पुणेकरांच्या खिशाला पुन्हा झटका! CNGच्या दरात ₹2 ची वाढ; आजपासून नवा दर किती?

By, wankhadepravin - October 7, 2026 04:00:47

0

विशेष प्रतिनिधी

पुणे : पुणे शहरातील सीएनजीच्या दरात पुन्हा एकदा वाढ करण्यात आली आहे. टोरंट गॅसने सीएनजीच्या दरात प्रति किलो 2 रुपयांची वाढ केली असून, या दरवाढीनंतर पुण्यात सीएनजीचा नवा दर 100 रुपये 50 पैसे प्रति किलो झाला आहे. वाढीव दर बुधवार, 7 ऑक्टोबर 2026 पासून लागू करण्यात आला आहे. CNG prices

पुणे पेट्रोल डीलर्स असोसिएशनचे अध्यक्ष ध्रुव रुपारेल यांनी या दरवाढीची माहिती दिली आहे. टोरंट गॅसकडून करण्यात आलेली ही दरवाढ 6 ऑक्टोबरच्या मध्यरात्रीपासून म्हणजेच 7 ऑक्टोबरच्या पहाटे 12 वाजल्यापासून लागू झाली आहे. त्यामुळे टोरंट गॅसच्या पंपांवर सीएनजी भरणाऱ्या वाहनधारकांना आता प्रत्येक किलोमागे अतिरिक्त 2 रुपये मोजावे लागणार आहेत.

CNGने ओलांडला 100 रुपयांचा टप्पा

या दरवाढीनंतर पुण्यात सीएनजीच्या दराने प्रथमच 100 रुपयांचा टप्पा ओलांडला आहे. त्यामुळे सीएनजीवर अवलंबून असलेल्या वाहनधारकांच्या खर्चात आणखी वाढ होणार आहे. विशेषतः रिक्षा, कॅब, कार तसेच व्यावसायिक वाहनांचा वापर करणाऱ्यांना या दरवाढीचा थेट आर्थिक फटका बसणार आहे.

‘मराठीला ज्ञानभाषा बनवणार’; AIपासून स्पेस टेक्नॉलॉजीपर्यंत फडणवीसांचा मोठा प्लॅन

वाहनचालकांच्या मासिक बजेटवर परिणाम

पेट्रोल आणि डिझेलच्या तुलनेत खर्च कमी राहावा, या उद्देशाने अनेक नागरिक आणि व्यावसायिक वाहनचालकांनी सीएनजीचा पर्याय स्वीकारला आहे. मात्र, सीएनजीच्या दरातही सातत्याने वाढ होत असल्याने वाहनचालकांच्या मासिक बजेटवर अतिरिक्त भार पडत आहे.

इंधनाच्या खर्चासोबतच वाहनांची देखभाल, विमा आणि इतर दैनंदिन खर्च वाढत असताना आता सीएनजीच्या दरवाढीमुळे वाहनचालकांच्या खर्चात आणखी भर पडणार आहे. त्यामुळे पुण्यातील सीएनजी वाहनधारकांसाठी 7 ऑक्टोबरपासून प्रति किलो 2 रुपये अधिक मोजावे लागणार आहेत.