चीनची चालूगिरी उघड्यावर आली; वुहानमधली मृतांची आकडेवारी वाढली

बिजींग : चीनी व्हायरस कोरोनामुळे वुहानमध्ये मरण पावलेल्यांच्या संख्येत “अचानक” ४०% वाढ झाल्याने चीनी कम्युनिस्ट सरकारची चालूगिरी उघड्यावर आली आहे. चीनच्या झिनूआ न्यूज एजन्सीनेच ही चालूगिरी उघड्यावर आणली.

एरवी चीनी कम्युनिस्ट सरकारच्या पोलादी पडद्याआडून कोणतीही खरी माहिती बाहेर पडणे अवघड असते. त्यातच कोरोना व्हायरसच्या फैलावाबाबत कम्युनिस्ट सरकारने मूळातच लपवाछपवी, उडवाउडवी, सारवासारवी, धच्चोटगिरी हे  सगळे प्रकार करून जगाला फसवले. पण पाण्यात घाण केली की कधीतरी वर येणारच तसेच चीनी कम्युनिस्ट सरकारचे झाले.

वुहानमधली मृतांची आकडेवारी कायद्यात दुरुस्ती करून त्यांना जाहीर करावी लागली. ती तब्बल ४०% जास्त भरल्याने चूक कुठे, कशी, का, कोणी केली, झाली याचा लांबलचक खुलासा करावा लागला. पण चीनच्या विश्वासार्हतेची जगभरात एवढी नाचक्की झाली आहे की नवा आकडा जाहीर करूनही जगाची शंका चीनी कम्युनिस्ट सरकारला दूर करता आलेली नाही.

वुहान शहरामधील लॉकडाऊन ७५ दिवसांनंतर उघडण्यात आले आहे.
झिनुआ न्यूज एजन्सीनुसार, वुहानमधील कोरोना संक्रमितांचा नवा आकडा ५० हजार ३३३ आहे, तर मृतांचा आकडा १२९० ने वाढून तो ३८६९ वर पोहोचला आहे. वुहानच्या शहर प्रशासनाच्या हवाल्याने हा आकडा देण्यात आला आहे. याची कारणेही देण्यात आली आहेत.
ती कारणे अशी : कोरोना महामारीच्या सुरवातीला सरकारी किंवा खासगी रुग्णालयांमध्ये उपचारांची सोयच नव्हती. तसेच अनेक ठिकाणी सोयी अपूर्ण होत्या. रोगाचे नेमके कारण समजत नव्हते. रोग समजेपर्यंत अनेकजण मरण पावले. त्यापैकी बरेच जण रुग्णालयांमध्ये आलेच नाहीत घरीच त्यांना मरण आले. त्यांची मोजदाद झाली नव्हती. ती सरकारी प्रोटोकॉलनुसार आणि मृतांच्या वैद्यकीय हिस्टरीनुसार मोजदाद आता करण्यात आली आहे.