश्नावर केंद्र सरकारने ठोस निर्णय घ्यावा, यासाठी राज्यात आंदोलन सुरू असल्याचे संघटनेने स्पष्ट केले आहे. दर निश्चित होण्यापूर्वी कारखान्यांनी ऊसतोड सुरू केल्यास शेतकऱ्यांच्या मागण्यांकडे दुर्लक्ष होण्याची शक्यता असल्याची भूमिका संघटनेने मांडली आहे. त्यामुळे दर जाहीर होईपर्यंत कारखानदारांनी ऊसतोड सुरू करू नये, अशी मागणी करण्यात आली आहे.

ऊस उत्पादक शेतकऱ्यांना न्याय्य दर मिळणे आवश्यक असून, या प्रश्नावर कारखानदारांनी शेतकऱ्यांच्या बाजूने सहकार्य करावे, असे आवाहन स्वाभिमानी शेतकरी संघटनेने केले आहे. या निवेदनावर नाशिक जिल्हाध्यक्ष निवृत्ती गारे पाटील यांच्यासह प्रभाकर बेंडकुळे, विलास दरगुडे, गजानन घोटेकर आणि सोमनाथ कावळे यांच्या स्वाक्षऱ्या आहेत.