2000 च्या नोटा बदलायला सरकारची पहिली मुदतवाढ; 7 ऑक्टोबरपर्यंत बदलता येणार नोटा!!

By, Pravin Wankhade - September 30, 2023 06:53:16

0

वृत्तसंस्था

नवी दिल्ली : रिझर्व्ह बँक ऑफ इंडियाने RBI बँकेत 2000 रुपयांच्या नोटा जमा करण्याची किंवा इतर नोटांसोबत बदलण्याची तारीख 7 ऑक्टोबरपर्यंत वाढवली आहे. ही पहिली मुदतवाढ आहे. पैसे काढण्याच्या प्रक्रियेचा निर्धारित कालावधी 30 सप्टेंबरला संपला. पण सरकारने पुनरावलोकनाच्या आधारावर, 2000 रुपयांच्या नोटा जमा करण्याची आणि बदलण्याची विद्यमान प्रणाली 7 ऑक्टोबर 2023 पर्यंत वाढवण्याचा निर्णय घेतला आहे. Government’s first extension to exchange 2000 notes

यापूर्वी, आरबीआयने या वर्षी 19 मे रोजी एक परिपत्रक जारी करून 30 सप्टेंबरपर्यंत 2000 रुपयांच्या नोटा बँकांमध्ये जमा करण्यास किंवा बदलण्यास सांगितले होते. यानंतरही 2000 रुपयांची नोट कायदेशीर राहील, असे त्यावेळी सांगण्यात आले होते. 31 ऑगस्ट 2023 पर्यंत 3 हजार 56 अब्ज रुपयांच्या नोटा बँकांमध्ये परत आल्या आहेत.

2000 ची नोट 2016 मध्ये आली होती

2000 रुपयांची नोट नोव्हेंबर 2016 मध्ये बाजारात आली होती. त्यानंतर पंतप्रधान नरेंद्र मोदी यांनी 500 आणि 1000 रुपयांच्या नोटा चलनातून बाद करण्याची घोषणा केली होती. त्यांच्या जागी नव्या पॅटर्नमध्ये 500 आणि 2000 रुपयांच्या नव्या नोटा जारी करण्यात आल्या. मात्र, 2018-19 पासून RBI ने 2000 रुपयांच्या नोटांची छपाई थांबवली आहे. तर 2021-22 मध्ये 38 कोटी 2000 रुपयांच्या नोटा नष्ट झाल्या.

नोटा कशा बदला??

नोटा बदलण्यासाठी कोणत्याही कागदपत्राची आवश्यकता आहे का?

नाही, बँकेत जाऊन कोणत्याही कागदपत्राशिवाय या नोटा सहज बदलता येतील. नोटा बदलून घेताना कोणतीही अडचण येऊ नये यासाठी बँकांनाही याबाबत माहिती देण्यात आली आहे. सरकारने जारी केलेल्या मार्गदर्शक सूचनांनुसार, बँकेत नोटा बदलून घेण्यासाठी कोणत्याही प्रकारची कागदपत्रे द्यावी लागणार नाहीत.

एका वेळी 20,000 च्या मर्यादेपर्यंत, 2000 च्या नोटा बदलल्या जाऊ शकतात म्हणजेच इतर मूल्यांमध्ये बदलल्या जाऊ शकतात. तुमचे खाते असल्यास तुम्ही खात्यात कितीही 2000 रुपयांच्या नोटा जमा करू शकता.

सरकारी आदेशाचा सर्वसामान्यांवर काय परिणाम होईल?

ज्याच्याकडे 2000 रुपयांची नोट असेल त्याला ती बँकेत जाऊनच बदलून घ्यावी लागेल. 2016 च्या नोटाबंदीमध्ये, जेव्हा 500 आणि 1000 रुपयांच्या नोटांवर बंदी घालण्यात आली तेव्हा त्या बदलण्यासाठी लांबच लांब रांगा लागल्या होत्या. त्यामुळे नागरिकांना मोठ्या त्रासाला सामोरे जावे लागले. यंदाही तशी परिस्थिती निर्माण झालेली नाही.