टायगर श्रॉफ गोळीबार प्रकरणात पोलिसांना मोठा क्लू! आरोपींच्या मागे कोण, फडणवीसांनी स्पष्टच सांगितलं

By, wankhadepravin - October 19, 2026 02:30:33

0

मुंबईतील जुहू परिसरात अभिनेता टायगर श्रॉफच्या कारवर झालेल्या गोळीबार प्रकरणात पोलिसांना आरोपींबाबत महत्त्वाचे धागेदोरे मिळाले आहेत. मुख्यमंत्री तथा गृहमंत्री देवेंद्र फडणवीस यांनी ही माहिती देताना आरोपींचा शोध घेऊन त्यांच्यावर कठोर कारवाई केली जाईल, असे स्पष्ट केले. तसेच, या आरोपींच्या पाठीशी कोण आहे आणि त्यांना कोण मदत करत आहे, याचाही तपास केला जाणार असल्याचे त्यांनी सांगितले.

विशेष प्रतिनिधी

मुंबई : बॉलिवूड अभिनेता टायगर श्रॉफच्या कारवर झालेल्या गोळीबाराच्या घटनेने मुंबईत खळबळ उडाली आहे. जुहू परिसरात फुटबॉल खेळण्यासाठी गेलेल्या टायगर श्रॉफच्या कारवर रविवारी सायंकाळी गोळीबार करण्यात आला. या घटनेत कारवर पाच राऊंड गोळ्या झाडण्यात आल्याची माहिती समोर आली आहे. सुदैवाने या हल्ल्यात टायगर श्रॉफ सुरक्षित बचावला. घटनेनंतर मुंबई पोलिसांनी तपासाला वेग दिला असून, आरोपींचा शोध सुरू आहे.

या प्रकरणावर मुख्यमंत्री देवेंद्र फडणवीस यांनी माध्यमांशी संवाद साधताना पोलिसांच्या तपासाबाबत महत्त्वाची माहिती दिली. पोलिसांनी रात्रीच आरोपींची ओळख पटवण्यासाठी आवश्यक धागेदोरे मिळवल्याचे त्यांनी सांगितले. आरोपींना कोणत्याही परिस्थितीत शोधून काढले जाईल आणि त्यांच्यावर कारवाई केली जाईल, असेही त्यांनी स्पष्ट केले.

आरोपींच्या पाठीशी कोण? पोलिसांकडून तपास सुरू

देवेंद्र फडणवीस म्हणाले, “ही निंदनीय घटना आहे. पोलिसांनी तत्काळ कारवाई सुरू केली आहे. पोलिसांना रात्रीच आरोपींच्या संदर्भातील धागेदोरे प्राप्त झाले आहेत. कोणत्याही परिस्थितीत आरोपींना शोधून काढून त्यांच्यावर कारवाई केली जाईल. तसेच, त्यांच्या पाठीशी कोण आहे, याचाही शोध पोलीस घेतील.”

या प्रकरणातील आरोपी अल्पवयीन असल्याची चर्चा होत असताना फडणवीस यांनी त्याबाबत स्पष्टीकरण दिले. आरोपींना अल्पवयीन म्हणता येणार नसल्याचे सांगत, त्यांच्या ओळखीबाबत पोलिसांना महत्त्वाचे धागेदोरे मिळाल्याचे त्यांनी नमूद केले. मात्र, आरोपींची नावे किंवा त्यांच्याबाबतची अधिकृत माहिती त्यांनी यावेळी उघड केली नाही.

‘सत्ता बदलायची असेल तर निवडणुका जिंका’; रेजीम चेंजच्या मुद्द्यावर फडणवीसांचा विरोधकांना इशारा

‘मुंबई पोलिसांकडून गुन्हेगारांना जेरबंद केले जाईल’

मुंबईत यापूर्वीही अशा प्रकारच्या घटना घडल्या असल्या, तरी पोलिसांनी संबंधित आरोपी आणि त्यांना मदत करणाऱ्यांचा शोध घेतल्याचे फडणवीस यांनी सांगितले. अशा घटनांना कोणत्याही परिस्थितीत सहन केले जाणार नसल्याचे स्पष्ट करत त्यांनी मुंबई पोलिसांच्या तपासावर विश्वास व्यक्त केला.

“पोलिसांना उघडपणे आव्हान देता येणार नाही. हे लोक कुठेतरी लपून बसतात आणि अशा प्रकारच्या वल्गना करतात. हे भाड्याने आणलेले लोक आहेत,” असे फडणवीस म्हणाले. काही गुन्हेगारी गट महाराष्ट्राबाहेर तसेच देशाबाहेरून कार्यरत असल्याने त्यांचा शोध घेणे आव्हानात्मक ठरू शकते, असेही त्यांनी नमूद केले.

केंद्रीय यंत्रणांशी समन्वय साधणार

या प्रकरणासह अशा प्रकारच्या गुन्ह्यांमध्ये सहभागी असलेल्या व्यक्ती आणि त्यांचे सूत्रधार यांच्यापर्यंत पोहोचण्यासाठी केंद्र सरकारच्या विविध यंत्रणांशी समन्वय साधला जाणार असल्याचे फडणवीस यांनी सांगितले. गुन्हेगारी कारवायांमागील सूत्रधारांचा शोध घेऊन त्यांच्यावर कारवाई करण्यावर भर दिला जाईल, असेही त्यांनी स्पष्ट केले.

बॉलिवूड कलाकारांना घाबरण्याचे कारण नाही

गोळीबाराच्या घटनेच्या पार्श्वभूमीवर बॉलिवूड कलाकारांच्या सुरक्षेबाबत विचारण्यात आलेल्या प्रश्नाला उत्तर देताना फडणवीस यांनी कलाकारांना घाबरण्याची गरज नसल्याचे सांगितले. मुंबई पोलीस व्यावसायिक पद्धतीने काम करतात आणि अशा प्रकारच्या गुन्ह्यांतील आरोपींना जेरबंद करण्यासाठी पोलीस यंत्रणा सक्षमपणे प्रयत्न करेल, असा विश्वास त्यांनी व्यक्त केला.

टायगर श्रॉफच्या कारवर झालेल्या गोळीबारामागील नेमके कारण काय, या घटनेत कोणाचा सहभाग आहे आणि आरोपींना कोणाचे पाठबळ आहे, हे तपासातून स्पष्ट होणार आहे. सध्या पोलिसांकडून आरोपींचा शोध सुरू असून, या प्रकरणातील पुढील तपासाकडे सर्वांचे लक्ष लागले आहे.

🕙 9.50am | 19-10-2026📍Nagpur.

LIVE | Media Interaction#Maharashtra #Nagpur https://t.co/2S4WUYGxiG

— Devendra Fadnavis (@Dev_Fadnavis) October 19, 2026