खवड्या डोंगर दुर्घटनेचं गूढ वाढलं! आईच्या जुन्या व्हिडीओने कौटुंबिक वादाची धक्कादायक बाजू समोर

By, wankhadepravin - August 23, 2026 12:00:29

0

विशेष प्रतिनिधी

छत्रपती संभाजीनगर : वाळूज एमआयडीसी परिसरातील तिसगावजवळच्या खवड्या डोंगरावर २१ ऑगस्ट रोजी एकाच कुटुंबातील तिघांचा मृत्यू झाल्याच्या घटनेने परिसर हादरला आहे. मृतांमध्ये १९ वर्षीय कुणाल चांदगुडे, त्याचे वडील मुरलीधर चांदगुडे (४८) आणि आई संगीता चांदगुडे यांचा समावेश आहे. या घटनेनंतर आता प्रकरणाला कौटुंबिक वादाचा नवा अँगल समोर आला आहे.

सुरुवातीला कुणालच्या आयफोन खरेदीवरून किंवा त्याच्या ईएमआयवरून कुटुंबात वाद झाल्याची चर्चा होती. मात्र, पोलिसांनी या चर्चेला अधिकृत दुजोरा दिलेला नाही. डीसीपी नवले यांनी प्राथमिक तपासात आयफोन आणि या दुर्घटनेचा थेट संबंध असल्याचे कोणतेही पुरावे आढळले नसल्याचे स्पष्ट केले आहे.

दरम्यान, संगीता चांदगुडे यांच्या सोशल मीडिया अकाउंटवरील काही जुने व्हिडीओ समोर आले आहेत. या व्हिडीओमध्ये त्यांनी पती मुरलीधर चांदगुडे यांच्यासोबतच्या कौटुंबिक वादाबाबत भाष्य केल्याचे दिसून येते. त्यांच्या दाव्यानुसार, एका नातेवाईक महिलेच्या हस्तक्षेपामुळे त्यांच्या वैवाहिक जीवनात वाद निर्माण झाले होते.

संविधानाच्या गप्पा, पण चर्चेपासून पळ! फडणवीसांचा विरोधकांना थेट सवाल

सुमारे आठ वर्षांपूर्वी त्यांच्या एका मुलाचा मृत्यू झाल्यानंतर कुटुंबावर मोठा मानसिक आघात झाला होता. या घटनेनंतर घरातील वाद आणखी वाढल्याचे संगीता यांनी व्हिडीओमध्ये सांगितल्याचे समोर आले आहे. काही नातेवाईकांकडून आपल्याला आणि पतीला त्रास होत असल्याचाही त्यांनी दावा केल्याचे दिसते.

कुणालला वाचवण्यासाठी आईची आर्त विनवणी

घटनेच्या वेळी कुणाल डोंगरावरून खाली उडी मारण्याच्या स्थितीत असल्याचे समोर आले आहे. त्याला खाली उतरवण्यासाठी पोलिस, स्थानिक नागरिक आणि त्याची आई संगीता यांनी मोठ्या आर्ततेने विनवणी केली.

कुणालने खाली यावे, यासाठी संगीता यांनी त्याला समजावण्याचा प्रयत्न केला. कौटुंबिक वाद संपवून आपण त्याच्यासोबत राहू, अशी ग्वाही देत त्यांनी त्याला थांबवण्याचा प्रयत्न केल्याचे सांगितले जाते.

मात्र, कुणालने आपण अत्यंत निराश असल्याचे सांगत आईला भावनिक प्रतिक्रिया दिल्याचे समोर आले आहे. त्यानंतर काही क्षणांतच ही दुर्दैवी घटना घडली.

सोशल मीडिया दाव्यांचा घटनेशी नेमका संबंध काय?

संगीता चांदगुडे यांच्या सोशल मीडिया व्हिडीओमध्ये करण्यात आलेले आरोप आणि खवड्या डोंगरावरील घटनेचा नेमका संबंध काय, हा आता तपासाचा महत्त्वाचा भाग ठरणार आहे. त्यांनी उल्लेख केलेली ‘तिसरी व्यक्ती’ कोण आहे, याची चर्चाही सोशल मीडियावर सुरू झाली आहे.

मात्र, सोशल मीडिया पोस्ट किंवा व्हिडीओमध्ये केलेले दावे हे स्वतःहून अधिकृत निष्कर्ष मानता येणार नाहीत. या सर्व बाबींची सत्यता पोलिसांच्या तपासातूनच स्पष्ट होणार आहे. त्यामुळे या प्रकरणामागील नेमके कारण काय होते, हे तपास पूर्ण झाल्यानंतरच समोर येण्याची शक्यता आहे.