गणेश विसर्जनापर्यंत राजीनामा द्या, नाहीतर… MPSC अध्यक्ष-सचिवांना थेट इशारा; राज्यभर आंदोलनाची तयारी

By, wankhadepravin - September 14, 2026 08:30:49

0

विशेष प्रतिनिधी

छत्रपती संभाजीनगर : महाराष्ट्र लोकसेवा आयोगाच्या (MPSC) कारभाराविरोधात सुरू असलेल्या विद्यार्थी आंदोलनाला आता नवे वळण मिळाले आहे. विविध परीक्षांमधील कथित पेपरफुटी, परीक्षांचे नियोजन, गट ‘ब’ परीक्षेतील कथित गैरप्रकार आणि आयोगाच्या एकूण कारभारावरून विद्यार्थ्यांमध्ये असलेली नाराजी आता अधिक तीव्र होताना दिसत आहे. या आंदोलनात आता ‘कॉक्रोच जनता पार्टी’ने (CJP) उडी घेतली असून आंदोलन अधिक आक्रमक करण्याचा निर्णय घेण्यात आला आहे.Cockroach Janata Party

छत्रपती संभाजीनगर येथे MPSC विद्यार्थी, शिक्षक आणि ‘कॉक्रोच जनता पार्टी’चे संयोजक अभिजित दीपके यांची बैठक पार पडली. या बैठकीत विद्यार्थ्यांच्या विविध मागण्यांसोबतच MPSC अध्यक्ष आणि सचिव यांच्या राजीनाम्याची मागणी करण्यात आली. गणेश विसर्जनापर्यंत अध्यक्ष आणि सचिवांचा राजीनामा झाला नाही, तर राज्यभर आंदोलन छेडण्याचा इशारा बैठकीत देण्यात आला.

गणेश विसर्जनापर्यंतची मुदत; त्यानंतर राज्यव्यापी आंदोलन?

MPSC विद्यार्थ्यांच्या आंदोलनाची पुढील दिशा निश्चित करण्यासाठी झालेल्या बैठकीत सरकार आणि आयोगावर दबाव वाढवण्याची रणनीती आखण्यात आली. गणेश विसर्जनापर्यंत अध्यक्ष आणि सचिवांनी राजीनामा द्यावा, अशी भूमिका आंदोलनकर्त्यांनी घेतली आहे.

या मुदतीत मागण्यांवर ठोस निर्णय झाला नाही, तर राज्यातील विविध भागांमध्ये आंदोलन तीव्र करण्यात येईल, असा इशारा देण्यात आला. त्यामुळे आगामी काळात MPSCच्या कारभारावरून आंदोलन आणखी चिघळण्याची शक्यता आहे.

विद्यार्थ्यांच्या मागण्यांसाठी ‘CJP’ मैदानात

MPSC विद्यार्थ्यांच्या प्रश्नांवर सुरू असलेल्या आंदोलनाला पाठिंबा देण्यासाठी ‘कॉक्रोच जनता पार्टी’ने सक्रिय भूमिका घेतली आहे. आंदोलनाची पुढील रणनीती, विद्यार्थ्यांच्या मागण्या आणि आयोगाच्या कारभाराबाबत जनजागृती करण्यासाठी राज्यभर दौरा करण्याची तयारी बैठकीत करण्यात आली.

या बैठकीला विद्यार्थी आणि शिक्षकांसह CJPचे संघटन प्रमुख अजिंक्य शिंदे तसेच इतर पदाधिकारी उपस्थित होते. विद्यार्थ्यांच्या मागण्यांवर ठोस निर्णय होईपर्यंत आंदोलन सुरू ठेवण्यावर बैठकीत सर्वसंमती झाली.

पेपरफुटीच्या निषेधार्थ हजारो विद्यार्थ्यांचा आक्रोश मोर्चा

दरम्यान, पेपरफुटी आणि परीक्षांमधील कथित गैरप्रकारांच्या निषेधार्थ स्पर्धा परीक्षांची तयारी करणाऱ्या हजारो विद्यार्थ्यांनी छत्रपती संभाजीनगरमध्ये ‘आक्रोश मोर्चा’ काढला होता. हमखास मैदानापासून विभागीय आयुक्त कार्यालयापर्यंत हा मोर्चा काढण्यात आला.

विद्यार्थ्यांच्या आंदोलनाला पाठिंबा देण्यासाठी आमदार रोहित पवारही या मोर्चात सहभागी झाले होते. मोठ्या संख्येने विद्यार्थी रस्त्यावर उतरल्याने प्रशासनाचेही लक्ष या आंदोलनाकडे वेधले गेले. आंदोलनाच्या पार्श्वभूमीवर पोलिसांचा तगडा बंदोबस्त तैनात करण्यात आला होता.

12 प्रमुख मागण्यांवर विद्यार्थ्यांचा आक्रमक पवित्रा

MPSC विद्यार्थ्यांच्या वतीने एकूण 12 प्रमुख मागण्या मांडण्यात आल्या आहेत. परीक्षांमधील कथित गैरप्रकारांची सखोल चौकशी करण्यापासून ते परीक्षा प्रक्रिया अधिक पारदर्शक करण्यापर्यंत विविध मागण्यांचा यात समावेश आहे.

प्रसाद वाटप करणाऱ्या गणेश मंडळांना एफडीए नोंदणी बंधनकारक

पेपरफुटीच्या घटनांची चौकशी करून दोषींवर कठोर कारवाई करावी, परीक्षांचे नियोजन पारदर्शक पद्धतीने करावे आणि भविष्यात अशा घटनांची पुनरावृत्ती होऊ नये यासाठी आयोगाने ठोस उपाययोजना कराव्यात, अशी मागणी विद्यार्थ्यांनी केली आहे.

गट ‘ब’ परीक्षेतील कथित गैरप्रकाराचाही मुद्दा

MPSCच्या विविध परीक्षांबाबत विद्यार्थ्यांनी प्रश्न उपस्थित केले आहेत. विशेषतः गट ‘ब’ परीक्षेतील कथित गैरप्रकार, परीक्षांचे नियोजन आणि पेपरफुटीच्या आरोपांमुळे विद्यार्थ्यांमध्ये नाराजी असल्याचे आंदोलनकर्त्यांचे म्हणणे आहे.

स्पर्धा परीक्षांची तयारी करण्यासाठी विद्यार्थी अनेक वर्षे मेहनत घेतात. मात्र परीक्षेच्या प्रक्रियेतच गैरप्रकार झाल्याच्या आरोपांमुळे विद्यार्थ्यांचे मोठे नुकसान होते. त्यामुळे आयोगाने परीक्षा प्रक्रियेबाबत अधिक पारदर्शकता आणि विश्वासार्हता निर्माण करावी, अशी मागणी करण्यात आली आहे.

आंदोलनाची धार आणखी वाढणार?

MPSCच्या कारभाराविरोधात यापूर्वीही विद्यार्थी आंदोलन करत आले आहेत. मात्र आता विद्यार्थ्यांसोबत शिक्षक आणि CJPसारखी संघटना सक्रिय झाल्याने आंदोलनाला व्यापक स्वरूप मिळण्याची शक्यता आहे.

अध्यक्ष आणि सचिवांच्या राजीनाम्याच्या मागणीवर आंदोलनकर्ते ठाम असल्याचे बैठकीतून स्पष्ट झाले आहे. गणेश विसर्जनापर्यंत मागण्यांवर निर्णय झाला नाही, तर पुढची दिशा काय असेल? राज्यातील किती भागांमध्ये आंदोलन उभारले जाणार? आयोग आणि सरकार या दबावाला कसा प्रतिसाद देणार? याकडे आता सर्वांचे लक्ष लागले आहे.

MPSCच्या परीक्षा प्रक्रियेतील कथित गैरप्रकारांवरून सुरू झालेला विद्यार्थ्यांचा आक्रोश आता केवळ एका शहरापुरता मर्यादित न राहता राज्यव्यापी आंदोलनाचे रूप घेण्याची शक्यता निर्माण झाली आहे.