‘दीड तासात हजर करा, नाहीतर थेट निलंबन!’ सीईओ मिन्नू पी. एम. यांचा अधिकाऱ्यांना दणका

By, wankhadepravin - October 10, 2026 04:00:57

0

विशेष प्रतिनिधी

छत्रपती संभाजीनगर : ग्रामपंचायतींचा प्रशासक म्हणून नियुक्ती होऊनही पदभार स्वीकारण्यास टाळाटाळ करणाऱ्या अधिकाऱ्यांविरोधात छत्रपती संभाजीनगर जिल्हा परिषदेच्या मुख्य कार्यकारी अधिकारी (सीईओ) मिन्नू पी. एम. यांनी आक्रमक भूमिका घेतली आहे. ‘पदभार स्वीकारणार नसाल, तर थेट निलंबनाची कारवाई करू,’ असा स्पष्ट इशारा त्यांनी संबंधित अधिकाऱ्यांना दिला. शिऊर येथील पदभार नाकारणाऱ्या अधिकाऱ्याला दीड तासांत, म्हणजेच सायंकाळी साडेपाच वाजेपर्यंत आपल्या दालनात हजर करण्याचे आदेशही त्यांनी दिले. सीईओंच्या या कठोर भूमिकेमुळे जिल्हा परिषद वर्तुळात खळबळ उडाली आहे.

६०५ ग्रामपंचायतींवर प्रशासकांची नियुक्ती

छत्रपती संभाजीनगर जिल्ह्यात कार्यकाळ संपलेल्या ६०५ ग्रामपंचायतींवर प्रशासकांची नियुक्ती करण्यात आली आहे. यामध्ये विविध विभागांतील विस्तार अधिकारी, शाखा अभियंते, केंद्रप्रमुख आणि मुख्याध्यापकांचा समावेश आहे. ग्रामपंचायतींच्या दैनंदिन कामकाजात खंड पडू नये आणि स्थानिक प्रशासन सुरळीत सुरू राहावे, यासाठी या अधिकाऱ्यांवर प्रशासक म्हणून जबाबदारी सोपविण्यात आली आहे.

मात्र, नियुक्त्या होऊन महिना उलटूनही काही अधिकाऱ्यांनी अद्याप पदभार स्वीकारलेला नसल्याचे समोर आले आहे. त्यामुळे संबंधित ग्रामपंचायतींच्या प्रशासकीय कामकाजाचा प्रश्न निर्माण झाला असून, या प्रकाराची गंभीर दखल जिल्हा परिषदेच्या वरिष्ठ अधिकाऱ्यांनी घेतली आहे.

‘मराठीला ज्ञानभाषा बनवणार’; AIपासून स्पेस टेक्नॉलॉजीपर्यंत फडणवीसांचा मोठा प्लॅन

‘पदभार घेणार नसाल, तर थेट निलंबन’

ग्रामपंचायतींची जबाबदारी सोपवूनही काही अधिकारी पदभार स्वीकारण्यास टाळाटाळ करत असल्याचा मुद्दा जिल्हा परिषदेच्या स्थायी समितीच्या बैठकीत उपस्थित करण्यात आला. शुक्रवारी (९ ऑक्टोबर) झालेल्या या बैठकीत सदस्यांनी प्रशासकांच्या मनमानीचा मुद्दा मांडला. त्यानंतर सीईओ मिन्नू पी. एम. यांनी संबंधित अधिकाऱ्यांच्या भूमिकेवर तीव्र नाराजी व्यक्त केली.

प्रशासक म्हणून नियुक्ती झाल्यानंतरही पदभार स्वीकारला जात नसेल, तर अशी टाळाटाळ खपवून घेतली जाणार नाही, असे त्यांनी स्पष्ट केले. ‘चार्ज घेणार नसाल, तर थेट निलंबनाची कारवाई करू,’ अशा कठोर शब्दांत त्यांनी अधिकाऱ्यांना सुनावल्याची माहिती आहे.

शिऊरच्या अधिकाऱ्याला दीड तासांची मुदत

शिऊर येथील ग्रामपंचायतीचा प्रशासक म्हणून नियुक्ती झालेल्या अधिकाऱ्याने पदभार स्वीकारण्यास नकार दिल्याचा मुद्दाही बैठकीत समोर आला. यावर सीईओंनी तातडीने कारवाईची भूमिका घेत संबंधित अधिकाऱ्याला सायंकाळी साडेपाच वाजेपर्यंत आपल्या दालनात हजर करण्याचे आदेश दिले.

पदभार स्वीकारण्यास टाळाटाळ करणाऱ्या अधिकाऱ्यांबाबत प्रशासनाने आता कठोर भूमिका घेतल्याचे या आदेशावरून स्पष्ट झाले आहे. नियुक्ती झाल्यानंतरही जबाबदारी पार पाडली जात नसेल, तर संबंधितांवर शिस्तभंगाची कारवाई होण्याची शक्यता आहे.

अधिकाऱ्यांच्या भूमिकेकडे लक्ष

जिल्ह्यातील ६०५ ग्रामपंचायतींवर प्रशासकांची नियुक्ती करण्यात आली असताना काही अधिकाऱ्यांनी पदभार स्वीकारलेला नसल्याचा मुद्दा ऐरणीवर आला आहे. स्थायी समितीच्या बैठकीत हा विषय उपस्थित झाल्यानंतर सीईओंनी दिलेल्या कडक इशाऱ्यामुळे संबंधित अधिकाऱ्यांच्या भूमिकेकडे लक्ष लागले आहे.

आता पदभार स्वीकारण्यास टाळाटाळ करणारे अधिकारी तातडीने जबाबदारी स्वीकारतात की त्यांच्यावर निलंबनासह अन्य शिस्तभंगाची कारवाई होते, हे पाहणे महत्त्वाचे ठरणार आहे.