विशेष प्रतिनिधी
लंडन : राष्ट्रीय स्वयंसेवक संघाचे (RSS) सरसंघचालक मोहन भागवत यांच्या ब्रिटन दौऱ्यावरून नवा वाद निर्माण झाला आहे. लंडनमधील सुमारे २० नागरी आणि मानवाधिकार संघटनांनी महापौर सादिक खान यांना पत्र लिहून RSSशी संबंधित कार्यक्रमांसाठी ग्रेटर लंडन अथॉरिटीने जागा उपलब्ध करून देऊ नये, तसेच अशा कार्यक्रमांपासून प्रशासनाने अधिकृत अंतर राखावे, अशी मागणी केली आहे.
RSSच्या शताब्दी वर्षानिमित्त सुरू असलेल्या आंतरराष्ट्रीय संपर्क मोहिमेअंतर्गत अमेरिका आणि कॅनडा दौरा पूर्ण केल्यानंतर मोहन भागवत ब्रिटनमध्ये दाखल झाले आहेत. त्यांचा लंडन दौरा २ ते ७ सप्टेंबर २०२६ या कालावधीत असून, यावेळी ते ब्रिटनमधील भारतीय समुदायाला संबोधित करणार असल्याचे सांगण्यात आले आहे.
हिंदूज फॉर ह्युमन राइट्स, यूके-इंडियन मुस्लिम कौन्सिल, इंडिया लेबर सॉलिडॅरिटी आणि साऊथ एशिया सॉलिडॅरिटी ग्रुप यांच्यासह विविध संघटनांनी या पत्रावर स्वाक्षऱ्या केल्या आहेत. RSSच्या विचारसरणी आणि कार्यपद्धतीबाबत या संघटनांनी आक्षेप नोंदवले असून, भागवत यांच्या दौऱ्यामुळे ब्रिटनमधील भारतीय समुदायात ध्रुवीकरण वाढण्याची शक्यता असल्याची भीती त्यांनी व्यक्त केली आहे.
RSSशी संबंधित संघटनांच्या कार्यक्रमांबाबत लंडन प्रशासनाने सावध भूमिका घ्यावी, अशी मागणीही करण्यात आली आहे. तसेच संवेदनशील समुदायांच्या सुरक्षेसाठी प्रशासनाकडून कोणती पावले उचलली जात आहेत, याबाबत स्पष्टीकरण देण्याची मागणी या संस्थांनी केली आहे.
या संघटनांनी ब्रिटनच्या परराष्ट्र कार्यालयालाही पत्र पाठवले आहे. भागवत यांचा दौरा हा ब्रिटनमधील समर्थकांशी संपर्क वाढविण्याच्या व्यापक आंतरराष्ट्रीय मोहिमेचा भाग असल्याचा दावा त्यांनी केला आहे.
दरम्यान, ब्रिटनच्या लेबर पार्टीचे माजी नेते आणि खासदार जेरेमी कॉर्बिन यांनीही भागवत यांच्या दौऱ्यावर टीका केली आहे. RSSवर सत्तावादी आणि भेदभावपूर्ण विचारसरणीचे आरोप करत अशा विचारांना लंडनमध्ये प्रोत्साहन मिळू नये, अशी भूमिका कॉर्बिन यांनी मांडली.
लेबर खासदार नादिया व्हिटोम यांनीही भागवत यांच्या ब्रिटन प्रवेशाबाबत संसदेत लेखी प्रश्न उपस्थित केला होता. ब्रिटनच्या ‘अनअॅक्सेप्टेबल बिहेव्हियर्स’ निकषांच्या पार्श्वभूमीवर भागवत यांच्या दौऱ्याचे परीक्षण करण्यात आले आहे का, अशी विचारणा त्यांनी गृह मंत्रालयाकडे केली.
ब्रिटनचे सुरक्षा मंत्री डॅन जार्विस यांनी वैयक्तिक इमिग्रेशन प्रकरणावर भाष्य करण्यास नकार दिला. मात्र, हिंसा किंवा द्वेषाला प्रोत्साहन देणाऱ्या व्यक्तींना ब्रिटनमध्ये प्रवेश रोखण्यासाठी देशाकडे आवश्यक व्यवस्था असल्याचे त्यांनी स्पष्ट केले. वृत्तसंस्थांच्या अहवालानुसार, भागवत यांचा दौरा ब्रिटनच्या इमिग्रेशन नियमांनुसार आवश्यक अटी पूर्ण करून होत आहे.
१०० हून अधिक संघटनांकडून पाठिंबा
विरोधाच्या पार्श्वभूमीवर भागवत यांच्या ब्रिटन दौऱ्याला मोठा पाठिंबाही मिळत आहे. ब्रिटनमधील १०० हून अधिक हिंदू आणि भारतीय समुदाय संघटनांनी त्यांच्या दौऱ्याचे स्वागत केले आहे.
ब्रिटिश कंझर्व्हेटिव्ह खासदार बॉब ब्लॅकमॅन यांनीही भागवत यांच्या कार्यक्रमाचे समर्थन केले आहे. RSSच्या भविष्यातील भूमिकेबाबत त्यांचे विचार ऐकण्याची संधी मिळत असल्याबद्दल त्यांनी समाधान व्यक्त केले.
RSSने आपल्या अधिकृत निवेदनात भागवत यांचा ब्रिटन दौरा संघाच्या शताब्दी वर्षानिमित्त सेवा, सामाजिक सलोखा आणि सामायिक मूल्यांवर आधारित आंतरराष्ट्रीय संवादाचा भाग असल्याचे म्हटले आहे. दौऱ्यावरील टीकेबाबत मतभिन्नता हा लोकशाहीचा भाग असल्याचे सांगत, टीकाकारांशी संवाद साधण्याची तयारीही संघाने व्यक्त केली आहे.
न्यूयॉर्कनंतर आता लंडनमध्येही विरोध
भागवत यांच्या ब्रिटन दौऱ्यापूर्वी २९ ऑगस्ट रोजी न्यूयॉर्कमध्ये झालेल्या कार्यक्रमालाही विरोध झाला होता. या कार्यक्रमाला भागवत यांनी सुमारे ५ हजार जणांना संबोधित केले, तर कार्यक्रमस्थळाबाहेर काही नागरी आणि मानवाधिकार संघटनांनी निदर्शने केली होती.
न्यूयॉर्कमधील भाषणात भागवत यांनी धार्मिक आणि सांस्कृतिक विविधतेतून मानवी एकतेचा संदेश दिला होता. समर्थकांनी या कार्यक्रमाचे सामाजिक एकता आणि संवादासाठीचे व्यासपीठ म्हणून स्वागत केले, तर विरोधकांनी RSSच्या विचारसरणीवर प्रश्न उपस्थित केले.
आता लंडनमध्येही भागवत यांच्या दौऱ्याभोवती विरोध आणि समर्थनाचे दोन्ही प्रवाह स्पष्ट झाले आहेत. एका बाजूला २० हून अधिक संघटना प्रशासनाकडे RSSशी संबंधित कार्यक्रमांपासून दूर राहण्याची मागणी करत आहेत, तर दुसरीकडे १०० हून अधिक हिंदू आणि भारतीय समुदाय संघटनांनी भागवत यांच्या दौऱ्याचे स्वागत केले आहे.
महत्वाच्या बातम्या
To be published, comments must be reviewed by the administrator.*
Our website uses cookies to improve your experience. Learn more
Download App