चंद्राबाबू नायडूंच्या जामिनावर 21 सप्टेंबरला सुनावणी; TDP खासदारांची संसदेबाहेर निदर्शने, केंद्राकडून हस्तक्षेपाची मागणी

By, Pravin Wankhade - September 20, 2023 09:45:01

0

chandrababu-naidu-bail-hearing-on-september-21

वृत्तसंस्था

हैदराबाद : आंध्र प्रदेशचे माजी मुख्यमंत्री चंद्राबाबू नायडू यांच्या जामीन याचिकेवर मंगळवारी आंध्र प्रदेश उच्च न्यायालयात सुनावणी झाली. युक्तिवाद ऐकून घेतल्यानंतर न्यायालयाने सुनावणी 21 सप्टेंबरपर्यंत तहकूब केली. 371 कोटी रुपयांच्या कौशल्य विकास घोटाळ्यात नायडू यांना 9 सप्टेंबर रोजी सीआयडीने अटक केली होती. Chandrababu Naidu bail hearing on September 21; TDP MPs protest outside Parliament, demand intervention from Centre

यापूर्वी 13 सप्टेंबर रोजी नायडू यांच्या वकिलांनी CID FIR रद्द करण्याची आणि आंध्र उच्च न्यायालयात अंतरिम जामीन देण्याची मागणी केली होती. त्यावर न्यायालयाने 19 सप्टेंबरपर्यंत स्थगिती दिली होती. आजच्या सुनावणीनंतर न्यायालयाने पुन्हा एकदा सुनावणी 21 सप्टेंबरपर्यंत पुढे ढकलली आहे.

नायडू यांच्या अटकेविरोधात टीडीपीच्या खासदारांनी संसदेतील गांधीजींच्या पुतळ्याजवळ निदर्शने केली. पक्षाचे राम मोहन नायडू यांनी या अटकेविरोधात केंद्राकडे हस्तक्षेप करण्याची मागणी केली आहे. माध्यमांशी बोलताना ते म्हणाले की, पक्ष संसदेच्या विशेष अधिवेशनात नायडूंच्या अटकेचा मुद्दा नक्कीच उपस्थित करेल.

आंध्र प्रदेश : माजी मुख्यमंत्री चंद्राबाबू नायडू यांना अटक झाली, तो ‘कौशल्य विकास घोटाळा’ नेमका काय आहे?

नायडूंना दिलासा मिळण्याची शक्यता कमी

नायडू प्रकरणाची कायदेशीर माहिती असलेल्या लोकांचा असा विश्वास आहे की हा एक गुंतागुंतीचा खटला आहे, त्यामुळे उच्च न्यायालयाने हा खटला त्वरित निकाली काढण्याची शक्यता कमी आहे. निकाल देण्यापूर्वी न्यायालय या प्रकरणाची दीर्घकाळ सुनावणी करेल.

नायडूंवर आणखी गुन्हे दाखल

अमरावती इनर रिंगरोड प्रकरणी नायडू यांच्यावर गुन्हा दाखल आहे. नायडू यांनी अमरावती इनर रिंगरोडचे संरेखन बदलले असून त्यासाठी त्यांना उंडवल्लीतील कृष्णा नदीच्या काठावर मोफत बंगला देण्यात आल्याचा आरोप सीआयडीने केला आहे.

याच कारणामुळे कौशल्य विकास घोटाळा प्रकरणातून नायडू निर्दोष सुटले तरी अमरावती इनर रिंगरोड प्रकरणात पोलीस त्यांना अटक करतील. याशिवाय वायएसआरसीपी नेत्यावर हल्ला केल्याप्रकरणी नायडू यांच्यावर खुनाच्या प्रयत्नाचा गुन्हाही दाखल करण्यात आला आहे.

नायडू यांचे पुत्र लोकेश यांनी पक्षाची सूत्रे हाती घेतली

नायडू यांच्या अटकेनंतर त्यांचा मुलगा आणि टीडीपीचे सरचिटणीस नारा लोकेश यांनी पक्षाचे नेतृत्व स्वीकारले आहे. लोकेश राज्यात मॅरेथॉन पदयात्रा काढत होते, पण नायडूंच्या अटकेनंतर त्यांनी ती थांबवली होती.

कौशल्य विकास घोटाळा म्हणजे काय?

2016 मध्ये, तत्कालीन मुख्यमंत्री चंद्राबाबू नायडू यांनी बेरोजगार तरुणांना कौशल्य प्रशिक्षण देण्यासाठी आंध्र प्रदेश राज्य कौशल्य विकास महामंडळ (APSSDC) ची स्थापना केली होती.
टीडीपी सरकारने APSSDC च्या 3,300 कोटी रुपयांच्या प्रकल्पासाठी सीमेन्स इंडस्ट्री सॉफ्टवेअर इंडिया लिमिटेड आणि डिझाइन टेक सिस्टम्स प्रायव्हेट लिमिटेड या समूह कंपन्यांसोबत सामंजस्य करार केला.
या कराराअंतर्गत, सीमेन्स इंडस्ट्री सॉफ्टवेअर इंडिया 3,300 कोटी रुपये खर्चून कौशल्य विकासासाठी सहा उत्कृष्टता केंद्रे स्थापन करणार होती.
प्रकल्पाच्या एकूण किमतीच्या 10 टक्के रक्कम राज्य सरकारने भरायची होती, तर उर्वरित रक्कम सीमेन्स आणि डिझाइन टेकला सहाय्य म्हणून द्यायची होती.